´دف بجا کر اور بلند آواز سے نکاح کا اعلان۔`
محمد بن حاطب رضی الله عنہ کہتے ہیں کہ رسول اللہ صلی اللہ علیہ وسلم نے فرمایا: ”حلال و حرام (نکاح) میں تمیز پیدا کرنے والی چیز آواز ہے“ ۱؎۔ [سنن نسائي/كتاب النكاح/حدیث: 3372]

اردو حاشہ:
آواز سے مراد نکاح کا اعلان یا گیت اور دف کی آواز ہے۔ چونکہ خاوند‘ بیوی نے باقی ساری زندگی اکٹھے گزارنی ہے‘ لہٰذا کم از کم محلے والے سب لوگوں کو پتہ چل جانا چاہیے کہ فلاں کا فلاں سے نکاح ہوا ہے تاکہ بعد میں آنے جانے پر کسی کو اعتراض نہ ہو بلکہ رشتے کی محبت پیدا ہو۔

´نکاح کے اعلان کرنے کا بیان۔`
محمد بن حاطب رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا: ”حلال اور حرام میں فرق یہ ہے کہ نکاح میں دف بجایا جائے، اور اس کا اعلان کیا جائے“ ۱؎۔ [سنن ابن ماجه/كتاب النكاح/حدیث: 1896]

اردو حاشہ:
فوائد و مسائل:
(1)
ازدواجی تعلقات قائم کرنے کا شرعی طریقہ نکاح کا ہے۔
اس میں عام لوگوں کو معلوم ہوتا ہے کہ فلاں کا فلاں سے نکاح ہوا ہے جب کہ ناجائز تعلقات خفیہ طور پر قائم کیے جاتے ہیں اور کوشش کی جاتی ہے کہ لوگوں کو ان تعلقات کا علم نہ ہونے پائے۔
نکاح میں گواہ مقرر کرنے کا یہی مقصد ہے۔

(2)
شادی کے موقع پر دف بجانے کا بھی یہی مقصد ہے کہ سب لوگوں کو شادی کا علم ہو جائے۔
اس موقع پر گیت وغیرہ بھی گائے جا سکتے ہیں بشرطیکہ ان کے الفاظ شریعت کی تعلیمات کے منافی نہ ہوں۔
اور گانے والیاں نابالغ بچیاں ہوں۔
خوشی کے اسی انداز سے اظہار عید کے ایام میں بھی جائز ہے۔

(3)
دف ڈھول سے ملتی جلتی ایک چیز ہے۔
جس میں صرف ایک طرف چمڑا لگا ہوتا ہے جبکہ ڈھول میں دونوں طرف چمڑا لگا ہوتا ہے، اس لیے دف کی آواز اتنی زیادہ بلند اور خوش کن نہیں ہوتی۔

(4)
بعض لوگ دف کے جواز سے ہر قسم کے راگ رنگ کا جواز ثابت کرنے کی کوشش کرتے ہیں۔
یہ استدلال درست نہیں۔
رسول اللہ ﷺ نے دف کی اجازت دینے کے باوجود خود اس میں دلچسپی نہیں لی۔ (صحیح البخاري، العیدین، باب الحراب والدرق یوم العید، حدیث: 949)

´نکاح کے اعلان کا بیان۔`
محمد بن حاطب جمحی رضی الله عنہ کہتے ہیں کہ رسول اللہ صلی اللہ علیہ وسلم نے فرمایا: ”حرام اور حلال (نکاح) کے درمیان فرق صرف دف بجانے اور اعلان کرنے کا ہے“ ۱؎۔ [سنن ترمذي/كتاب النكاح/حدیث: 1088]

اردو حاشہ:
وضاحت:
1؎:
اس حدیث سے معلوم ہواکہ نکاح اعلانیہ کیا جاناچاہئے،
خفیہ طورپر چوری چھپے نہیں،
اس لیے کہ اعلانیہ نکاح کرنے پرکسی کو میاں بیوی کے تعلقات پر انگلی اٹھانے کا موقع نہیں ملتا۔
عموماً یہی دیکھنے میں آتا ہے کہ غلط نکاح ہی چھپ کر کیا جاتاہے۔