1494. حضرت ام عطیہ انصاریہ ؓ سے روایت ہے انھوں نے کہا:ایک دفعہ نبی کریم ﷺ حضر ت عائشہ ؓ کے ہاں تشریف لائے تو فرمایا:”تمہارے پاس کچھ (کھانے کے لیے) ہے؟“ انھوں نے عرض کیا:کچھ نہیں، البتہ صدقے کی اس بکری کا گوشت موجود ہے جو آپ نے حضرت نسیبہ کو بھیجی تھی، اس نے گوشت ہمیں بھیجا ہے۔ آپ ﷺ نے فرمایا:”(لاؤ) وہ تو اپنے مقام پر پہنچ چکی ہے۔“ [صحيح بخاري، حديث نمبر:1494]

حدیث حاشیہ:
معلوم ہوا کہ صدقہ کا مال بایں طور اغنیاء کی تحویل میں بھی آسکتا ہے۔
کیونکہ یہ محتاج آدمی کی ملکیت میں ہوکر اب کسی کو بھی مسکین کی طرف سے دیا جاسکتا ہے۔

1494. حضرت ام عطیہ انصاریہ ؓ سے روایت ہے انھوں نے کہا:ایک دفعہ نبی کریم ﷺ حضر ت عائشہ ؓ کے ہاں تشریف لائے تو فرمایا:”تمہارے پاس کچھ (کھانے کے لیے) ہے؟“ انھوں نے عرض کیا:کچھ نہیں، البتہ صدقے کی اس بکری کا گوشت موجود ہے جو آپ نے حضرت نسیبہ کو بھیجی تھی، اس نے گوشت ہمیں بھیجا ہے۔ آپ ﷺ نے فرمایا:”(لاؤ) وہ تو اپنے مقام پر پہنچ چکی ہے۔“ [صحيح بخاري، حديث نمبر:1494]

حدیث حاشیہ:
(1)
رسول اللہ ﷺ نے حضرت ام عطیہ، یعنی نسیبہ ؓ کو صدقے کی بکری بھیجی تھی، اس نے اس گوشت سے کچھ حضرت عائشہ ؓ کو بطور ہدیہ بھیجا تھا، جب ام عطیہ نے اس صدقے کو قبول کر لیا تو وہ اس کی ملک ہو گیا، اب وہ صدقہ نہ رہا، اس لیے اب رسول اللہ ﷺ کے لیے اس کا استعمال کرنا جائز تھا، اس لیے آپ نے فرمایا کہ وہ تو اپنے مقام پر پہنچ چکا ہے۔
(2)
اس حدیث سے معلوم ہوا کہ صدقہ قبول کرنے والا اگر مرضی سے صدقے کے مال میں سے غنی یا ہاشمی کو کچھ دے تو غنی اور ہاشمی کے لیے اس کا لینا جائز ہے کیونکہ اب وہ صدقے کے مفہوم سے نکل چکا ہے اور اسے خریدنا، فروخت کرنا، کسی کو ہبہ کرنا یا ہدیہ دینا جائز ہے۔
واللہ أعلم