حدیث نمبر: 5499 --- ‏‏‏‏ سیدنا جابر ؓ سے روایت ہے ، منع کیا رسول اللہ ﷺ نے بائیں ہاتھ سے کھانے سے یا ایک جوتا پہن کر چلنے سے یا ایک ہی کپڑا سارے بدن پر لپیٹنے سے یا گوٹ مار کر بیٹھنے سے ایک کپڑے میں اپنی شرمگاہ کھولے ہوئے (جس کو احتباء کہتے ہیں یہ ایک کپڑے میں منع ہے ستر کھلنے کے خیال سے اور کئی کپڑے ہوں یا ستر کھلنے کا ڈر نہ ہو تو مکروہ ہے) ۔

حدیث نمبر: 4568 --- ‏‏‏‏ سیدنا ابوقتادہ ؓ سے روایت ہے ، ہم رسول اللہ ﷺ کے ساتھ نکلے جس سال حنین کی لڑائی ہوئی ۔ جب ہم لوگ دشمنوں سے بھڑے تو مسلمانوں کو شکست ہوئی (یعنی کچھ مسلمان بھاگے اور رسول اللہ ﷺ اور کچھ آپ ﷺ کے ساتھ میدان میں جمے رہے) پھر میں نے ایک کافر کو دیکھا وہ ایک مسلمان پر چڑھا تھا (اس کے مارنے کو) میں گھوم کر اس کی طرف آیا اور ایک مار لگائی مونڈے اور گردن کے بیچ میں ، اس نے مجھ کو ایسا دبایا کہ موت کی تصویر میری آنکھوں میں پھر گئی بعد اس کے وہ خود مر گیا اور اس نے مجھ کو چھوڑ دیا ۔ میں سیدنا عمر ؓ سے ملا انہوں نے کہا لوگوں کو کیا ہو گیا (جو ایسا بھاگ نکلے) میں نے کہا : اللہ تعالیٰ کا حکم ہے ۔ پھر لوگ لوٹے اور رسول اللہ ﷺ بیٹھے ۔ آپ ﷺ نے فرمایا : ’’ جس نے کسی کو مارا ہو اور وہ گواہ رکھتا ہو تو سامان اس کا وہی لے جائے ۔ “ سیدنا ابوقتادہ ؓ نے کہا : یہ سن کر میں کھڑا ہوا پھر میں نے کہا : میرا گواہ کون ہے بعد اس کے میں بیٹھ گیا ۔ پھر آپ ﷺ نے دوبارہ ایسا ہی فرمایا : میں کھڑا ہوا پھر میں نے کہا : میرے لیے کون گواہی دے گا ، میں بیٹھ گیا ۔ پھر تیسری بار آپ ﷺ نے ایسا ہی فرمایا : میں کھڑا ہوا آخر رسول اللہ ﷺ نے پوچھا کیا ہوا تجھے اے ابوقتادہ ۔ میں نے سارا قصہ بیان کیا ایک شخص بولا سچ کہتے ہیں ابو قتادہ یا رسول اللہ ! اس شخص کا سامان میرے پاس ہے تو راضی کر دیجئئے ان کو کہ اپنا حق مجھے دے دیں ۔ یہ سن کر سیدنا ابوبکر صدیق ؓ نے کہا : نہیں اللہ کی قسم ایسا کبھی نہیں ہو گا اور رسول اللہ ﷺ کبھی قصد نہ کریں کہ اللہ تعالیٰ شیروں میں سے ایک شیر جو لڑتا ہے اللہ تعالیٰ اور اس کے رسول کی طرف سے اسباب تجھے دلانے کے لیے ، رسول اللہ ﷺ نے فرمایا : ”ابوبکر سچ کہتے ہیں (اس حدیث سے سیدنا ابوبکر صدیق ؓ کی بڑی فضیلت ثابت ہوئی کہ انہوں نے رسول اللہ ﷺ کے سامنے فتویٰ دیا اور آپ ﷺ نے ان کے فتوے کو سچ کہا) تو دے دے ابوقتادہ کو وہ سامان ۔ “ پھر اس نے وہ سامان مجھ کو دے دیا ۔ ابوقتادہ ؓ نے کہا : میں نے (اس سامان میں سے) زرہ کو بیچا اور اس کے بدلے میں ایک باغ خریدا بنو سلمہ کے محلہ میں اور یہ پہلا مال ہے جس کو میں نے کمایا اسلام کی حالت میں ۔ اور لیث کی روایت میں یہ ہے کہ سیدنا ابوبکر صدیق ؓ نے کہا : ہرگز نہیں رسول اللہ یہ اسباب کبھی نہ دیں گے قریش کی ایک لومڑی کو ۔ کبھی نہ چھوڑ...

حدیث نمبر: 6238 --- ‏‏‏‏ مصعب بن سعد سے روایت ہے ، انہوں نے سنا اپنے باپ سے کہ ان کے باب میں قرآن کی کئی آیتیں اتریں ۔ ان کی ماں نے قسم کھائی تھی کہ ان سے کبھی بات نہ کرے گی جب تک وہ اپنا دین (یعنی اسلام کا دین) نہ چھوڑیں گے اور نہ کھائے گی نہ پیئے گی ۔ وہ کہنے لگی : اللہ تعالیٰ نے تجھےحکم دیا ہے ماں باپ کی اطاعت کرنے کا اور میں تیری ماں ہوں تجھ کو حکم کرتی ہوں اس بات کا ، پھر تین دن تک یوں ہی رہی کچھ کھایا نہ پیا یہاں تک کہ اس کو غش آ گیا آخر ایک بیٹا اس کا جس نام عمارہ تھا کھڑا ہوا اور اس کو پانی پلایا ۔ وہ بددعا کرنے لگی سیدنا سعد ؓ کے لیے ، تب اللہ تعالیٰ نے یہ آیت اتاری « وَوَصَّيْنَا الإِنْسَانَ بِوَالِدَيْہِ حُسْنًا وَإِنْ جَاہَدَاكَ عَلَى أَنْ تُشْرِكَ بِي مَا لَيْسَ لَكَ بِہِ عِلْمٌ فَلَا تُطِعْہُمَاوَصَاحِبْہُمَا فِي الدُّنْيَا مَعْرُوفًا » (۳۱-لقمان : ۱۴-۳۲) ”اور ہم نے حکم دیا آدمی کو اپنے ماں باپ کے ساتھ نیکی کرنے کا لیکن وہ اگر زور ڈالیں تجھ پر کہ شریک کرے تو میرے ساتھ اس چیز کو جس کا تجھےعلم نہیں تو مت مان ان کی بات (یعنی شرک مت کر) اور رہ ان کے ساتھ دنیا میں دستور کے موافق ۔ “ اور ایک بار رسول اللہ ﷺ کو بہت سا غنیمت کا مال ہاتھ آیا اس میں ایک تلوار بھی تھی وہ میں نے لے لی اور رسول اللہ ﷺ کے پاس لایا ۔ میں نے عرض کیا : یہ تلوار مجھ کو انعام دے دیجئیے اور میرا حال آپ جانتے ہی ہیں ۔ آپ ﷺ نے فرمایا : ”اس کو وہیں رکھ دے جہاں سے تو نے اٹھائی ہے ۔ “ میں گیا اور میں نے قصد کیا ، پھر اس کو گدام میں ڈال دوں لیکن میرے دل نے مجھے ملامت کی اور میں پھر آپ ﷺ کے پاس لوٹا ۔ میں نے عرض کیا کہ یہ تلوارمجھے دے دیجئیے ۔ آپ ﷺ نے سختی سے فرمایا : ”رکھ دے اسی جگہ جہاں سے تو نے اٹھائی ہے ۔ “ تب اللہ تعالیٰ نے یہ آیت اتاری « يَسْأَلُونَكَ عَنِ الْأَنفَالِ » (۸-الأنفال : ۱) ”تجھ سے پوچھتے ہیں لوٹ کی چیزوں کو ۔ “ سیدنا سعد ؓ نے کہا : میں بیمار ہوا تو میں نے رسول اللہ ﷺ کو بلا بھیجا ۔ آپ ﷺ تشریف لائے ، میں نے کہا : مجھ کو اجازت دیجئیے میں اپنے مال کو بانٹ دوں جس کو چاہوں ۔ آپ ﷺ نے نہ مانا ، میں نے کہا : اچھا آدھا مال بانٹ دوں ۔ آپ ﷺ نے نہ مانا ، میں کہا : اچھا تہائی مال بانٹ دوں ، آپ ﷺ چپ ہو رہے ، پھر یہی حکم ہوا کہ تہائی مال تک بانٹنا درست ہے ۔ سیدنا سعد ؓ نے کہا : ایک با...

حدیث نمبر: 5379 --- ‏‏‏‏ سیدنا ابوہریرہ ؓ سے روایت ہے ، رسول اللہ ﷺ کے پاس ایک کافر آیا اور آپ ﷺ نے اس کی ضیافت کی ۔ آپ ﷺ نے حکم دیا ۔ ایک بکری کا دودھ دوہا گیا وہ پی گیا ، پھر دوسری بکری کا وہ بھی پی گیا ، پھر تیسری کا وہ بھی پی گیا ، یہاں تک کہ سات بکریوں کا دودھ پی گیا ، پھر دوسری صبح کو وہ مسلمان ہو گیا ۔ پھر آپ ﷺ نے حکم دیا ۔ ایک بکری کا دودھ دوہا گیا ، اس نے اس کا دودھ پیا ، پھر دوسری کا تو وہ پورا نہ پی سکا ۔ تب رسول اللہ ﷺ نے فرمایا : ” مؤمن ایک آنت میں پیتا ہے اور کافر سات آنتوں میں ۔ “

حدیث نمبر: 3591 --- ‏‏‏‏ ام فضل ؓ نے کہا کہ ایک گاؤں کا آدمی نبی ﷺ کے پاس آیا اور آپ ﷺ میرے گھر میں تھے اور عرض کی کہ یا نبی اللہ ! میری ایک عورت تھی اور میں نے دوسری سے نکاح کیا سو پہلی نے کہا کہ میں نے اس دوسری کو ایک بار یا دو بار دودھ چوسایا ہے تو آپ ﷺ نے فرمایا : ” کہ ایک بار یا دو بار دودھ چوسانے سے حرمت نہیں ہوتی ۔ “

حدیث نمبر: 5315 --- ‏‏‏‏ سیدنا جابر بن عبداللہ ؓ سے روایت ہے ، جب خندق کھودی گئی (مدینہ کے گرد) تو میں نے رسول اللہ ﷺ کو بھوکا پایا ۔ میں اپنی بی بی کے پاس لوٹا اور کہا : تیرے پاس کچھ ہے کیونکہ میں نے رسول اللہ ﷺ کو بہت بھوکا پایا ہے ۔ اس نے ایک تھیلہ نکالا جس میں ایک صاع جو تھے اور ہمارے پاس ایک بکری کا بچہ تھا پلا ہوا اور میں نے اس کو ذبح کیا اور میری عورت نے آٹا پیسا وہ بھی میرے ساتھ ہی فارغ ہوئی ، میں نے اس کا گوشت کاٹ کر ہانڈی میں ڈالا ۔ بعد اس کے میں رسول اللہ ﷺ کے پاس لوٹا ، عورت بولی : مجھ کو رسوا نہ کرنا رسول اللہ ﷺ اور آپ کے ساتھیوں کے سامنے (یعنی کھانا تھوڑا ہے کہیں بہت سے آدمیوں کی دعوت نہ کر دینا) جب میں آپ ﷺ کے پاس آیا تو چپکے سے میں نے عرض کیا : یا رسول اللہ ! ہم نے ایک بکری کا بچہ ذبح کیا ہے اور ایک صاع جو کا آٹا ہمارے پاس تھا تیار کیا ہے ، تو آپ ﷺ چند لوگوں کو اپنے ساتھ لے کر تشریف لائیے ، یہ سن کر رسول اللہ ﷺ نے پکارا اور فرمایا : ”اے خندق والو ! جابر نے تمہای دعوت کی ہے تو چلو ۔ “ اور آپ ﷺ نے فرمایا : ”اپنی ہانڈی کو مت اتارنا اور آٹے کی روٹی مت پکانا ، جب تک میں نہ آ جاؤں ۔ پھر میں گھر میں آیا اور رسول اللہ ﷺ بھی تشریف لائے ، آپ ﷺ آگے تھے اور لوگ آپ ﷺ کے پیچھے تھے ۔ میں اپنی عورت کے پاس آیا وہ بولی : تو ہی ذلیل ہو گا اور تجھے ہی لوگ ذلیل اور برا کہیں گے ۔ میں نے کہا : میں نے تو وہی کیا جو تو نے کہا تھا (پر رسول اللہ ﷺ نے فاش کر دیا اور سب کو دعوت سنا دی ۔) آخر اس نے وہ آٹا نکالا ۔ رسول اللہ ﷺ نے اپنا لب مبارک اس میں ڈالا اور برکت کی دعا کی ، پھر ہماری ہانڈی کی طرف چلے اس میں بھی تھوکا اور برکت کی دعا کی ۔ بعد اس کے فرمایا : ”ایک روٹی پکانے والی اور بلا لے جو تیرے ساتھ مل کر پکائے (میری عورت سے فرمایا) اور ہانڈی میں سے ڈوئی نکال کر نکالتی جا اس کو اتار مت ، جابر ؓ نے کہا : آپ ﷺ کے ساتھ ایک ہزار آدمی تھے تو میں قسم کھاتا ہوں کہ سب نے کھایا یہاں تک کہ چھوڑ دیا اور لوٹ گئے اور ہانڈی کا وہی حال تھا ابل رہی تھی اور آٹا بھی ویسا ہی تھا اس کی روٹیاں بن رہی تھیں ۔

حدیث نمبر: 4497 --- ‏‏‏‏ ہمام بن منبہ سے روایت ہے ، یہ وہ حدیثیں ہیں جو سیدنا ابوہریرہ ؓ نے بیان کیں ہم سے رسول اللہ ﷺ سے سن کر ۔ پھر بیان کیں کئی حدیثیں ان میں سے ایک یہ بھی تھی کہ رسول اللہ ﷺ نے فرمایا : ”ایک شخص نے دوسرے شخص سے زمین خریدی پھر جس نے زمین خریدی اس نے ایک گھڑا سونے کا بھرا ہوا اس میں پایا ، جس نے خریدی تھی وہ کہنے لگا (بیچنے والے سے) : تو اپنا سونا لے لے میں نے تجھ سے زمین خریدی تھی ، سونا نہیں خریدا تھا ، جس نے زمین بیچی تھی ، اس نے کہا : میں نے تیرے ہاتھ زمین بیچی اور جو کچھ اس میں تھا ۔ (تو سونا بھی تیرا ہے سبحان اللہ ! بائع اور مشتری دونوں کیسے خوش نیت اور ایماندار تھے) پھر دونوں نے فیصلہ چاہا ایک شخص سے ، وہ بولا : تمہاری اولاد ہے ؟ ایک نے کہا : میرا ایک لڑکا ہے ، دوسرے نے کہا : میری ایک لڑکی ہے ۔ اس نے کہا : اچھا اس کے لڑکے کا نکاح اس لڑکی سے کر دو ۔ اور اس سونے کو دونوں پر خرچ کرو اور اللہ تعالیٰ کی راہ میں بھی دو ۔ “ (غرض صلح کرا دی اور یہ مستحب ہے تاکہ دونوں خوش رہیں) ۔

حدیث نمبر: 5693 --- ‏‏‏‏ سیدہ اسماء ؓ سے روایت ہے ، میں سیدنا زبیر ؓ کے گھر کے کام کرتی ، ان کا ایک گھوڑا تھا اس کی سائیسی بھی کرتی تو کوئی کام مجھ پر گھوڑے کی خدمت سے زیادہ سخت نہ تھا ۔ اس کے لیے میں گھاس لاتی ، اس کی خدمت کرتی سائیسی کرتی پھر مجھ کو ایک لونڈی ملی ، رسول اللہ ﷺ کے پاس قیدی آئے ، آپ ﷺ نے مجھ کو بھی ایک لونڈی دی ، وہ گھوڑے کا سارا کام کرنے لگی ، اور یہ محنت میرے اوپر سے اس نے اٹھا لی ، پھر میرے پاس ایک آدمی آیا ، اور کہنے لگا : اے ام عبداللہ ! میں ایک محتاج آدمی ہوں ، میرا یہ ارادہ ہے کہ تمہاری دیوار کے سائے میں دکان لگاؤں ۔ میں نے کہا : اگر میں تجھ کو اجازت دوں ایسا نہ ہو کہ زبیر خفا ہوں تو ایسا کر جب زبیر موجود ہوں ان کے سامنے مجھ سے کہو ۔ وہ آیا اور کہنے لگا : اے ام عبداللہ ! میں ایک محتاج آدمی ہوں ، میں چاہتا ہوں کہ تمہاری دیوار کے سایے میں دکان کروں ۔ میں نے کہا : تجھے مدینہ میں کوئی اور گھر نہیں ملتا سوائے میرے گھر کے (یہ ایک تدبیر تھی سیدہ اسماء ؓ کی زبیر کی زبان سے اجازت دلوانے کے لیے) سیدنا زبیر ؓ نے کہا : اسماء ! تم کو کیا ہوا ہے تم فقیر کو منع کرتی ہو بیچنے سے ۔ پھر وہ دکان کرنے لگا یہاں تک کہ اس نے روپیہ کمایا ۔ وہ لونڈی میں نے اس کے ہاتھ بیچ ڈالی ۔ جس وقت زبیر میرے پاس آئے تو اس کی قیمت کے پیسے میری گود میں تھے ۔ زبیر نے کہا : یہ پیسے مجھ کو ہبہ کر دو ۔ میں نے کہا : یہ میں صدقہ دے چکی ہوں ۔

حدیث نمبر: 6381 --- ‏‏‏‏ سیدنا قیس بن عباد ؓ سے روایت ہے ، میں مدینہ میں تھا کچھ لوگوں میں جن میں بعض صحابہ ؓ بھی تھے ایک شخص آیا اس کے چہرے پر اللہ کے خوف کا اثر تھا ۔ بعض لوگ کہنے لگے : یہ جنتی ہے ، یہ جنتی ہے ۔ اس نے دو رکعتیں پڑھیں ، پھر چلا ۔ میں بھی اس کے پیچھے گیا ، وہ اپنے مکان میں گیا ، میں بھی اس کے ساتھ اندر گیا اور باتیں کیں ، جب دل لگ گیا تو میں نے اس سے کہا : تم جب مسجد میں آئے تھے تو ایک شخص ایسا ایسا بولا : (یعنی تم جنتی ہو) اس نے کہا : : سبحان اللہ ! کسی کو نہیں چاہیے وہ بات کہنی جو نہیں جانتا اور میں تجھ سے بیان کرتا ہوں لوگ کیوں ایسا کہتے ہیں ، میں نے ایک خواب دیکھا تھا رسول اللہ ﷺ کے زمانے میں ۔ وہ خواب میں نے آپ ﷺ سے بیان کیا ۔ میں نے دیکھا کہ میں ایک باغ میں ہوں (جس کی وسعت اور پیداوار اور سبزی کا حال اس نے بیان کیا) اس باغ کے بیچ میں ایک ستون ہے لوہے کا وہ نیچے تو زمین کے اندر ہے اور اوپر آسمان تک گیا ہے اس کی بلندی پر ایک حلقہ ہے ، مجھ سے کہا گیا : اس پر چڑھ ۔ میں نے کہا : میں نہیں چڑھ سکتا ، پھر ایک خدمتگار آیا اس نے میرے کپڑے پیچھے سے اٹھائے اور بیان کیا کہ اس نے اپنے ہاتھ سے مجھے پیچھے سے اٹھایا : میں چڑھ گیا ، یہاں تک کہ اس ستون کی بلندی پر پہنچ گیا اور حلقہ کو میں نے تھام لیا ۔ مجھ سے کہا : گیا : اس کو تھامے رہو ، پھر میں جاگا اور وہ حلقہ اس وقت تک میرے ہاتھ میں ہی تھا ۔ یہ خواب میں نے رسول اللہ ﷺ سے بیان کیا ۔ آپ ﷺ نے فرمایا : ” وہ باغ اسلام ہے اور یہ ستون اسلام کا ستون ہے اور وہ حلقہ مضبوط حلقہ ہے دین کا اور تو اسلام پر قائم رہے گا مرتے دم تک ۔ “ قیس نے کہا : وہ شخص سیدنا عبداللہ بن سلام تھے ۔

حدیث نمبر: 6383 --- ‏‏‏‏ خرشہ بن حر سے روایت ہے ، میں ایک حلقہ میں بیٹھا مدینہ کی مسجد میں وہاں ایک بوڑھا تھا خوبصورت ، معلوم ہو ا کہ وہ سیدنا عبداللہ بن سلام ہیں ۔ وہ لوگوں سے اچھی اچھی باتیں کر رہے تھےجب وہ کھڑے ہوئے تو لوگوں نے کہا : کہ جس کو بھلا لگےجنتی کو دیکھنا وہ اس کو دیکھے ۔ میں نے (اپنے دل میں) کہا : اللہ کی قسم ! میں ان کے ساتھ جاؤں گا اور ان کا گھر دیکھوں گا ، پھر میں ان کے پیچھے ہوا وہ چلے یہاں تک کہ قریب تھا کہ شہر سے باہر نکل جائیں ۔ ، پھر اپنے مکان میں گئے ، میں نے بھی اجازت چاہی اندر آنے کی ، انہوں نے اجازت دی ، پھر پوچھا : اے بھتیجے میرے ! کیا کام ہے تیرا ؟ میں نے کہا : لوگوں سے میں نے سنا جب تم کھڑے ہوئے وہ کہتے تھے : جس کو خوش لگے کسی جنتی کا دیکھنا وہ ان کو دیکھے ۔ تو مجھے اچھا معلوم ہو ا تمہارے ساتھ رہنا ، انہوں نے کہا : : اللہ تعالیٰ جانتا ہے جنت والوں کو اور میں تجھ سے وجہ بیان کرتا ہوں لوگوں کے یہ کہنے کی ۔ میں ایک بار سو رہا تھا خواب میں ایک شخص آیا اور اس نے کہا : کھڑا ہو ، پھر اس نے میرا ہاتھ پکڑا میں اس کے ساتھ چلا ، مجھے بائیں طرف کچھ راہیں ملیں ، میں نے ان میں جانا چاہا ، وہ بولا : ان میں مت جا یہ بائيں طرف والوں کی راہیں ہیں (یعنی کا فروں کی) ، پھر داہنی طرف کی راہیں ملیں وہ شخص بولا : ان راہو ں میں جا ، پھر ایک پہاڑ ملا وہ شخص بولا : اس پر چڑھ ۔ میں نے جو چڑھنا چاہا تو سرین (چوتڑ) کے بل گرا ۔ کئی بار میں نے قصد کیا چڑھنے کا لیکن ہر بار گرا ۔ ، پھر وہ مجھے لے چلا یہاں تک کہ ایک ستون ملا جس کی چوٹی آسمان میں تھی اور تہ زمین میں ۔ اس کے اوپر ایک حلقہ لگا تھا ۔ مجھ سے کہا : اس ستون کے اوپر چڑھ جا ۔ میں نے کہا : میں اس پر کیوں کر چڑھوں اس کا سرا تو آسمان میں ہے ۔ آخر اس شخص نے میرا ہاتھ پکڑا اور مجھے اچھال دیا ، میں جو دیکھتا ہوں تو اس حلقہ کو پکڑے ہوئے لٹک رہا ہو ں ، پھر اس شخص نے ستون کو مارا وہ گر پڑا اور میں صبح تک اسی حلقہ میں لٹکتا رہا (اس وجہ سے کہ اترنے کا کوئی ذریعہ نہیں رہا) جب میں جاگا تو رسول اللہ ﷺ کے پاس آیا اور آپ ﷺ سے یہ خواب بیان کیا ۔ آپ ﷺ نے فرمایا : ” جو راہیں تو نے بائیں طرف دیکھیں وہ بائيں طرف والوں کی راہیں ہیں اور جو راہیں داہنی طرف دیکھیں وہ داہنی طرف والوں کی راہیں ہیں اور پہاڑ وہ شہیدوں کا درجہ ہے تو وہا...