ام المؤمنین سیدہ ام سلمہ رضی اللہ عنہا سے مروی ہے، وہ فرماتی ہیں کہ شعبان اور رمضان کے علاوہ مسلسل دو ماہ کے روزے رکھتے میں نے کبھی آپ صلی اللہ علیہ وسلم کو نہیں دیکھا۔ امام ابو عیسٰی ترمذی رحمہ اللہ کہتے ہیں یہ اسناد صحیح ہے، راوی نے اسی طرح «عن ابي سلمة عن ام سلمه» کہا ہے۔ یہ حدیث ایک سے زائد لوگوں نے «عن ابي سلمة عن عائشه عن النبى صلى الله عليه وسلم» کے طریق سے روایت کی ہے اور یہ بھی احتمال ہے کہ ابو سلمتہ بن عبدالرحمٰن نے یہ حدیث «عن عائشه و ام سلمه رضي الله عنهما عن النبى صلى الله عليه وسلم» روایت کی ہو۔
تخریج الحدیث: «صحيح» : «(سنن ترمذي: 736، وقال: حديث حسن)، سنن نسائي (150/4 ح2177)» اس حدیث کی سند اگرچہ سفیان ثوری کے عن کی وجہ سے ضعیف ہے، لیکن سنن نسائی (2128) وغیرہ میں اس کے صحیح شواہد ہیں۔ جن کے ساتھ یہ بھی صحیح ہے۔