سیدنا زبیر بن عوام رضی اللہ عنہ سے مروی ہے وہ فرماتے ہیں جنگ احد کے دن رسول اللہ صلی اللہ علیہ وسلم نے دو زرہیں زیب تن فرمائی تھیں، پس آپ صلی اللہ علیہ وسلم نے ایک چٹان پر چڑھنے کا ارادہ فرمایا تو اس چٹان پر نہ چڑھ سکے، پس آپ صلی اللہ علیہ وسلم نے سیدنا طلحہ رضی اللہ عنہ کو نیچے بٹھایا اور (ان پر کھڑے ہو کر) اس چٹان پر سیدھے چڑھ گئے۔ سیدنا زبیر رضی اللہ عنہ فرماتے ہیں کہ میں نے نبی اکرم صلی اللہ علیہ وسلم سے سنا آپ صلی اللہ علیہ وسلم نے فرمایا: طلحہ نے (اپنے اوپر جنت) واجب کر لی۔
تخریج الحدیث: «حسن» : «سنن ترمذي، ح 1692، وقال: حسن غريب، 3738. البحرالزخارللبزار 188/3 ح 927. مسند ابي يعليٰ (33/2، ح 670 وابن اسحاق صرح بالسماع عنده فى الرواية المختصرة). صحيح ابن حبان (الموارد:2212). و صححه الحاكم (25/3، 373.374). ووافقه الذهبي»