´امام کے بیٹھ کر نماز پڑھانے کا بیان۔`
اسید بن حضیر رضی اللہ عنہ کہتے ہیں کہ وہ اپنی قوم کی امامت کرتے تھے، وہ کہتے ہیں کہ ایک بار رسول اللہ صلی اللہ علیہ وسلم ان کی عیادت کے لیے تشریف لائے، تو لوگ کہنے لگے: اللہ کے رسول! ہمارے امام بیمار ہیں، تو آپ صلی اللہ علیہ وسلم نے فرمایا: ”جب امام بیٹھ کر نماز پڑھے تو تم لوگ بھی بیٹھ کر پڑھو۔‏‏‏‏“ ابوداؤد کہتے ہیں: یہ حدیث متصل نہیں ہے۔ [سنن ابي داود/كتاب الصلاة /حدیث: 607]

607۔ اردو حاشیہ:
➊ شیخ البانی رحمہ اللہ کے نزدیک یہ حدیث صحیح ہے لیکن یہ اور اس مفہوم کی دیگر احادیث اوائل دور کی ہیں، جس میں یہی حکم تھا کہ امام و مقتدی کھڑے ہونے یا بیٹھنے کی صورت یکساں ہوں۔ مگر نبی کریم صلی اللہ علیہ وسلم کی آخری نماز میں جو آپ صلی اللہ علیہ وسلم نے بیٹھ کر پڑھائی اس میں صحابہ کرام رضوان اللہ عنہم اجمعین کھڑے ہوئے تھے، تو وہ ان کی ناسخ ہے۔
➋ نبی صلی اللہ علیہ وسلم بشری عوارض سے دو چار ہوتے رہتے تھے۔
➌ نماز میں مقتدی کو انتقال ارکان میں امام سے پیچھے پیچھے رہنا واجب ہے، وہ کسی بھی رکن میں امام سے پہل نہ کریں۔