لغٰی (یلغوا) کے معنی بے سوچے سمجھے بولنا اور بکواس کرنا اور لَغَي الطَّیْر بِاَ صْوَاتِھَا پرندوں کے اپنی اپنی بولیاں بولنے کو کہتے ہیں معروف لفظ لغت سے مشتق ہے۔ بمعنی سب کی ملی جلی زبان اور لغو ہر بیہودہ کلام اور کتے کی آواز کے لیے استعمال ہوتا ہے اور لاغیۃ کے معنی بے ہودہ اور قبیح کلام ہے ۔

ھَزَلَ کے بنیادی طور پر دو معنی ہیں۔(1) لاغر دبلا یا کمزور ہونا 2) ھَزَلَ فِي كَلَامِهٖ یعنی ہنسی مذاق کرنا ، بکواس کرنا اور ھزالۃ معنی ظرافت و خوش طبعی بھی ہے۔ گویا ھزل کے معنی دل لگی کے طور پر گپیں ہانکنا ہے۔

نزف کے معنی کسی چیز کا ختم ہونا اور منقطع ہونا ہے نَزِفَ دَمُهٗ اس کا سب خون نکل گیا اور نزیف وہ آدمی جس کی عقل کھینچ لی گئی ہو مدہوش اور متوالا اور نَزَفَ الْمَاء کے معنی بتدریج پانی کھینچ لینا ہے گویا نزف کے معنی وہ بہکی بہکی باتیں ہیں جو کسی نشہ آور چیز کے استعمال سے یا کسی دوسری وجہ سے عقل و ہوش میں کمی واقع ہونے سے بد مست آدمی کرتے ہیں۔