7177. سیدنا عروہ بن زبیر سے روایت ہے انہوں مروان بن حکم اور سیدنا مسور بن مخرمہ ؓ نے بتایا کہ جب مسلمانوں نے رسول اللہ ﷺ کو ہوازن کے قیدی آزاد کر دینے کے متعلق کہا تو آپ نےفرمایا: میں نہیں جانتا کہ تم میں سے کس نے اجازت دی ہے اور کس نے نہیں دی۔ ”اب تم واپس چلے جاؤ یہاں تک کہ تمہارے نمبردار تمہارا معاملہ ہم تک پہنچائیں۔“ چنانچہ لوگ واپس چلے گئے اور ان کے درمیان ذمہ داران نے ان سے گفتگو کی۔ پھر انہوں نے آکر رسول اللہ ﷺ کو اطلاع دی کہ لوگوں نے اپنے دل کی خوشی سے اجازت دے دی ہے۔ [صحيح بخاري، حديث نمبر:7177]

حدیث حاشیہ:
مخصوص لوگوں کے منتظم اور چودھری کو عریف کہتے ہیں۔
ایک حدیث میں ہے کہ عریف،جہنم میں جائیں گے اور امراء کے لیے بھی ہلاکت ہے۔
(مسند احمد: 352/2)
اس سے مراد وہ منتظم ہیں جو حد سے گزرنے والے اور ظلم وستم ڈھانے والے ہوں۔
مطلق طور پرعرفاء قابل مذمت نہیں ہیں کیونکہ رسول اللہ صلی اللہ علیہ وسلم نے خود اس نظام کی اجازت دی ہے۔
کوئی آدمی اکیلا امور مملکت نہیں چلا سکتا،اسے نچلی سطح پرعرفاء (ناظم وغیرہ)
کی ضرورت ہے جو لوگوں کی ضروریات اوران کے مسائل حاکم اعلیٰ تک پہنچائیں اورحکومت کے قوانین وہدایات عام لوگوں تک پہنچائیں، چنانچہ ابن بطال نے لکھا ہے کہ مذکورہ حدیث میں عرفاء اور منتظم حضرات کی مشروعیت کا بیان ہے کیونکہ امام وقت تمام معاملات براہ راست نہیں چلا سکتا۔
اس نظام کی اسے ضرورت ہے تاکہ لوگوں کے معاملات کو احسن انداز میں بروقت نمٹایا جاسکے اور انھیں کسی قسم کی دشواری کا سامنا نہ کرنا پڑے۔
(فتح الباري: 210/13)