4763. حضرت سعید بن جبیر سے روایت ہے، انہوں نے کہا: اہل کوفہ کا مومن کو جان بوجھ کر قتل کرنے کے متعلق اختلاف ہوا تو میں سفر کر کے حضرت ابن عباس ؓ کی خدمت میں حاضر ہوا۔ انہوں نے فرمایا: یہ آیت (سورہ نساء والی) اس سلسلے میں سب سے آخر میں نازل ہوئی ہے اور اس کو کسی آیت نے منسوخ نہیں کیا۔ [صحيح بخاري، حديث نمبر:4763]

حدیث حاشیہ:
حضرت ابن عباس رضی اللہ تعالیٰ عنہ نے سورہ نساء کی جس آیت کا حوالہ دیا ہے وہ حسب ذیل ہے:
”جو کسی مومن کو جان بوجھ کر قتل کرڈالے تو اس کی سزا دوزخ ہے، جس میں وہ ہمیشہ رہے گا۔
اس پر اللہ کا غضب ہے۔
اس پر اللہ تعالیٰ نے لعنت کی ہے اور اس کے لیے بہت بڑا عذاب تیار کر رکھا ہے۔
“ (النساء: 93/4)
اس موقف پر ہم پہلے وضاحت کر آئے ہیں۔