3591. حضرت ابوہریرہ ؓسے روایت ہے، انھوں نے فرمایا کہ میں رسول اللہ ﷺ کی صحبت میں تین سال رہا ہوں۔ اپنی پوری عمر میں مجھے حدیث یاد کرنے کا اتنا شوق کبھی نہیں ہواجتنا ان تین سالوں میں تھا۔ میں نے ایک مرتبہ آپ ﷺ کو اپنے ہاتھ سے یوں اشارہ کرکے فرماتے ہوئے سنا: ”قیامت کے قریب تم لوگ ایک ایسی قوم سے جنگ کروگے جن کے جوتے بالوں کے ہوں گے۔“(حضرت ابوہریرہ ؓ نے فرمایا:)اس سے مراد کرد ہیں۔ (راوی حدیث) سفیان نے ایک مرتبہ یوں بیان کیا کہ وہ اہل بازر، یعنی ایرانی یا کردی ہیں۔ [صحيح بخاري، حديث نمبر:3591]
حدیث حاشیہ: 1۔
حضرت ابو ہریرہ ؓ نے دربار رسالت میں مدت اقامت تین سال بیان کی ہے حالانہ آپ چار سال رہے ہیں کیونکہ غزوہ خیبر کے موقع پر آپ تشریف لائے جو صفر سات ہجری میں ہوااور رسول اللہ ﷺ ربیع الاول گیارہ ہجری میں فوت ہوئے۔
شاید حضرت ابو ہریرہ ؓ نے اس مدت کو شمار کیا ہے جس میں وہ اس مبارک مجلس کی سختی سے پابندی کرتے تھے اور اس مدت کو شامل نہیں کیا۔
جب رسول اللہ ﷺ کسی غزوے یا حج و عمرے کے سفر میں ہوتے تھے کیونکہ ان ایام میں وہ پابندی نہ ہوتی تھی۔
2۔
اس حدیث کے آخر میں لفظ بارز آیا ہے اس کے کئی ایک معنی ہیں۔
جو لوگ مسلمانوں سے جنگ کرنے کے لیے نمایاں طور پر حصہ لیں گے۔
اس سے مراد فارس کی زمین ہے فاکو باسے اور سین کو زاسے بدل دیا گیا ہے
وہ لوگ مراد ہیں جو جنگلات اور پہاڑوں میں رہنے والے ہوں گے کیونکہ یہ مقامات زمین سے ابھرے ہوئے ہیں بعض لوگوں نے اسے بازر یعنی زاکوپہلے اور راکوبعد میں پڑھا ہے عجم اور ترک زبان میں بازر کہا جاتا ہے صحیح لفظ بارزہی ہے۔
3۔
اس قوم سے مراد کرد،دیلم اور اہل فارس ہیں۔
انھوں نے مسلمانوں کو بہت نقصان پہنچایا۔
ہلا کو اور چنگیز خان کے ہاتھوں ہونے والی تباہی تاریخ کا ایک حصہ ہے۔
واللہ أعلم۔
(فتح الباري: 745/6)