سیدنا سعید بن حریث رضی اللہ عنہ جن کو شرفِ صحبتِ رسول صلی اللہ علیہ وسلم حاصل تھا انہوں نے کہا: میں نے رسول اللہ صلی اللہ علیہ وسلم سے سنا، آپ صلی اللہ علیہ وسلم فرماتے تھے: ”تم میں سے جو کوئی گھر یا زمین بیچے تو ممکن ہے اس کے پیسے میں برکت نہ ہو الا یہ کہ وہ اس قیمت کو دوسرے گھر میں لگا دے۔“
تخریج الحدیث: تحقيق الحديث: حسين سليم أسد الداراني: «إسناده ضعيف لضعف إسماعيل بن إبراهيم بن مهاجر، [مكتبه الشامله نمبر: 2667]» اسماعیل بن ابراہیم بن مہاجر کی وجہ سے یہ سند ضعیف ہے، لیکن دوسرے طرق سے بھی مروی ہے۔ دیکھئے: [ابن ماجه 2490]، [أبويعلی 1458]، [المعرفة و التاريخ للفسوي 294/1]، [طبراني 65/6، 5526]، [ابن قانع فى معجم الصحابة 308]، [مجمع الزوائد 6627-6632]
وضاحت: (تشریح احادیث 2659 سے 2661) اگر یہ حدیث صحیح ہو تو دنیا داروں کے لئے بڑی نصیحت ہے، نقد رکھا ہوا پیسہ اکثر صرف ہو جاتا یا کبھی ضائع ہو جاتا ہے برخلاف جائداد غیر منقولہ یعنی زمین جائیداد کے، اسی لئے جائداد بیچنے کو ناپسند کیا، جب تک اس کے بدلے دوسری جائداد نہ خریدے، کیوں کہ نقد پیسہ رکھنے سے تو یہی بہتر تھا کہ جائداد اپنے پاس رہنے دیتا۔ (وحیدی)۔