شِقْوَة اور شِقَاوَة دونوں کے معنی بد بختی ضد سعادة اور جس طرح سعادة امور اضافیہ سے ہے اسی طرح شقاوة اور شقوة بھی اموار اضافیہ سے ہے اور شقی وہ شخص ہے جو فطرتا ہی بدبخت یا بد نصیب ہو۔

نُحاس کے معنی تانبہ بھی ہے اور آگ کی ایسی لپٹ بھی جس کا رنگ تانبے جیسا ہو۔ اور نَحَسَ کے معنی آسمان کا سرخ ہو کر تانبے کی رنگت جیسا ہو جانا ہے اور یہ نحوست کے لئے ضرب المثل ہے۔ اور نحس اور نَحُوْسَة بمعنی سختی اور بدبختی کا دور (نحس کی ضد بھی سَعْد آتی ہے)۔

طَارَ بمعنی پرندہ وغیرہ کا ہوا میں اڑنا اور طَائِر بمعنی پرندہ ہے۔ چونکہ پرندوں سے فال لینے کا رواج عام تھا ۔ لہذا طائر کا لفظ فال یا شگون لینے کے معنوں میں بھی استعمال ہونے لگا۔ اس لفظ کا استعمال عموما بڑے معنوں میں ہوتا ہے۔ اِطَّیَّرَ اور تَطَیَّرَ کے معنی بد فعالی یا برا شگون لینا ہے (ضد تَیَمَّنَ اور تَبَرَّکَ) گویا طائر کا اصل معنی بدبختی نہیں بلکہ بد بختی کی فال لینا ہے۔

الشَّامَةَ الْمَشْئَمَةَ بمعنی نحوست۔ بے برکتی اور بایاں پہلو اور بایاں پہلو بھی نحوست کی علامت سمجھی جاتی ہے اور شامت دراصل ایسی بدشگونی کو کہتے ہیں جو اپنے اعمال کے نتیجہ میں متوقع ہو۔ شامت اعمال مشہور لفظ ہے اور تَشَاءُم بمعنی بری فال لینا (ضد تَیَمَّنَ)۔

الحسم بمعنی چیز کو کاٹنا اور اس کے نام و نشان تک مٹا دینا اور زائل کر دینا۔ اور حُسَام بمعنی تلوار۔ پھر حسوم ایسی نحوست یا عذاب کو بھی کہتے ہیں کہ انسان کا نام و نشان تک مٹا ڈالے۔