نَکِرَ بمعنی کسی بات سے ناواقف ہونا (نَکْرة ضد مَعْرِفة) اور انکر بمعنی انکار کرنا کسی سے ناواقف ہونا اور تَنَاكَر بمعنی جان بوجھ کر ایک دوسرے سے ناواقف بننا اور اجنبیوں کا سا سلوک کرنااور نُکَر برا کام، سخت کام، اور منکر بمعنی برا کام ، بری بات ، ناگوار چیز ، گویا نکر میں اجنبیت اور ناگواری دو باتیں پائی جاتی ہیں۔

عَجَبٌ ایسی حیرت کو کہتی ہیں جس کا سبب معلوم نہ ہو نیز عَجَبَ بمعنی پسند کرنا اور اَعْجَبَ بمعنی کسی ایسی چیز کا خوشگوار محسوس ہونا جو غیر متوقع ہو یا اس کا سبب معلوم نہ ہو اور کبھی یہ لفظ محض خوشگوار کے معنوں میں بھی آتا ہے گویا عجب میں بھی دو باتیں پائی جاتی ہیں اجنبیت اور خوشگواری۔

جَنْب بمعنی پہلو۔ کروٹ اور جُنُب بمعنی اجنبی بھی اور ناپاک بھی اور جُنُب کا لفظ واحد تثنیہ، جمع مذکرو مونث سب کے لیے یکساں استعمال ہوتا ہے۔ یہ لفظ قرآن میں ان دونوں معنوں میں آیا ہے۔ جب یہ اجنبی کے معنوں میں آئے تو اس میں ناگواری یا خوشگواری کا کچھ تعلق نہیں ہوتا۔