مجھے ابوزبیر نے خبر دی، کہا: میں نے جابر بن عبداللہ رضی اللہ عنہ سے سنا، وہ کہہ رہے تھے: ہم رسول اللہ صلی اللہ علیہ وسلم اور ابوبکر رضی اللہ عنہ کے دور میں ایک مٹھی کھجور اور آٹے کے عوض چند دنوں کے لئے متعہ کرتے تھے، حتی کہ حضرت عمر رضی اللہ عنہ نے عمرو بن حُریث کے واقعے (کے دوران) میں اس سے منع کر دیا
حضرت جابر بن عبداللہ رضی اللہ تعالیٰ عنہما بیان کرتے ہیں، کہ ہم کھجور اور آ ٹے کی ایک مٹھی کے عوض چند دن کے لیے رسول اللہ صلی اللہ علیہ وسلم ، ابوبکر اور عمر رضی اللہ عنہما کے ادوار میں متعہ کر لیا کرتے تھے، پھر عمر رضی اللہ تعالیٰ عنہ نے اس سے عمرو بن حریث رضی اللہ تعالیٰ عنہ کے واقعہ پر منع کر دیا۔
الشيخ الحديث مولانا عبدالعزيز علوي حفظ الله، فوائد و مسائل، تحت الحديث ، صحيح مسلم: 3416
1
حدیث حاشیہ: فوائد ومسائل: حضرت عمر رضی اللہ تعالیٰ عنہ کو پتہ چلا کہ حضرت عمرو بن حریث رضی اللہ تعالیٰ عنہ نے ایک لونڈی سے متعہ کیا ہے، وہ کوفہ میں تھے اور وہ اس سے حاملہ ہو گئی ہے، حضرت عمرو بن حریث رضی اللہ تعالیٰ عنہ سے پوچھا، تو انہوں نے اعتراف کر لیا، اور انہوں نے حضور اکرم صلی اللہ علیہ وسلم کے دور کا حوالہ دیا، اس پرحضرت عمر رضی اللہ تعالیٰ عنہ نے خطبہ دیا، اورفرمایا: ”لوگوں کو کیا ہو گیا ہے، کہ حضور اکرم صلی اللہ علیہ وسلم کے منع کرنے کے بعد نکاح متعہ کرتے ہیں دوسری روایت ہے کہ رسول اللہ صلی اللہ علیہ وسلم نے ہمیں تین دن کے لیے اجازت دی تھی پھر منع فرما دیا تھا، آپ نے منبر پر، برملا اس کا تذکرہ کیا لیکن کسی صحابی نے اس کا انکار نہیں کیا۔ حالانکہ جب انہوں نے مہر میں زیادتی سے روکا تھا، توایک عورت نے انہیں ٹوک دیا تھا، اس لیے اگرحضرت عمر رضی اللہ تعالیٰ عنہ کی بات ان کے ہاں قابل قبول نہ ہوتی تو وہ اس پراعتراض کرتے، اعتراض نہ کرنا اسی بات کی بین دلیل ہے کہ انہوں نے اس بات کو تسلیم کیا کہ حضور اکرم صلی اللہ علیہ وسلم نے اس سے منع فرما دیا تھا، حضرت عمر رضی اللہ تعالیٰ عنہ نے جب اس حدیث حرمت کی تشہیر اوراعلان فرما دیا تو سب کو پتہ چل گیا جنہیں پہلے معلوم نہ تھا، انہیں بھی معلوم ہو گیا، حضرت جابر رضی اللہ تعالیٰ عنہ اور حضرت عمرو بن حریث رضی اللہ تعالیٰ عنہ نے عدم علمی کی بنا پر، ابوبکر رضی اللہ تعالیٰ عنہ اور عمر رضی اللہ تعالیٰ عنہ کے دورمیں سفر میں اس سے فائدہ اٹھایا، جب پتہ چل گیا تو وہ ہمیشہ ہمیشہ کے لیے اس سے باز آ گئے۔
