سیدنا علی بن ابوطالب رضی اللہ عنہ بیان کرتے ہیں کہ میں مکہ میں رسول اللہ صلی اللہ علیہ وسلم کے ساتھ تھا ، ہم مکہ کی ایک جانب نکلے ، جو درخت اور پتھر بھی آپ کے سامنے آتا ، وہ کہتا : اے اللہ کے رسول ! آپ پر سلامتی ہو ۔

سیدنا عبداللہ بن عباس رضی اللہ عنہما سے مروی ہے کہ رسول اللہ صلی اللہ علیہ وسلم نے فرمایا : ” ہم سب سے آخری امت ہیں ، لیکن سب سے پہلے حساب کتاب ہمارا ہو گا ۔ وہاں کہا جائے گا : امت امیہ اور اس کا نبی کہاں ہیں ؟ ہم ( ‏‏‏‏دنیا میں ) آخر میں آنے والے ہیں ( ‏‏‏‏لیکن آخرت میں ) سب سے پہلے حساب دینے والے ہوں گے ۔ “

سیدنا جابر بن عبداللہ رضی اللہ عنہ کہتے ہیں : ہم رسول اللہ صلی اللہ علیہ وسلم کے ساتھ چلتے رہے ، حتیٰ کہ ہم بنو نجار کے ایک باغ تک جا پہنچے ، اس میں ایک اونٹ تھا ، جو آدمی اس باغ میں داخل ہوتا وہ اونٹ اس پر ٹوٹ پڑتا تھا ، لوگوں نے یہ بات نبی کریم صلی اللہ علیہ وسلم کو بتائی ، آپ اس کے پاس آئے اور اس کو بلایا ، وہ اپنا ہونٹ زمین پر رگڑتا ہوا آیا ، یہاں تک کہ آپ کے سامنے گھٹنے ٹیک دیے ۔ آپ نے فرمایا : ” ‏‏‏‏لگام لاؤ ۔ “ آپ نے اسے لگام ڈالی اور اس کے مالک کو تھما دی ، پھر ، ہماری طرف متوجہ ہوئے اور فرمایا : ” زمین و آسمان کی ہر چیز جانتی ہے کہ میں اللہ کا رسول ہوں ، ماسوائے نافرمان جنوں اور انسانوں کے ۔ “

سیدنا انس رضی اللہ عنہ بیان کرتے ہیں کہ نبی اکرم صلی اللہ علیہ وسلم نے فرمایا : ” میں وہ پہلا شخص ہوں جو جنت کے دروازے کا کنڈا پکڑ کر کھٹکھٹاوں گا ۔ “ ‏‏‏‏