2986. حضرت انس ؓسے روایت ہے، انھوں نے کہا: میں حضرت ابو طلحہ ؓ کی سواری پر ان کے پیچھے بیٹھا ہوا تھا۔ میں نے دیکھا کہ لوگ حج اور عمرہ دونوں کا ایک ساتھ تلبیہ کہہ رہے تھے۔ [صحيح بخاري، حديث نمبر:2986]

حدیث حاشیہ:
1۔
یہ حدیث کئی مرتبہ پہلے گزر چکی ہے۔
امام بخاری ؒنے اس سے متعدد مسائل اخذ کیے ہیں۔
اس موقع پر بیان کرنے کا مقصد یہ ہے کہ دوران سفر میں آدمی کو سواری پراپنے پیچھے بٹھانے میں کوئی حرج نہیں۔
اگرچہ مذکورہ سفر حج کے لیےتھا تاہم دیگر مواقع کو اس پر قیاس کیا جا سکتا ہے۔
2۔
سواری کا جانور اگر طاقتور ہو تو تین آدمی بھی اس پر سوار ہو سکتے ہیں۔