´صدقہ کئے ہوئے مال کے وارث ہونے کا بیان۔`
عبداللہ بن عمرو بن العاص رضی اللہ عنہما کہتے ہیں کہ ایک شخص نبی اکرم صلی اللہ علیہ وسلم کی خدمت میں آیا اور عرض کیا: میں نے اپنی ماں کو ایک باغ دیا تھا، اور وہ مر گئیں، اور میرے سوا ان کا کوئی اور وارث نہیں؟ تو آپ صلی اللہ علیہ وسلم نے فرمایا: ”تمہیں تمہارے صدقہ کا ثواب مل گیا، اور تمہارا باغ بھی تمہیں واپس مل گیا۔‏‏‏‏“ [سنن ابن ماجه/كتاب الصدقات/حدیث: 2395]

اردو حاشہ:
فوائد و مسائل:
(1)
ماں باپ کو صدقہ دیا جا سکتا ہے۔

(2)
ماں باپ کوصدقے میں دی ہوئی چیز اگر ترکہ بن کرصدقہ کرنے والے کومل جائے تو یہ صدقہ واپس لینے میں شامل نہیں کیونکہ وفات اوراستحقاق میراث میں انسان کےارادہ کوشش کو داخل نہیں۔

(3)
مندرجہ بالا صورت میں صدقے کا ثواب ختم نہیں ہوگا۔