سیدنا جابر رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا: ”مومن گنہگار توبہ کرنے والا اور معافی مانگنے والا ہوتا ہے، اور وہ شخص خوش نصیب ہے جو اپنی توبہ پر مر جائے۔“ [معجم صغير للطبراني/كِتَابُ الرِّقَاقِ/حدیث: 995]

سیدنا ابوہریرہ رضی اللہ عنہ کہتے ہیں کہ نبی صلی اللہ علیہ وسلم نے فرمایا: ”جو نبی ہو یا امیر ہو اس کے اندر دو پوشیدہ چیزیں ہیں، ایک وہ جو نیکی اور بھلائی کی طرف دعوت دیتی ہے اور اس کی طرف اس کی راہنمائی کرتی ہے، اور دوسری وہ پوشیدہ طاقت جو اس سے دشمنی کرنے میں کوئی دقیقہ فروگزاشت نہیں کرتی۔ تو جو پوشیدہ دشمنی سے محفوظ رہا وہ ہر برائی سے بچ گیا۔“ [معجم صغير للطبراني/كِتَابُ الرِّقَاقِ/حدیث: 996]

سیدنا ابن عباس رضی اللہ عنہما کہتے ہیں کہ نبی صلی اللہ علیہ وسلم نے فرمایا: ”جو کسی ظالم کی باطل پر اعانت کرے گا، تاکہ وہ اپنے باطل سے حق کو مٹا ڈالے، تو اس سے اللہ اور اس کے رسول کا ذمّہ ختم ہوگیا، اور جس نے ایک درہم سود کھایا تو وہ تینتیس (33) زناہوں کے برابر ہے، اور جس کا گوشت حرام کا ہو تو آگ ہی اس کی زیادہ حقدار ہے۔“ [معجم صغير للطبراني/كِتَابُ الرِّقَاقِ/حدیث: 997]

سیدنا ابن عباس رضی اللہ عنہما کہتے ہیں کہ رسول اللہ صلی اللہ علیہ وسلم نے فرمایا: ”جو شخص سونے اور چاندی کے برتنوں میں کھاتا اور پیتا ہے وہ اپنے پیٹ میں جہنم کی آگ انڈیلتا ہے۔“ [معجم صغير للطبراني/كِتَابُ الرِّقَاقِ/حدیث: 998]

سیدنا عمران بن حصین رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا: ”جو شخص کٹ کر اللہ کی طرف ہوگیا، اللہ تعالیٰ اس کی تمام مشقتوں کا ذمّہ دار ہوجاتا ہے، اور وہاں سے رزق دیتا ہے جہاں سے اس کو خیال بھی نہیں ہوتا، اور جو دنیا کی طرف کٹ کر ہو جاتا ہے اللہ تعالیٰ اس کو دنیا کے سپرد کر دیتا ہے۔“ [معجم صغير للطبراني/كِتَابُ الرِّقَاقِ/حدیث: 999]

سیدنا سعد بن ابی وقاص رضی اللہ عنہ کہتے ہیں کہ نبی کریم صلی اللہ علیہ وسلم نے فرمایا: ”اگر ابن آدم کی دو وادیاں مال ہو تو پھر بھی وہ آرزو کرے گا کہ مجھے ایک تیسری وادی بھی مل جائے۔ ابن آدم کے پیٹ کو صرف مٹی ہی بھر سکتی ہے، اور جو توبہ کرے اللہ تعالیٰ اس کی توبہ قبول فرماتا ہے۔“ [معجم صغير للطبراني/كِتَابُ الرِّقَاقِ/حدیث: 1000]

سیدنا انس بن مالک رضی اللہ عنہ کہتے ہیں کہ نبی صلی اللہ علیہ وسلم نے فرمایا: ”جو شخص مسلمانوں کے کسی کام کا ذمّہ دار بنایا گیا اس نے اگر ان کو دھوکہ دیا تو وہ جہنم میں ہو گا۔“ [معجم صغير للطبراني/كِتَابُ الرِّقَاقِ/حدیث: 1001]

سیدنا انس بن مالک رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا: ”اللہ تعالیٰ فرماتا ہے: ”میں جس کی دو پیاری آنکھیں لے لوں، تو وہ صبر کرے اور ثواب کا طلبگار ہو، تو میں اس کے اجر میں کم از کم جنّت پر راضی ہوں گا۔“ [معجم صغير للطبراني/كِتَابُ الرِّقَاقِ/حدیث: 1002]

سیدنا ابن عمر رضی اللہ عنہما کہتے ہیں کہ نبی صلی اللہ علیہ وسلم نے فرمایا: ”لوگوں کی مثال اونٹوں کی سی ہے کہ سو میں سے ایک بھی سواری کے قابل نہیں پاؤگے۔“ آپ صلی اللہ علیہ وسلم نے فرمایا: ”ہم اس جیسے ہزار میں سے صرف مومن مرد کو ہی بہتر سمجھتے ہیں۔“ [معجم صغير للطبراني/كِتَابُ الرِّقَاقِ/حدیث: 1003]

سیدہ عائشہ رضی اللہ عنہا کہتی ہیں کہ رسول اللہ صلی اللہ علیہ وسلم نے فرمایا: ”اللہ تعالیٰ نرم ہے اور ہر کام میں نرمی کو پسند کرتا ہے۔“ [معجم صغير للطبراني/كِتَابُ الرِّقَاقِ/حدیث: 1004]