1749. حضرت عبدالرحمان بن یزید سے روایت ہے، انھوں نے حضرت عبداللہ بن مسعود ؓ کے ساتھ حج کیا تو دیکھا کہ انھوں نے بیت اللہ کو بائیں جانب اور منیٰ کو دائیں جانب کرکے جمرہ کبریٰ کو سات کنکریاں ماریں، پھر فرمایا: یہ اس ستودہ صفات ﷺ کے کھڑے ہونے کی جگہ ہے جن پر سورہ بقرہ نازل ہوئی تھی۔ [صحيح بخاري، حديث نمبر:1749]

حدیث حاشیہ:
قسطلانی نے کہا کہ یہ دسویں تاریخ کی رمی ہے گیارہویں بارہویں تاریخ کو اوپر سے مارنا چاہئے اور جمرہ عقبہ جس کو آج کل عوام بڑا شیطان کہتے ہیں چار باتوں میں اور جمرات سے بہتر ہے، ایک تو یہ کہ یوم النحر کو فقط اسی کی رمی ہے دوسرے یہ کہ اس کی رمی چاشت کے وقت ہے، تیسرے یہ کہ نشیب میں اس کو مارنا ہے، چوتھے یہ کہ دعا وغیرہ کے لیے اس کے پاس نہیں ٹھہرنا چاہئے اور دوسرے جمروں کے پاس رمی کے بعد ٹھہر کر دعا کرنا مستحب ہے۔
جمرات کی رمی کرنا یہ اس وقت کی یادگار ہے جب کہ حضرت اسماعیل ؑ کو بہکانے کے لیے ان مقامات پر شیطان ظاہر ہوا تھا اور حضرت اسماعیل ؑ کو ارشاد الٰہی کی تعمیل سے روکنے کی کوشش کی تھی۔
ان تینوں مقامات پر بطور نشان پتھروں کے مینارے سے بنا دئے گئے ہیں اور ان ہی پرمقررہ شرائط کے ساتھ کنکریاں مار کر گویا شیطان مردود کو رجم کیا جاتا ہے اور حاجی گویا اس بات کا عہد کرتا ہے کہ وہ شیطان مردود کی مخالفت اور ارشاد الٰہی کی اطاعت میں پیش پیش رہے گا اور تاعمر اس یادگار کو فراموش نہ کرکے اپنے آپ کو ملت ابراہیمی کا سچا پیرو کار ثابت کرنے کی کوشش کرے گا۔
جمرہ عقبہ کو جمرہ کبریٰ بھی کہتے ہیں اور یہ جہت مکہ میں منی کی آخری حد پر واقع ہے۔
آپ ﷺ نے ہجرت کے لیے انصار سے اسی جگہ بیعت لی تھی۔
حضرت عبداللہ بن مسعود ؓ جمرہ عقبہ کی رمی سے فارغ ہو کر یہ دعا پڑھا کرتے تھے۔
اللهم اجعله حجا مبروراً و ذنبا مغفوراً۔

1749. حضرت عبدالرحمان بن یزید سے روایت ہے، انھوں نے حضرت عبداللہ بن مسعود ؓ کے ساتھ حج کیا تو دیکھا کہ انھوں نے بیت اللہ کو بائیں جانب اور منیٰ کو دائیں جانب کرکے جمرہ کبریٰ کو سات کنکریاں ماریں، پھر فرمایا: یہ اس ستودہ صفات ﷺ کے کھڑے ہونے کی جگہ ہے جن پر سورہ بقرہ نازل ہوئی تھی۔ [صحيح بخاري، حديث نمبر:1749]

حدیث حاشیہ:
(1)
جمرۂ عقبہ کو جمرۂ کبریٰ بھی کہتے ہیں۔
منیٰ میں تین جمرات ہیں جنہیں رمی کی جاتی ہے۔
ان تینوں مقامات پر بطور نشانات مینارے بنا دیے گئے ہیں۔
انہیں مقررہ شرائط کے ساتھ کنکریاں مار کر گویا شیطان مردود کو رجم کیا جاتا ہے اور اس بات کا عہد کیا جاتا ہے کہ ہم آئندہ زندگی میں شیطان مردود کی مخالفت اور احکام الٰہی کی اطاعت میں پیش پیش رہیں گے۔
(2)
جمرۂ عقبہ مکہ کی طرف منیٰ کی آخری حد پر واقع ہے۔
رسول اللہ ﷺ نے اسے رمی کرتے وقت مکہ مکرمہ کو بائیں جانب اور منیٰ کو دائیں جانب کیا تھا۔
رمی کرنے کا مسنون طریقہ یہی ہے، البتہ جائز ہے کہ مکہ مکرمہ کو پچھلی جانب اور منیٰ کو آگے کر کے رمی کی جائے۔
اسی طرح بیت اللہ کی طرف منہ کر کے اور منیٰ کو اپنی پچھلی جانب کر کے بھی رمی کی جا سکتی ہے۔
اس کے علاوہ یہ بات بھی مدنظر رہے کہ رمی کرنا ضروری ہے، وہاں کنکر رکھ دینے سے کام نہیں چلے گا۔
واللہ أعلم