´امام کی ذمہ داری کیا ہے؟`
ابوحازم کہتے ہیں کہ سہل بن سعد ساعدی رضی اللہ عنہ اپنی قوم کے جوانوں کو آگے بڑھاتے وہی لوگوں کو نماز پڑھاتے، کسی نے سہل رضی اللہ عنہ سے کہا: آپ جوانوں کو نماز کے لیے آگے بڑھاتے ہیں، حالانکہ آپ کو سبقت اسلام کا بلند رتبہ حاصل ہے؟ انہوں نے کہا: میں نے رسول اللہ صلی اللہ علیہ وسلم کو فرماتے سنا: ”امام (مقتدیوں کی نماز کا) ضامن ہے، اگر وہ اچھی طرح نماز پڑھائے تو اس کے لیے بھی ثواب ہے اور مقتدیوں کے لیے بھی، اور اگر خراب طریقے سے پڑھائے تو اس پر گناہ ہے لوگوں پر نہیں“ ۱؎۔ [سنن ابن ماجه/كتاب إقامة الصلاة والسنة/حدیث: 981]

اردو حاشہ:
فوائد و مسائل:
(1)
امامت ایک بھاری ذمہ داری ہے۔
امام کو اس کا احساس کرنا چاہیے۔

(2)
تربیت کے لئے نوجوانوں کوامام بنایا جاسکتا ہے۔

(3)
افضل فرد کی موجودگی میں غیر افضل کی اقتداء میں نماز درست ہے۔

(4)
اگر ایک شخص ذمے داری کا اہل ہونے کے باجود تواضعاً وہ ذمے داری نہ اٹھائے۔
جب کہ اس کام کے اہل دوسرے افراد موجود ہوں تو جائز ہے۔

(5)
امام کی غلطی کی ذمہ داری مقتدیوں پر نہیں۔
تاہم اگر وہ اہلیت رکھنے والے کو چھوڑ کر ایسے شخص کو امام بنایئں گے۔
جو اس منصب کا اہل نہیں تو نا اہل امام کے تعین کی ذمہ دااری ان پر ہوگی۔

(6)
مذکورہ روایت سنداً ضعیف ہے۔
جیسا کہ ہمارے فاضل محقق نے لکھا ہے۔
لیکن دیگر شواہد کی بنا پر متناً و معناً صحیح ہے۔
غالباً اسی بنا پر شیخ البانی رحمۃ اللہ علیہ اور دکتور بشارعواد نے اسے صحیح قرار دیا ہے۔
تفصیل کےلئے دیکھئے: (الصحیحة، رقم: 1767 وسنن ابن ماجه بتحقیق دکتور بشارعواد، رقم: 981)