اور اس لحاظ سے ”انس“ کی ضد ”جن“ ہے۔ جس کے معنی استتار یا پوشیدگی کے ہیں اور آنکھ ان کا ادراک نہیں کر سکتی اور یہ اس لحاظ سے قرین قیاس بھی ہے کہ انہیں دو مخلوقات کو اللہ تعالیٰ نے ”ثَقَلان“ کہا ہے اور ایک دوسرے کے مقابل استعمال ہوئے ہیں۔

گویا اس لحاظ سے ”انسان“ یا ”انسيا“ کا مادہ ”نسي“ ہوا۔

امام راغب رحمہ اللہ اسے ”اُنْس“ سے مشتق بیان کرتے ہیں ۔ یعنی ایسی مخلوق جو آپس میں انس و موانست اور باہم معاشرتی زندگی گزارنے کے لئے پیدا کی گئی۔ جو مانوس ہو اور ایک دوسرے سے جان پہچان رکھتی ہو۔ اس لحاظ سے اس کی ضد وحش ہو گی۔

اور ابن الفارس نے یہ دونوں چیزیں پیش کر دی ہیں۔ (1) ظاہر ہونا (2) ہر وہ شے جو جنگلی اور وحشی طور طریقہ سے مختلف ہو۔

”انس“ اسم جنس ہے یعنی ”انس“ مراد ایک شخص بھی ہو سکتا ہے اور تمام بنی نو انسان بھی۔ یہی کیفیت لفظ انسان کی بھی ہے لیکن یہ لفظ بول کر عموماً تمام بنی نوع انسان ہی مراد لی جاتی ہے۔ اس کا واحد ”اِنسِيٌّ“ ہے۔

”ناس“ کے لفظ میں عمومیت پائی جاتی ہے۔ اگر ”يايها الناس“ کہا جائے تو اس سے مراد موجودہ دور یعنی حال اور مستقبل کے سب انسان مخاطب ہوتے ہیں۔

اور ”اَنَاسِيَّ“ انسانوں کے ایک بہت بڑے گروه کو کہا جاتا ہے۔

اور اس کی جمع ”بَشَرٌ“ اور ”اَبْشَارٌ“ آتی ہے اور انسان کو ”بشر“ اس لیے کہا جاتا ہے کہ اس کی جلد بمقابلہ دوسرے حیوانات کے اون، پشم اور بالوں وغیرہ سے بہت حد تک پاک صاف ہوتی اور ظاہر دکھائی دیتی ہے۔

”بشر“ کا لفظ واحد، جمع، مذکر، مونث سب کے لئے یکساں استعمال ہوتا ہے۔ البتہ اس کی تثنیہ ”بَشَرَيْن“ ہے۔

اور ”بشر“ کا لفظ اس وقت استعمال ہوتا ہے جب انسان کی طبعی اور مادی پہلو، اس کی جسمانی بناوٹ فطری حوائج اور کمزوریوں کا ذکر کرنا مقصود ہو۔ جیسا کہ مندرجہ بالا آیت سے واضح ہے۔

اور ”بشر“ کے مقابلے میں ”مَلَك“ (بمعنی فرشتہ) کا لفظ ہے جو مادی پہلو، یعنی ظاہری جسم اور فطری حوائج سے یکسر پاک ہوتا ہے۔ کفّار کا ہمیشہ یہی اعتراض رہا کہ ہم اپنے ہی جیسے ایک بشر جو ہماری طرح ہی پیدا ہوتا اور مرتا ہے، کھاتا پیتا، بازاروں میں چلتا پھرتا اور اپنی حاجات ہماری طرح ہی پوری کرتا ہے۔ تو اس میں آخر کیا فوقیت ہے کہ اس پر ایمان لایا جائے۔ ہاں اگر کوئی فرشتہ ہوتا، جو ان حوائج سے پاک ہوتا تو کوئی بات بھی تھی۔