1

فوائد ومسائل:
(۱)حضرت ابن عمر رضی اللہ عنہما نے اسلام کے ابتدائی دور کا تذکرہ فرمایا کہ رسول اکرم صلی اللہ علیہ وسلم کی زندگی میں اس قدر ایثار و جذبہ اور زہد تھا کہ مسلمان مال کو کوئی اہمیت نہیں دیتے تھے۔ وہ مسلمانوں کی ضرورت پورا کرنا اپنی سعادت سمجھتے تھے۔ ان کے نزدیک ان کی دولت میں دوسرے مسلمان برابر کے شریک تھے۔ اس کی روشن مثال انصار کا وہ رویہ ہے جو انہوں نے اپنے مہاجر بھائیوں کے ساتھ برتا کہ انہیں اپنے مالوں میں برابر کا شریک قرار دے لیا اور خود بھوکے رہ کر دوسروں کی ضرورت کو پورا کرنا بھی اسی زریں دور کی طرزِ عمل ہے۔
وقت گزرنے کے ساتھ ساتھ دولت کی فراوانی ہوتی چلی گئی اور اس کی محبت بھی لوگوں کے دلوں میں پیدا ہونے لگی اور لوگوں کو اپنی ضرورتیں دوسروں کی ضرورتوں سے عزیز لگنے لگیں۔ جذبہ خیر خواہی رفتہ رفتہ کم ہوتا چلا گیا اور ابن عمر رضی اللہ عنہما کے دور ہی میں وہ جذبہ ایثار نظر نہیں آتا تھا جو اوائل دور میں تھا۔
(۲) ابن عمر رضی اللہ عنہما نے رسول اکرم صلی اللہ علیہ وسلم اور اپنے دور کا موازنہ کیا تو یہ تأثر دیا جبکہ ان کے دور میں بھی بہت خیر اور بھلائی تھی۔ اگر وہ ہمارا دور دیکھ لیتے، جب ہر مسلمان جذبہ خیر خواہی سے عاری ہوچکا ہے اور دوسرے کا مال بھی ہتھیانے کی کوشش میں ہے، تو ان کا تأثر کیا ہوتا۔ اللہ کے حضور دعا کرنی چاہیے کہ وہ مال و دولت کی ہوس سے محفوظ رکھے۔
(۳) اس میں پڑوسی کے ساتھ حسن سلوک کی تاکید ہے کیونکہ جس طرح رشتہ داروں کے حقوق اور صلہ رحمی کے متعلق باز پرس ہوگی اسی طرح ہمسایوں کے متعلق بھی باز پرس ہوگی۔ رشتہ داروں کی طرح اگر پڑوسی بھی زیادتی کریں تو ان سے حسن سلوک ہی کا حکم ہے کیونکہ زیادتی کرنے والے سے حسن سلوک ہی دراصل نیکی ہے۔