´جانور پالنے کا بیان۔`
عروہ بارقی رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا: ”اونٹ ان کے مالکوں کے لیے قوت کی چیز ہے، اور بکریاں باعث برکت ہیں، اور گھوڑوں کی پیشانیوں میں قیامت تک کے لیے بھلائی بندھی ہے۔‏‏‏‏“ [سنن ابن ماجه/كتاب التجارات/حدیث: 2305]

اردو حاشہ:
فوائد و مسائل:
(1)
اونٹ کے فوائد بہت زیادہ ہیں، خاص طورپر صحرائی علاقوں میں اس کی اہمیت آج بھی قائم ہے۔

(2)
بکریاں زیادہ بچے دیتی ہیں اور وہ جلد بڑے ہو جاتے ہیں۔
اور وہ ہر قسم کی چارہ اور درختوں کے پتے وغیرہ کھا لیتی ہیں، اس لیے انہیں باعث برکت قرار دیا گیا ہے۔

(3)
گھوڑوں کی برکت کی وضاحت دوسری حدیث میں”ثواب اور غنیمت“ سے کی گئی ہے، یعنی یہ جہاد میں کام آنے والے ہیں۔ دیکھیے: (صحیح البخاري، الجھاد والسیر، باب:
الجھاد ماض مع البر والفاجر، حدیث: 2852)

(4)
جانور پالنا حلال روزی کا ایک ذریعہ ہے۔