برکت کے معنی میں کسی چیز میں خیر الہیٰ کا ثابت ہونا۔ یعنی جو کام کیا جائے اس میں متوقع زیادہ سے زیادہ فائدہ ہو جانا برکت ہے۔ بشرطیکہ یہ کام یا توقع خیر کا پہلو رکھتی ہو اور ”بركة“ معنی بڑھاؤ ، زیادتی۔

جس چیز میں یہ خیر کا پہلو بار آور ثابت ہو وہ مبارک ہے۔

”يمين“ معنی دایاں ہاتھ اور دائیں طرف اور ”اَصْحٰبُ الْيَمِيْن“ معنی دائیں ہاتھ یا دائیں جانب والے بھی اور اصحاب خیر و برکت بھی ہے۔ اور ”يَمَنَ“ ”يَيْمَنُ“ بمعنی بابرکت ہونا، خوش قسمت ہونا۔ ”تَيَمُّن“ بمعنی برکت لینا، نیک فال لینا۔ اور ”مَيْمُوْن“ بمعنی مبارک ہے اور امام راغب کے نزدیک ”ميمون“ معنی سعادت مند ہے گویا جس طرح سعادت فطرت میں ودیعت ہوتی ہے اسی طرح ”اَيْمَن“ وہ چیز ہے جس کی فطرت میں برکت ودیعت کی گئی ہو۔

”طَابَ“ بمعنی کسی چیز کا دل کو اچھا لگنا اور ”طَيَّب“ بمعنی پاکیزہ اور حلال چیز اور ”طِيْب“ بمعنی خوشبو۔ اور ”بَلْدَة طَيِبَة“ بمعنی امن اور برکتوں والا شہر۔ نیز ”اَلْبَلَدُ الطَّيِّبُ“ بمعنی بابرکت یا زرخیز زمین۔

”طُوْبٰي“ بمعنی رشک سعادت ، خیر ، بہتری۔ گویا ”طُوبٰ“ ی سے ایسی خیر و برکت مراد ہے جو من کو بھی بھاتی ہو۔