حدیث نمبر: 1948 --- ‏‏‏‏ سیدنا صالح بن خوات ؓ نے ایسے کسی شخص سے روایت کی جس نے نماز خوف پڑھی تھی رسول اللہ ﷺ کے ساتھ ذات الرقاع کے دن (ایک غزوہ کا نام ہے اس میں صحابہ ؓ نے اپنے پیروں کو چتھڑے باندھے تھے) ایک گروہ نے صف باندھی اور نبی ﷺ کے ساتھ ایک رکعت پڑھی اور ایک گروہ غنیم کے آگے رہا ۔ پھر آپ ﷺ نے اپنے ساتھ کی صف کے ساتھ ایک رکعت پڑھی ۔ پھر آپ ﷺ کھڑے رہے اور اس صف والوں نے اپنی نماز پوری کر لی ۔ پھر وہ چلے گئے اور دشمن کے آگے پرا باندھ لیا اور دوسرا گروہ آیا اور آپ ﷺ نے ان کے ساتھ ایک رکعت باقی ادا کی ۔ پھر اپ ﷺ بیٹھے رہے اور ان لوگوں نے اپنی نماز پوری کر لی ۔ پھر آپ ﷺ نے ان سب پر سلام کیا ۔

حدیث نمبر: 4101 --- ‏‏‏‏ سیدنا جابر ؓ سے روایت ہے ، ہم لوگ مکہ سے مدینہ کو آئے رسول اللہ ﷺ کے ساتھ تو میرا اونٹ بیمار ہو گیا اور بیان کیا حدیث کو پورے قصہ کے ساتھ اور اس روایت میں یہ ہے کہ پھر آپ ﷺ نے فرمایا : ” میرے ہاتھ اپنا اونٹ بیچ ڈال ۔ “ میں نے کہا : وہ آپ ہی کا ہے یا رسول اللہ ! آپ ﷺ نے فرمایا : ” نہیں بیچ ڈال میرے ہاتھ ۔ “ میں نے کہا : نہیں ، وہ آپ کا ہے یا رسول اللہ ۔ آپ ﷺ نے فرمایا : ” نہیں بیچ ڈال میرے ہاتھ ۔ “ میں نے کہا : تو ایک شخص کا میرے اوپر ایک اوقیہ سونا ہے ۔ آپ ﷺ ایک اوقیہ سونے کے بدلے یہ اونٹ لے لیجئیے ۔ آپ ﷺ نے فرمایا : ” میں نے لیا پھر تو پہنچ جائے گا اسی اونٹ پر مدینہ تک ۔ “ جابر ؓ نے کہا : جب میں مدینہ میں آیا تو رسول اللہ ﷺ نے بلال ؓ سے فرمایا : ” اس کو ایک اوقیہ سونے کا دے دے اور کچھ زیادہ دے ۔ “ تو بلال ؓ نے مجھ کو ایک اوقیہ سونے کا دیا اور ایک قیراط زیادہ دیا ۔ میں نے کہا : یہ جو رسول اللہ ﷺ نے مجھ کو زیادہ دیا ہے وہ ہمیشہ میرے پاس رہے (بطور تبرک کے) تو ایک تھیلی میں وہ میرے پاس رہا ۔ یہاں تک کہ شام والوں نے یوم الحرہ کو چھین لیا ۔

حدیث نمبر: 2734 --- ‏‏‏‏ سیدنا عبداللہ بن عمر ؓ کہتے تھے کہ نبی کریم ﷺ کو خبر پہنچی کہ میں برابر روزے رکھے جا رہا ہوں اور ساری رات نماز پڑھتا ہوں ۔ آپ ﷺ نے کسی کو میرے پاس بھیجا ، میں آپ ﷺ سے ملا ۔ آپ ﷺ نے فرمایا : ”مجھے خبر لگی ہے کہ تم برابر روزے رکھتے ہو اور بیچ میں افطار نہیں کرتے اور ساری رات نماز پڑھتے ہو تو ایسا مت کرو کہ اس لیے کہ تمہاری آنکھوں کا بھی کچھ حصہ ہے اور تمہاری ذات کا بھی حصہ ہے اور تمہاری بی بی کا بھی ، سو تم روزہ رکھو اور افطار بھی کرو اور نماز بھی پڑھو ، سوئے بھی رہو اور ہر دہے میں ایک روز روزہ رکھ لیا کرو کہ تم کو اس سے نو دن کا بھی ثواب ملے گا ۔ “ تو میں نے عرض کیا کہ میں اپنے میں اس سے زیادہ قوت پاتا ہوں اے بنی اللہ تعالیٰ کے ! آپ ﷺ نے فرمایا : ”خیر داؤد علیہ السلام کا روزہ رکھو ۔ “ میں نے کہا : ان کا روزہ کیا تھا ؟ اے نبی اللہ تعالیٰ کے ! آپ ﷺ نے فرمایا : ”وہ ایک دن روزہ رکھتے تھے اور ایک دن افطار کرتے تھے اور جب دشمن کے مقابل ہوتے تو کبھی نہ بھاگتے ۔ “ (یعنی جہاد سے) تو سیدنا عبداللہ ؓ نے کہا : یہ دشمن سے نہ بھاگنا مجھے کہاں نصیب ہو سکتا ہے اے نبی اللہ تعالیٰ کے ! (یعنی یہ بڑی قوت و شجاعت کی بات ہے) عطاء نے کہا : جو راوی حدیث ہیں کہ پھر میں نہیں جانتا کہ ہمیشہ روزوں کا ذکر کیوں آیا اور نبی ﷺ نے اس پر فرمایا کہ ”جس نے ہمیشہ روزے رکھے اس نے روزہ ہی نہیں رکھا (یعنی مطلق ثواب نہ پایا) جس نے ہمیشہ روزہ رکھا اس نے روزہ ہی نہیں رکھا ۔ “

حدیث نمبر: 473 --- ‏‏‏‏ یزید بن صہیب ابو عثمان فقیر سے روایت ہے ، میرے دل میں خارجیوں کی ایک بات کھب گئی تھی (وہ یہ کہ کبیرہ گناہ کرنے والا ہمیشہ جہنم میں رہے گا ۔ اور جو جہنم میں جائے گا وہ پھر وہاں سے نہ نکلے گا) تو ہم نکلے ایک بڑی جماعت کے ساتھ اس ارادے سے کہ حج کریں ، پھر خارجیوں کا مذہب پھیلائیں جب ہم مدینے میں پہنچے دیکھا تو سیدنا جابر بن عبداللہ ؓ ایک ستون کے پاس بیٹھے ہوئے لوگوں کو حدیثیں سنا رہے ہیں رسول اللہ ﷺ کی ، انہوں نے یکایک ذکر کیا دوزخیوں کا ۔ میں نے کہا : اے صحابی ، رسول اللہ ﷺ کے ، تم کیا حدیث بیان کرتے ہو ؟ اللہ تعالیٰ تو فرماتا ہے ۔ ” (اے رب ہمارے) بے شک تو جس کو جہنم میں لے گیا تو نے اس کو رسوا کیا“ اور فرماتا ہے : ”جہنم کے لوگ جب وہاں سے نکلنا چاہیں گے تو پھر اس میں ڈال دیئے جائیں گے ۔ “ اب تم کیا کہتے ہو ؟ انہوں نے کہا : تو نے قرآن پڑھا ہے ؟ میں نے کہا : ہاں ، انہوں نے پھر کہا : تو نے محمد ﷺ کا مقام سنا ہے یعنی وہ مقام جو اللہ ان کو قیامت کے روز عنایت فرمائے گا (جس کا بیان اس آیت میں ہے « عسي أن يبعثك ») میں نے کہا : ہاں میں نے سنا ہے انہوں نے کہا : پھر وہی مقام محمود ہے ، جس کی وجہ سے اللہ تعالیٰ نکالے گا جہنم سے ان لوگوں کو جن کو چاہے گا ۔ (پھر بیان کیا) انہوں نے پل صراط کا حال اور لوگوں کے گزرنے کا اس پل پر سے اور مجھے ڈر ہے ۔ یاد نہ رہا ہو یہ مگر انہوں نے یہ کہا : کہ کچھ لوگ دوزخ سے نکالے جائیں گے ۔ اس میں جانے کے بعد اور اس طرح سے نکلیں گے جیسے آبنوس کی لکڑیاں ۔ (سیاہ جل بھن کر) پھر جنت کی ایک نہر میں جائیں گے اور وہاں غسل کریں گے اور کاغذ کی طرح سفید ہو کر نکلیں گے ، یہ سن کر ہم لوٹے اور کہا ہم نے ۔ خرابی ہو تمہاری کیا یہ بوڑھا جھوٹ باندھتا ہے رسول اللہ ﷺ پر (یعنی وہ ہر گز جھوٹ نہیں بولتا پھر تمہارا مذہب غلط نکلا) اور ہم سب پھر گئے اپنے مذہب سے مگر ایک شخص نہ پھرا ۔ ایسا ہی کہا ابونعیم (فضل بن دکین) نے ۔

حدیث نمبر: 7435 --- ‏‏‏‏ خالد بن عمیر عدوی سے روایت ہے ، عتبہ بن عروان نے (جو امیر تھے بصرہ کے) ہم کو خطبہ سنایا تو اللہ تعالیٰ کی ثنا کی پھر کہا بعد حمد وصلوۃ کے ۔ معلوم ہو کہ دینا نے خبر دی ختم ہونے کی اور دنیا میں سے کچھ باقی نہ رہا مگر جیسے برتن میں کچھ بچا ہوا پانی رہ جاتا ہے جس کو اس کا صاحب بچا رکھتا ہے اور تم دنیا سے ایسے گھر کو جانے والے ہو جس کو زوال نہیں تو اپنے ساتھ نیکی کر کے لے جاؤ اس لیے کہ ہم سے بیان کیا گیا کہ پتھر ایک کنارے سے جہنم کے ڈالا جائے گا اور ستر برس تک اس میں اترتا جائے گا ۔ اور اس کی تہہ کو نہ پہنچے گا ۔ اللہ کی قسم ! جہنم بھری جائے گی ، کیا تم تعجب کرتے ہو اور ہم سے بیان کیا گیا کہ جنت کے ایک کنارے سے لے کر دوسرے کنارے تک چالیس برس کی راہ ہے اور ایک دن ایسا آئے گا کہ جنت لوگوں کے ہجوم سے بھری ہو گی اور تو نے دیکھا ہوتا میں ساتواں تھا سات شخصوں میں سے جو رسول اللہ ﷺ کے ساتھ تھے اور ہمارا کھانا کچھ نہ تھا سوائے درخت کے پتوں کے یہاں تک کہ ہماری باچھیں زخمی ہو گئی (بوجہ پتوں کی حرارت اور سختی کے) میں نے ایک چادر پائی اور اس کو پھاڑ کر دو ٹکڑے کئے ۔ ایک ٹکڑے کا میں نے تہبند بنایا اور دوسرے ٹکڑے کا سعد بن مالک نے ۔ اب آج کے رواز کوئی ہم میں سے ایسا نہیں ہے کہ کسی شہر کا حاکم نہ ہو اور میں پناہ مانگتا ہوں اللہ کی ، اس بات سے کہ میں اپنے تئیں بڑا سمجھوں اور اللہ کے نزدیک چھوٹا ہوں اور بے شک کسی پیغمبر کی نبوت (دنیا میں) ہمیشہ نہیں رہی بلکہ نبوت کا اثر (تھوڑی مدت میں) جاتا رہا یہاں تک کہ آخری انجام اس کا یہ ہوا کہ وہ سلطنت ہو گئی تو تم قریب پاؤ گے اور تجربہ کرو گے ان امیروں کا جو ہمارے بعد آئیں گے (کہ ان میں دین کی باتیں جو نبوت کا اثر ہے نہ رہیں گی اور وہ بالکل دنیا دار ہو جائیں گے) ۔

حدیث نمبر: 6395 --- ‏‏‏‏ ام المؤمنین سیدہ عائشہ ؓ سے روایت ہے ، رسول اللہ ﷺ نے فرمایا : ”ہجو کرو قریش کی کیونکہ ہجو ان کو زیادہ ناگوار ہے تیروں کی بوچھاڑ سے ۔ “ پھر آپ ﷺ نے ایک شخص کو بھیجا ابن رواحہ کے پاس اور فرمایا : ”ہجو کر قریش کی ۔ “ اس نے ہجو کی لیکن آپ ﷺ کو پسند نہ آئی ، پھر کعب بن مالک ؓ کے پاس بھیجا ، پھر حسان بن ثابت ؓ کے پاس بھیجا ۔ جب حسان ؓ آپ ﷺ کے پاس آئے تو انہوں نے کہا : تم کو آ گیا وہ وقت کہ تم نے بلا بھیجا اس شیر کو جو اپنی دم سے مارتا ہے (یعنی زبان سے لوگوں کو قتل کرتا ہے گویا میدان فصاحت اور شعرگوئی کے شیر ہیں) ، پھر اپنی زبان باہر نکالی اور اس کو ہلانے لگے اور عرض کیا : قسم اس کی جس نے آپ ﷺ کو سچا پیغمبر کر کے بھیجا میں کافروں کو اس طرح پھاڑ ڈالوں گا جیسے چمڑےکو پھاڑ ڈالتے ہیں اپنی زبان سے ۔ رسول اللہ ﷺ نے فرمایا : ” اے حسان ! جلدی مت کر کیونکہ ابوبکر قریش کے نسب کو بخوبی جانتے ہیں اور میرا بھی نسب قریش ہی میں ہے تو وہ میرا نسب تجھے علیحدہ کر دیں گے ۔ “ پھر سیدنا حسان ؓ سیدنا ابوبکر ؓ کے پاس آئے بعد اس کے لوٹے اور عرض کیا : یا رسول اللہ ! سیدنا ابوبکر ؓ نے آپ ﷺ کا نسب مجھ سے بیان کر دیا ، قسم اس کی جس نے آپ ﷺ کو سچا پیغمبر کر کے بھیجا میں آپ کو قریش میں سے ایسے نکال لوں گا جیسے بال آٹے میں سے نکال لیا جاتا ہے ۔ سیدہ عائشہ ؓ نے کہا : میں نے رسول اللہ ﷺ سے سنا ، آپ ﷺ فرماتے تھے سیدنا حسان ؓ سے : ” روح القدس ہمیشہ تیری مدد کرتے رہیں گے جب تک تو اللہ اور اس کے رسول کی طرف سے جواب دیتا رہے گا ۔ “ اور سیدہ عائشہ ؓ نے کہا : میں نے رسول اللہ ﷺ سے سنا ، آپ ﷺ فرماتے تھے : ” حسان ؓ نے قریش کی ہجو کی تو تسکین دی مؤمنوں کے دلوں کو اور تباہ کر دیا کافروں کی عزتوں کو ۔ “ ، حسان ؓ نے کہا : (شعروں کا ترجمہ یہ ہے) ۔ 1 - تو نے برائی کی محمد ﷺ کی ، میں نے اس کا جواب دیا ، اور اللہ تعالیٰ اس کا بدلہ دے گا 2- تو نے برائی کی محمد ﷺ کی ، جو نیک ہیں پرہیزگار ہیں ، اللہ تعالیٰ کے رسول ہیں ، وفاداری ان کی خصلت ہے ۔ 3- میرے ماں باپ اور میری آبرو محمد ﷺ کی آبرو بچانے کے لیے قربان ہیں ۔ 4- میں اپنی جان کو کھوؤں اگرتم نہ دیکھو اس کو کہ اڑا دے گا غبار کو کداء کے دونوں جانب سے (کداء ایک گھاٹی ہے مکہ کے دروازہ پر) 5- ایسی اونٹنیاں جو باگوں پر زور کریں گی اپنی قوت اور طاق...

حدیث نمبر: 2456 --- ‏‏‏‏ سیدنا ابوسعید خدری ؓ نے کہا : ہم رسول اللہ ﷺ کے پاس تھے اور آپ ﷺ کچھ بانٹ رہے تھے کہ ذوالخویصرہ آیا ایک شخص بنی تمیم کا اور اس نے کہا کہ اے رسول اللہ کے ! عدل کرو ۔ تب رسول اللہ ﷺ نے فرمایا : ” خرابی ہے تیری جب میں عدل نہ کروں گا تو کون کرے گا ؟ اور تو بالکل بدنصیب اور محروم ہو گیا اگر میں نے عدل نہ کیا ۔ “ اس پر سیدنا عمر بن خطاب ؓ نے عرض کی کہ اے اللہ کے رسول ! مجھے اجازت دیجئیے کہ اس کی گردن مار وں ۔ آپ ﷺ نے فرمایا : ” جانے دو اس لیے کہ اس کے چند یار ہوں گے کہ تم حقیر سمجھو گے اپنی نماز کو ان کی نماز کے آگے ، اور اپنے روزے کو ان کے روزے کے آگے ، قرآن پڑھیں گے کہ گلوں سے نہ اترے گا اسلام سے ایسے نکل جائیں گے کہ جیسے تیر شکار سے کہ دیکھتا ہے تیر انداز اس کے پیکان کو تو اس میں کچھ بھرا نہیں ہے ، پھر دیکھتا ہے اس کی پیکان کی جڑ کو تو اس میں کچھ نہیں ، پھر دیکھتا ہے اس کی لکڑی کو تو اس میں بھی کچھ نہیں ، پھر دیکھتا ہے اس کے پر کو تو اس میں بھی کچھ نہیں اور تیر اس شکار کی بیٹ اور خون سے نکل گیا اور نشانی اس گروہ کی یہ ہے کہ ان میں ایک کالا آدمی ہے کہ ایک شانہ اس کا عورت کے پستان کا سا ہو گا یا فرمایا جیسے گوشت کا لوتھڑا تلتھلاتا ہوا اور وہ گروہ اس وقت نکلے گا جب لوگوں میں پھوٹ ہو گی ۔ “ سیدنا ابوسعید خدری ؓ کہتے ہیں کہ میں گواہی دیتا ہوں کہ میں نے سنا ہے یہ رسول اللہ ﷺ سے اور گواہی دیتا ہوں کہ سیدنا علی بن ابی طالب ؓ ان سے لڑے اور میں آپ ؓ کے ساتھ تھا اور آپ ؓ نے حکم فرمایا اس کے ڈھونڈنے کا اور وہ ملا اور سیدنا علی بن ابی طالب ؓ کے پاس لایا گیا اور میں نے اس کو دیکھا کہ جیسا رسول اللہ ﷺ نے فرمایا تھا ویسا ہی تھا ۔

حدیث نمبر: 2448 --- ‏‏‏‏ سیدنا عبداللہ ؓ نے کہا : رسول اللہ ﷺ نے کچھ مال بانٹا اور ایک شخص نے کہا کہ یہ تقسیم ایسی ہے کہ اللہ کی رضا مندی اس سے مقصود نہیں پھر میں نے رسول اللہ ﷺ سے آ کر چپکے سے کہہ دیا اور آپ ﷺ بہت غصہ ہوئے اور چہرہ آپ کا لال ہو گیا اور میں نے آرزو کی کہ کاش اس کا ذکر نہ کیا ہوتا تو خوب ہوتا پھر آپ ﷺ نے فرمایا : ” موسیٰ علیہ السلام کو اس سے زیادہ ستایا اور انہوں نے صبر کیا (موسیٰ علیہ السلام پردہ میں چھپ کر نہاتے تھے جاہلوں نے کہا : ان کے انثیین بڑے ہیں ایک بار پتھر پر کپڑے رکھ دئیے وہ بھاگا ۔ آپ اس کے پیچھے دوڑے لوگوں نے دیکھ لیا کہ کچھ عیب نہیں اور جب ہارون علیہ السلام کا انتقال ہوا ان کا جنازہ آسمان پر ملائکہ لے گئے ۔ جاہلوں نے کہا : انہوں نے ان کو حسد سے مار ڈالا آخر وہ ایک تخت پر آسمان سے ظاہر ہوئے اور انہوں نے کہا کہ موسیٰ علیہ السلام نے مجھے نہیں مارا ۔ غرض اس طرح ہمیشہ جاہل لوگ انبیاء ، علماء کو بدنام کرتے چلے آئے ہیں خدام حدیث اور وارثان علم رسول ﷺ ہمیشہ صبر کرتے رہے ہیں) ۔

حدیث نمبر: 7179 --- ‏‏‏‏ سیدنا انس بن مالک ؓ سے روایت ہے ، رسول اللہ ﷺ نے فرمایا : ”ہمیشہ جہنم میں لوگ ڈالے جائیں گے اور وہ یہی کہے گی اور کچھ ہے ؟ یہاں تک کہ پروردگار عزت والا اپنا قدم اس میں رکھ دے گا تب تو سمٹ کر ایک میں ایک رہ جائے گی اور کہنے لگے گی : بس بس ۔ قسم تیری عزت اور کرم کی اور ہمیشہ جنت میں خالی جگہ رہے گی یہاں تک کہ اللہ تعالیٰ اس کے لیے ایک مخلوق کو پیدا کرے گا اور اس کو اس جگہ میں رکھے گا ۔ “

حدیث نمبر: 1944 --- ‏‏‏‏ سیدنا عبداللہ بن عمر ؓ نے کہا کہ رسول اللہ ﷺ نے نماز خوف پڑھی بعض دن اس طرح کہ ایک گروہ آپ ﷺ کے ساتھ کھڑا ہوا اور ایک غنیم کے آگے اور آپ ﷺ نے لوگوں کے ساتھ ایک رکعت پڑھی پھر وہ لوگ غنیم کی طرف گئے اور دوسرے آئے اور ان کے ساتھ بھی ایک رکعت پڑھی ۔ پھر دونوں گروہوں نے اپنی اپنی دوسری رکعت ادا کر لی ۔ اور سیدنا ابن عمر ؓ نے کہا : جب خوف اس بھی زیادہ ہو تو سواری پر یا کھڑے کھڑے اشارہ سے پڑھو ۔