7175. سیدنا عبداللہ بن عمر ؓ سے روایت ہے، انہوں نے بتایا سیدنا ابو حذیفہ ؓ کے آزاد کردہ غلام سیدنا سالم ؓ اولین مہاجرین اور نبی ﷺ کے دوسرے صحابہ کرام کی مسجد قباء میں امامت کرتے تھے ان اصحاب میں سیدنا ابو بکر سیدنا عمر، سیدنا ابو سملہ، سیدنا زید اور سیدنا عامر بن عامر ربیعہ ؓ بھی ہوتے تھے۔ [صحيح بخاري، حديث نمبر:7175]

حدیث حاشیہ:
اس کی وجہ یہ تھی کہ سالم قرآن کے بڑے قاری تھے جب کہ دوسری حدیث میں ہے قرآن چار شخصوں سے سیکھو۔
عبداللہ بن مسعود اور سالم مولیٰ، ابوحذیفہ اور ابی بن کعب اور معاذ بن جبل رضی اللہ عنہم سے۔
ایک روایت میں ہے حضرت عائشہ رضی اللہ عنہا کہتی ہیں ایک بار میں نے آنحضرت صلی اللہ علیہ وسلم کے پاس آنے میں دیر لگائی۔
آپ نے وجہ پوچھی۔
میں نے کہا ایک قاری کو نہایت عمدہ طور سے میں نے قرآن پڑھتے سنا۔
یہ سنتے ہی آپ چادر لے کر باہر نکلے دیکھا تو وہ سالم مولیٰ ابوحذیفہ رضی اللہ عنہ ہیں۔
آپ نے فرمایا اللہ کا شکر ہے کہ اس نے میری امت میں ایسا شخص بنایا۔
سالم رضی اللہ عنہ امامت کر رہے تھے جو آزاد کردہ غلام تھے، اسی سے غلام کو حاکم یا قاضی بنانا ثابت ہوا، بشرطیکہ وہ اہلیت رکھتا ہو۔

7175. سیدنا عبداللہ بن عمر ؓ سے روایت ہے، انہوں نے بتایا سیدنا ابو حذیفہ ؓ کے آزاد کردہ غلام سیدنا سالم ؓ اولین مہاجرین اور نبی ﷺ کے دوسرے صحابہ کرام کی مسجد قباء میں امامت کرتے تھے ان اصحاب میں سیدنا ابو بکر سیدنا عمر، سیدنا ابو سملہ، سیدنا زید اور سیدنا عامر بن عامر ربیعہ ؓ بھی ہوتے تھے۔ [صحيح بخاري، حديث نمبر:7175]

حدیث حاشیہ:
1۔
ان تمام صحابہ کرام رضوان اللہ عنھم اجمعین کی موجودگی میں حضرت سالم رضی اللہ تعالیٰ عنہ امامت کا فریضہ سرانجام اس لیے دیتے تھے کہ آپ قرآن کے زیادہ حافظ اور بہترین قاری تھے۔
(صحیح البخاري، الأذان، حدیث 692)
اس حدیث سے معلوم ہوا کہ آزاد کردہ غلام کو حاکم یا قاضی بنانا جائز ہے بشرط یہ کہ اس میں اہلیت ہو، البتہ امامت کبریٰ کے لیے قریشی ہونا بنیادی شرط ہے جیسا کہ ہم پہلے بیان کرآئے ہیں۔
2۔
حضرت نافع بن عبدالحارث، حضرت عمر رضی اللہ تعالیٰ عنہ کی طرف سے مکہ کے گورنر تھے۔
ایک دفعہ وہ عسفان مقام پر ان سے ملنے آئے تو حضرت عمر رضی اللہ تعالیٰ عنہ نے ان سے پوچھا:
مکے میں تمہارا نائب کون ہے؟ انھوں نے کہا کہ ابن ابزی کو نائب بنا کر آیا ہوں۔
فرمایا:
ایک غلام کو نائب بنایا ہے؟ عرض کی:
وہ قرآن کے قاری اور علم فرائض کے عالم ہیں۔
حضرت عمر رضی اللہ تعالیٰ عنہ نے کہا:
رسول اللہ صلی اللہ علیہ وسلم کا ارشاد گرامی ہے:
”اللہ تعالیٰ قرآن کے ذریعے سے بہت سی اقوام کو بلندیوں تک پہنچا دیتا ہے اور بہت سی اقوام کو پستیوں میں گرادیتا ہے۔
“ (صحیح مسلم، صلاة المسافرین، حدیث: 1897(817)