´سوتے وقت کیا دعا پڑھے؟`
اس سند سے بھی براء رضی اللہ عنہ سے یہی حدیث نبی اکرم صلی اللہ علیہ وسلم سے مرفوعاً مروی ہے، سفیان ثوری کہتے ہیں: ایک راوی نے «إذا أتيت فراشك طاهرا» ”جب تم باوضو اپنے بستر پر آؤ“ کہا اور دوسرے نے «توضأ وضوءك للصلاة» ”تم جب نماز جیسا وضو کر لو“ کہا اور آگے راوی نے معتمر جیسی روایت بیان کی۔ [سنن ابي داود/أبواب النوم /حدیث: 5048]

فوائد ومسائل:
1۔
سونے سے پہلے نماز والا وضو کرلینا دایئں کروٹ پر لیٹنا اور مسنون دعایئں یا ان میں سے کسی ایک کا پڑھنا از حد تاکیدی سنتیں ہیں۔

2۔
افضل یہ ہے کہ دعا کے بعد کوئی گفتگو نہ ہو۔

3۔
شرعی امور بالخصوص عبادت کے اعمال میں اپنی مرضی سے کمی بیشی جائز نہیں۔
حتیٰ کہ نبی کریم ﷺ نے اس دعا کے ایک لفظ کو دوسرے ہم معنی لفظ سے بدلنا بھی قبول نہیں فرمایا۔
جبکہ بعض لوگ کہہ دیتے ہیں کہ اس طرح سے کوئی فرق نہیں پڑتا۔
حالانکہ اس سے بہت فرق پڑتا ہے۔
اور اسے وہی شخص سمجھ سکتا ہے۔
جس کے دل میں سنت کی محبت جاگزیں ہو۔

4۔
والدین اور سرپرستوں پر واجب ہے۔
کہ نوخیز بچوں کی عادات کو ابتداء ہی سے سنت کے مطابق ڈھالنے کی کوشش کریں۔