´مسلمان کی پہچان`
«. . . ‏‏‏‏وَعَن أنس أَنَّهُ قَالَ: قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ: «مَنْ صَلَّى صَلَاتَنَا وَاسْتَقْبَلَ قِبْلَتَنَا وَأَكَلَ ذَبِيحَتَنَا فَذَلِكَ الْمُسْلِمُ الَّذِي لَهُ ذِمَّةُ اللَّهِ وَذِمَّةُ رَسُولِهِ فَلَا تُخْفِرُوا اللَّهَ فِي ذمَّته» . رَوَاهُ البُخَارِيّ . . .»
”. . . سیدنا انس رضی اللہ عنہ سے مروی ہے انہوں نے کہا کہ رسول اللہ صلی اللہ علیہ وسلم نے فرمایا: ”جس نے ہماری نماز کی طرح نماز پڑھی اور ہمارے قبلہ کی طرف (نماز پڑھنے میں) رخ کیا اور ہمارے ذبح کئے ہوئے جانور کو کھایا، تو یہ مسلمان ہے اس کے لیے اللہ کا ذمہ اور امان ہے اور رسول کا عہد و امان ہے۔ لہذا تم اللہ کے عہد و امان کو نہ توڑو۔“ . . .“ [مشكوة المصابيح/كِتَاب الْإِيمَانِ: 13]

تخریج الحدیث:
[صحيح بخاري 391]

فقہ الحدیث
➊ اللہ اور رسول کے ذمہ کا مطلب یہ ہے کہ وہ شخص اللہ و رسول کی امان، عہد اور ضمانت میں ہے۔ اس کی جان و مال کی حفاظت کی جائے گی۔ اسے تمام وہی حقوق میسر ہوں گے جو عام مسلمانوں کو حاصل ہیں۔ یہ علیحدہ بات ہے کہ جب وہ ایسے جرم کا ارتکاب کرے گا جس کی سزا موت ہے تو اسے مسلمان حاکم و قاضی قتل کرا سکتا ہے۔ اسی طرح اگر وہ نواقض اسلام کا ارتکاب کرے گا تو ثبوت و اقامت حجت کے بعد اس کے بنیادی حقوق ختم کر دیئے جائیں گے۔
➋ اس حدیث سے صاف ظاہر ہے کہ دین اسلام میں اعمال کا اعتبار ظاہر پر ہے۔ یعنی ظاہری طور پر ارکان اسلام ادا کرنے والا شخص ہی مسلم ہے، لہٰذا اس پر اسلام کے ظاہری احکام نافذ ہوں گے۔ رہا مسئلہ باطنی طور پر بھی مسلم و فرمان بردار ہونا تو یہ صرف اللہ ہی جانتا ہے۔
➌ ایمان کے ساتھ اعمال بھی ضروری ہیں، جبکہ مرجیہ یہ باطل عقیدہ رکھتے ہیں کہ ایمان کے ساتھ اعمال ضروری نہیں ہیں۔ اس حدیث سے ان مرجیہ پر بھی واضح رد ہوتا ہے۔
➍ اس حدیث اور دوسرے دلائل سے یہ ثابت ہے کہ نماز اسی طرح پڑھنی چاہئے۔ جس طرح رسول اللہ صلی اللہ علیہ وسلم (اور صحابہ کرام رضی اللہ عنہم) نے نماز پڑھی ہے۔
➎ اہل قبلہ پر اہل اسلام کے احکام جاری ہیں، الا یہ کہ وہ کفر صریح اور نواقص اسلام کا ارتکاب کریں۔ اس پر تمام مسلمانوں کا اجماع ہے کہ مرزا غلام قادیانی کذاب کے پیروکار، قادیانی مرزائی و لاہوری سب اہل اسلام (اہل قبلہ) سے خارج، کافر اور غیر مسلم ہیں۔ اس طرح کتاب و سنت اور اجماع سے جن لوگوں کا کافر و غیر مسلم ہونا ثابت ہے، وہ بھی اہل قبلہ اور اہل اسلام سے خارج ہیں۔

حدیث حاشیہ:
1۔
اس حدیث میں استقبال قبلہ کی اہمیت کو اجاگر کیا گیا ہے، وہ اس طرح کہ جس نے ہماری طرح نماز پڑھی، ہماری نماز میں رکوع بھی ہے، سجدہ بھی ہے اور قبلے کی طرف منہ بھی، لیکن اس ضمنی تذکرے پر اکتفا نہیں کیاگیا بلکہ استقبال قبلہ کومستقل طور پر بیان کیا گیا ہے۔
اس طرح اس کی خصوصیت فضیلت اور اہمیت معلوم ہوگئی اور اس حقیقت پر تنبیہ ہوگئی کہ قبلے کا اختیار کیا گیا ہے۔
اس کی وجہ یہ ہے کہ یہ تینوں چیزیں مسلمان اور غیر مسلم کے درمیان امتیاز پیداکرتی ہیں۔
نماز اور استقبال قبلہ مذہبی امتیاز ہے، کیونکہ دوسرے مذاہب میں اول تو نماز ہماری نماز کی طرح نہیں۔
دوسرے یہ کہ ان کی نماز میں استقبال قبلہ نہیں۔
تیسرا امتیاز ذبیحہ کا کھانا ہے جو معاشرتی امتیاز ہے، کیونکہ دیگر اہل مذاہب ہمارا ذبیحہ استعمال نہیں کرتے۔
گویا یہ تینوں چیزیں مسلمانوں کے لیے شعار کی حیثیت رکھتی ہیں۔
اگرکوئی ایسی چیز ظاہر نہ ہو جس کے اختیار کرنے سے کفر لازم آتا ہے تو ان چیزوں کے اختیار کرنے والے کو مسلمان سمجھا جائے گا۔
اس کا مطلب یہ نہیں کہ صرف یہ تین چیزیں ہی مسلمان ہونے کے لیے کافی ہیں بلکہ مطلب یہ ہے کہ جولوگ دین کی دوسری ضروریات کے ساتھ ان امتیازات کو قائم رکھیں وہ مسلمان ہیں۔
2۔
جو شخص ضروریات دین کا انکار کرتاہے وہ اہل قبلہ نہیں رہتا۔
ضروریات دین سے مراد وہ چیزیں ہیں جوکتاب اللہ، سنت رسول اللہ ﷺ اور اجماع امت سے ثابت ہوں۔
ان تینوں ذرائع سے جتنے بھی عقائدواعمال اور فرائض ونوافل ثابت ہیں ان سب پر ایمان لانا، اور انھیں تسلیم کرنا ضروریات دین کہلاتا ہے، ان کا انکار یا تاویل باطل کفر ہے، مثلاً:
نماز پڑھنا فرض ہے اور اس کے فرض ہونے کا اعتقاد بھی فرض، اس کاسیکھنا بھی فرض، اس سے ناواقفیت یا انکار کفر ہے۔
3۔
دوران نماز میں قبلے کی طرف منہ کرنا ضروری ہے، البتہ عذر یا خوف کی حالت میں اس کی فرضیت ساقط ہوجاتی ہے، اسی طرح نفلی نماز میں اس کے متعلق کچھ تخفیف ہے جبکہ سواری پر اد کی جارہی ہو۔
(فتح الباري: 644/1)