➊ شیخ رحمہما اللہ نے سپین (اندلس) کی تنظیم ”الاتحاد العالمي للطلبة المسلمین“ کی دعوت پر ایک محاضرہ میں شرکت کی اور ”الحدیث حجة بنفسه في العقائد والأحکام“ (حدیث ِنبوی بذاتہ عقائد واحکام میں حجت ہے)کے عنوان پر ایک وقیع خطاب پیش کیا جو بعد میں المکتبةالسلفیة، کویت سے شائع ہو چکا ہے۔
➋ إدارة العامة للإفتاء والدعوة والإرشاد، الریاض نے مصر، مغرب (مراکش) اور انگلینڈ میں عقیدہ توحید اور المنہج الاسلامی الحق کی طرف دعوت کے لئے آپ کو منتخب کیا تھا۔
➌ شیخ رحمہ اللہ نے دولۃ القطر کا سفر کیا اور وہاں مشائخ اور علماء سے ملاقاتیں کیں جن میں شیخ یوسف قرضاوی، شیخ محمد غزالی، شیخ المحمود اور شیخ ابن حجر بن آل بوطامی وغیرہ م قابل ذکر ہیں۔ آپ نے وہاں ”منزلة السنة في الإسلام“ کے عنوان پر خطاب بھی فرمایاجو بعد میں طبع ہوا۔
➍ متعدد اسلامی علمی کانفرنسوں میں آپ کو شرکت کی دعوت دی گئی۔ بعض کانفرنسوں اور اجتماعات میں آپ نے شرکت کی لیکن علمی مشاغل کی کثرت کے باعث اکثر سے آپ نے معذرت کر لی تھی۔
➎ شیخ رحمہ اللہ نے مختلف یورپی ممالک کا سفر بھی کیا اور وہاں کی مسلم اقلیتوں نیز مسلم طلبہ سے خطاب کیا اور ان میں اپنے مفید علمی دروس سے مستفید کیا تھا۔
➏ 1402ھ میں آپ رحمہ اللہ نے کویت کا سفر کیا اور وہاں متعدد دروس و محاضرات سے سامعین کو فیض یاب کیا۔ وہاں آپ کے دروس کی ریکارڈ کی گئی کیسٹوں کی تعداد تقریباً تیس ہے۔
➐ اسی طرح آپ نے متعدد بار ”الإمارات العربیۃ المتحدۃ“ کی زیارت بھی کی اور وہاں بہت سے اجتماعات سے خطاب کیا۔ آپ کے یہ خطابات ریکارڈ ہیں اور کیسٹ کے مراکز میں دستیاب ہیں۔ آپ کی امارات کی آخری زیارت غالباً 1405ھ میں ہوئی تھی۔