´نوحہ (میت پر چلا کر رونا) منع ہے۔`
عبداللہ بن عباس رضی اللہ عنہما کہتے ہیں کہ رسول اللہ صلی اللہ علیہ وسلم نے فرمایا: ”میت پر نوحہ کرنا جاہلیت کا کام ہے، اگر نوحہ کرنے والی عورت توبہ کرنے سے پہلے مر جائے، تو وہ قیامت کے دن اس حال میں اٹھائی جائے گی کہ تارکول کی قمیص پہنے ہو گی، اور اس کو اوپر سے جہنم کی آگ کے شعلوں کی ایک قمیص پہنا دی جائے گی۔‏‏‏‏“ [سنن ابن ماجه/كتاب الجنائز/حدیث: 1582]

اردو حاشہ:
فائدہ:
یہ حکم عورت کےلئے خاص نہیں بلکہ مرد بھی اگر اس جرم کا ارتکاب کرے گا۔
تو قیامت کے دن اسے بھی یہی سزا ملے گی۔
حدیث میں عورت کا ذکر اس لئے کیا گیا ہے۔
کہ عرب میں عورتیں ہی نوحہ کرتی تھیں۔
ارشاد نبوی ﷺ ہے۔
 ”جوشخص رخساروں پرتھپڑ مارے گریبان چاک کرے اور جاہلیت کی طرح پکارے (نوحہ کرے)
وہ ہم میں سے نہیں“ (صحیح البخاري، الجنائز، باب لیس منا من ضرب الخدود، حدیث: 1297 وسنن ابن ماجة، حدیث: 1584)
 اس میں مرد بھی شامل ہیں۔