4719. حضرت جابر بن عبداللہ ؓ سے روایت ہے کہ رسول اللہ ﷺ نے فرمایا: ”جو شخص اذان سن کر یہ دعا پڑھے: اللهم رب هذهِ الدَعوةِ۔۔۔ ”اے اس مکمل پکار کے مالک اور قائم ہونے والی نماز کے رب! تو محمد ﷺ کو مقام وسیلہ عطا فرما اور خاص فضیلت دے اور انہیں مقام محمود پر فائز فر جس کا تو نے ان سے وعدہ کیا ہے۔“ تو اسے قیامت کے دن میری سفارش نصیب ہو گی۔“ اس حدیث کو حمزہ بن عبداللہ نے بھی اپنے والد سے روایت کیا ہے، انہوں نے نبی ﷺ سے اسے بیان کیا ہے۔ [صحيح بخاري، حديث نمبر:4719]

حدیث حاشیہ:
اس کو اسماعیلی نے وصل کیا ہے۔
ایک روایت میں یوں ہے کہ مقام محمود سے یہ مراد ہے کہ اللہ تعالیٰ آنحضرت صلی اللہ علیہ وسلم کو اپنے پاس عرش پر بٹھائے گا۔
ایسی حدیثوں سے جہمیوں کی جان نکلتی ہے اور اہلحدیث کی روح تازہ ہوتی ہے۔
(وحیدی)
مقام محمود سے شفاعت کا منصب اور مقام بھی مراد لیا گیا ہے اور فردوس بریں میں آپ کا وہ محل بھی مراد ہے جو سب سے اعلیٰ وارفع خاص طور پر آپ کے لئے تیار کیا گیا ہے۔
الغرض مقام محمود ایک جامع لفظ ہے۔
عالم ظاہر و باطن میں اللہ نے اپنے حبیب صلی اللہ علیہ وسلم کو بہت سے درجات عالیہ عطا فرمائے ہیں۔
آنچہ خوباں ہمہ دارند تو تنہا داری۔
یا اللہ! موت کے بعد اپنے حبیب صلی اللہ علیہ وسلم سے ملاقات نصیب فرما ئیو اور قیامت کے دن آپ کی شفاعت سے نہ صرف مجھ کو بلکہ بخاری شریف پڑھنے والے سب مسلمان مردوں عورتوں کو سرفراز فرمائیو (آمین)

4719. حضرت جابر بن عبداللہ ؓ سے روایت ہے کہ رسول اللہ ﷺ نے فرمایا: ”جو شخص اذان سن کر یہ دعا پڑھے: اللهم رب هذهِ الدَعوةِ۔۔۔ ”اے اس مکمل پکار کے مالک اور قائم ہونے والی نماز کے رب! تو محمد ﷺ کو مقام وسیلہ عطا فرما اور خاص فضیلت دے اور انہیں مقام محمود پر فائز فر جس کا تو نے ان سے وعدہ کیا ہے۔“ تو اسے قیامت کے دن میری سفارش نصیب ہو گی۔“ اس حدیث کو حمزہ بن عبداللہ نے بھی اپنے والد سے روایت کیا ہے، انہوں نے نبی ﷺ سے اسے بیان کیا ہے۔ [صحيح بخاري، حديث نمبر:4719]

حدیث حاشیہ:
1۔
پہلی حدیث مختصر طور پر بیان ہوئی ہے۔
تفصیل یہ ہے کہ لوگ پہلے حضرت آدم علیہ السلام کے پاس جائیں گے۔
ان کے بعد پھر باری باری دیگر انبیاء علیہ السلام سے سفارش کی التجا کریں گے مگر ہر نبی اپنی کوئی نہ کوئی تقصیر یاد کر کے معذرت کر دے گا۔
بالآخر سب لوگ رسول اللہ صلی اللہ علیہ وسلم کے پاس حاضر ہوں گے تو آپ لوگوں کی التجا کے پیش نظر اللہ تعالیٰ کے حضور ان کی سفارش کریں گے۔
مقام شفاعت ہی کو مقام محمود کہا گیا ہے جیسا کہ خود رسول اللہ صلی اللہ علیہ وسلم نے وضاحت فرمائی ہے، چنانچہ حضرت عبداللہ بن مسعود رضی اللہ تعالیٰ عنہ کہتے ہیں کہ کسی نے رسول اللہ صلی اللہ علیہ وسلم سے مقام محمود کے متعلق سوال کیا تو آپ نے فرمایا:
”اس سے مراد مقام شفاعت ہے۔
“ (جامع الترمذي، تفسیر القرآن، حدیث: 3137)
2۔
اس وقت سب لوگوں کی زبان پر آپ کی حمد و ستائش جاری ہوجائے گی، جیساکہ ایک حدیث میں اس کی صراحت ہے۔
رسول اللہ صلی اللہ علیہ وسلم لوگوں کے درمیان فیصلہ کرنے کی اللہ تعالیٰ سے سفارش کریں گے۔
آپ چلیں گے اورجنت کے دروازے کا حلقہ پکڑ لیں گے۔
اس وقت اللہ تعالیٰ آپ کو مقام محمود پر فائز کرے گا۔
اہل محشر سب کےسب آپ کی تعریف کرنے لگیں گے۔
(صحیح البخاري، الزکاة، حدیث: 1475)