´عورت اور غلام کو مال غنیمت سے کچھ دینے کا بیان۔`
یزید بن ہرمز کہتے ہیں کہ نجدہ حروری نے ابن عباس رضی اللہ عنہما کو لکھا، وہ عورتوں کے متعلق آپ سے پوچھ رہا تھا کہ کیا وہ رسول اللہ صلی اللہ علیہ وسلم کے ساتھ جنگ میں جایا کرتی تھیں؟ اور کیا آپ ان کے لیے حصہ متعین کرتے تھے؟ عبداللہ بن عباس رضی اللہ عنہما کا خط میں نے ہی نجدہ کو لکھا کہ وہ رسول اللہ صلی اللہ علیہ وسلم کے ساتھ جنگ میں حاضر ہوتی تھیں، رہی ان کے لیے حصہ کی بات تو ان کا کوئی حصہ مقرر نہیں ہوتا تھا البتہ انہیں کچھ دے دیا جاتا تھا۔ [سنن ابي داود/كتاب الجهاد /حدیث: 2728]

فوائد ومسائل:
1۔
عورتوں اور دیگر خدمت کاروں کئے لئے غنیمت میں باقاعدہ حصہ نہیں ہے۔
مگر ان کی خدمت کی مساسبت سے معقول انعام واکرام ضرور دیا جائے۔

2۔
اس سے یہ بات واضح ہوئی کہ عورتوں نے ایک فوجی اور مجاہدین کی حیثیت سے شرکت نہیں کی تھی۔
اگرایسا ہوتا تو انہیں غنیمت میں سے پورا حصہ دیا جاتا۔
ان کی حیثیت خدمت گار کی سی تھی۔
اور بھی پس پردہ رہ کر۔

3۔
اس سے زندگی کے ہر شعبے میں مرد وزن کی مغربی مساوات کا ہرگز اثبات نہیں ہوتا، جیساکہ بعض مغرب زدہ حضرات کرتے ہیں۔