6206. حضرت ابو ہریرہ ؓ ہی سے روایت ہے، وہ رسول اللہ ﷺ سے بیان کرتے ہیں کہ آپ نے فرمایا: ”اللہ کے نزدیک سب ست بد ترین نام اس شخص کا ہوگا جو اپنا نام ملک الاملاک رکھے گا۔“ سفیان بیان کرتے ہیں کہ ابو الزناد کے غیر نے کہا: ملک الاملاک کا مفہوم شاہان شاہ ہے۔ [صحيح بخاري، حديث نمبر:6206]

حدیث حاشیہ:
فی الحقیقت شہنشاہ پروردگار ہے بندے شہنشاہ نہیں ہو سکتے جو لوگ اپنے کو شہنشاہ کہلاتے ہیں اللہ کے نزدیک وہ نہایت ہی حقیر اور گندے بندے ہیں، اسی لئے آج کے جمہوری دور میں اب کوئی شہنشاہ نہیں رہا۔
اللہ نے سب کو نابود کر دیا۔
آج سب ایک سطح پر ہیں مگر آج کل ان کی جگہ ممبران پارلیمنٹ واسمبلی نے لے رکھی ہے۔
إلا ما شاءاللہ۔

6206. حضرت ابو ہریرہ ؓ ہی سے روایت ہے، وہ رسول اللہ ﷺ سے بیان کرتے ہیں کہ آپ نے فرمایا: ”اللہ کے نزدیک سب ست بد ترین نام اس شخص کا ہوگا جو اپنا نام ملک الاملاک رکھے گا۔“ سفیان بیان کرتے ہیں کہ ابو الزناد کے غیر نے کہا: ملک الاملاک کا مفہوم شاہان شاہ ہے۔ [صحيح بخاري، حديث نمبر:6206]

حدیث حاشیہ:
(1)
اصل ملک الاملاک، یعنی شاہان شاہ اللہ تعالیٰ کی ذات گرامی ہے اور جو لوگ خود کو شہنشاہ کہلاتے ہیں وہ اللہ کے نزدیک انتہائی حقیر ہیں۔
اسی طرح اس نام کا ہم معنی نام بھی حرام ہے جیسے کسی کا نام احکم الحاکمین، سلطان السلاطین یا امیر الامراء رکھ دیا جائے۔
(2)
علمائے کرام نے مندرجہ بالا ترکیب کے اعتبار سے ''قاضی القضاۃ'' کہنے کہلانے کو بھی ناجائز کہا ہے اگرچہ کچھ اہل علم اس کے متعلق نرم گوشہ رکھتے ہیں۔
واللہ أعلم