سیدہ عائشہ رضی اللہ عنہا سے روایت ہے کہ وہ اپنے ساتھ آب زمزم اٹھا کر لے جاتی تھیں اور کہتی تھیں کہ رسول اللہ صلی اللہ علیہ وسلم بھی برتنوں اور مشکیزوں میں زمزم کا پانی لے جاتے تھے اور مریضوں پر ڈالتے اور ان کو پلاتے تھے۔ [سلسله احاديث صحيحه/الحج والعمرة/حدیث: 1030]

بھز بن حکیم اپنے باپ سے اور وہ ان کے دادا سیدنا معاویہ بن حیدہ رضی اللہ عنہ سے روایت کرتے ہیں کہ رسول اللہ صلی اللہ علیہ وسلم نے فرمایا: ”اللہ تعالیٰ بیری کاٹنے والے کو جہنم میں نیچا کرے گا۔“ [سلسله احاديث صحيحه/الحج والعمرة/حدیث: 1031]

سیدنا عبداللہ بن حبشی رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”جس نے بیری کاٹی، اللہ تعالیٰ اس کو آگ میں جھکائے گا۔“ آپ کی مراد حرم کی بیری تھی۔ [سلسله احاديث صحيحه/الحج والعمرة/حدیث: 1032]

سیدنا عبداللہ بن عباس رضی اللہ عنہما کہتے ہیں: جب آپ صلی اللہ علیہ وسلم جمرہ عقبیٰ کو کنکریاں مارتے تو چلے جاتے اور وہاں نہ ٹھہرتے۔“ [سلسله احاديث صحيحه/الحج والعمرة/حدیث: 1033]

سیدنا عبداللہ بن عمر رضی اللہ عنہما سے مروی ہے کہ نبی کریم صلی اللہ علیہ وسلم نے یوم الترویہ سے ایک دن پہلے لوگوں سے خطاب کیا اور ان کو مناسک حج سے آگاہ کیا۔ [سلسله احاديث صحيحه/الحج والعمرة/حدیث: 1034]

سیدنا عثمان رضی اللہ عنہ سے روایت ہے کہ نبی کریم صلی اللہ علیہ وسلم احرام کی حالت میں اپنا چہرہ ڈھانپ بھی لیا کرتے تھے۔ [سلسله احاديث صحيحه/الحج والعمرة/حدیث: 1035]

سیدنا عبداللہ بن عباس رضی اللہ عنہما سے مروی ہے کہ آپ صلی اللہ علیہ وسلم منیٰ کی راتوں کے دوران ہر رات کو بیت اللہ کی زیارت کرتے تھے۔ [سلسله احاديث صحيحه/الحج والعمرة/حدیث: 1036]

سیدنا عبداللہ بن عمرو رضی اللہ عنہ بیان کرتے ہیں کہ نبی کریم صلی اللہ علیہ وسلم دوران طواف اپنا سینہ، چہرہ اور دونوں بازو اور دنوں ہتھیلیاں رکن اور دروازے کے درمیان رکھتے تھے۔ [سلسله احاديث صحيحه/الحج والعمرة/حدیث: 1037]

سیدنا جابر بن عبداللہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”مکہ کی تمام گلیاں راستہ اور قربان گاہ ہیں۔“ [سلسله احاديث صحيحه/الحج والعمرة/حدیث: 1038]

سیدنا جابر رضی اللہ عنہ کہتے ہیں ہم رسول اللہ صلی علیہ وسلم کے عہد میں قربانی کا گوشت بطور زاد راہ رکھ لیتے اور مدینہ منورہ تک ہمارے پاس رہتا۔ [سلسله احاديث صحيحه/الحج والعمرة/حدیث: 1039]