حدیث نمبر: 798 --- حکم البانی: صحيح... ابوقتادہ ؓ کہتے ہیں کہ رسول اللہ ﷺ ہمیں نماز پڑھاتے تو ظہر اور عصر کی پہلی دو رکعتوں میں سورۃ فاتحہ اور ایک ایک سورت پڑھتے تھے اور کبھی ہمیں (ایک آدھ) آیت سنا دیتے تھے ، اور آپ ظہر کی پہلی رکعت لمبی اور دوسری رکعت چھوٹی کرتے ، اور اسی طرح صبح کی نماز میں کرتے ۔ ابوداؤد کہتے ہیں : مسدد نے « فاتحۃ الكتاب » اور « سورۃ » کا ذکر نہیں کیا ہے ۔ ... (ص/ح) ... حدیث متعلقہ ابواب: ظہر کی پہلی دو رکعتوں میں سورۃ فاتحہ اور ایک ایک سورت پڑھنا ۔ عصر کی پہلی دو رکعتوں میں سورۃ فاتحہ اور ایک ایک سورت پڑھنا ۔ پہلی رکعت لمبی اور دوسری رکعت چھوٹی کرنا ۔

حدیث نمبر: 138 --- حکم البانی: صحيح... عبداللہ بن عباس ؓ کہتے ہیں کیا میں تم کو رسول اللہ ﷺ کے وضو کے بارے میں نہ بتاؤں ؟ پھر انہوں نے وضو کیا ، اور اعضاء کو ایک ایک بار دھلا ۔ ... (ص/ح)

حدیث نمبر: 2448 --- حکم البانی: صحيح... عبداللہ بن عمرو ؓ کہتے ہیں کہ رسول اللہ ﷺ نے مجھ سے فرمایا : ” اللہ تعالیٰ کو سب سے زیادہ پسندیدہ روزے داود علیہ السلام کے روزے ہیں ، اور پسندیدہ نماز بھی داود کی نماز ہے : وہ آدھی رات تک سوتے ، اور تہائی رات تک قیام کرتے (تہجد پڑھتے) ، پھر رات کا چھٹا حصہ سوتے ، اور ایک دن روزہ نہ رکھتے ، ایک دن رکھتے “ ۔ ... (ص/ح)

حدیث نمبر: 4472 --- حکم البانی: صحيح... ابوامامہ اسعد بن سہل بن حنیف انصاری ؓ سے روایت ہے کہ رسول اللہ ﷺ کے کچھ انصاری صحابہ نے انہیں بتایا کہ انصاریوں میں کا ایک آدمی بیمار ہوا وہ اتنا کمزور ہو گیا کہ صرف ہڈی اور چمڑا باقی رہ گیا ، اس کے پاس انہیں میں سے کسی کی ایک لونڈی آئی تو وہ اسے پسند آ گئی اور وہ اس سے جماع کر بیٹھا ، پھر جب اس کی قوم کے لوگ اس کی عیادت کرنے آئے تو انہیں اس کی خبر دی ، اور کہا میرے متعلق رسول اللہ ﷺ سے مسئلہ پوچھو ، کیونکہ میں نے ایک لونڈی سے صحبت کر لی ہے ، جو میرے پاس آئی تھی ، چنانچہ انہوں نے یہ واقعہ رسول اللہ ﷺ سے ذکر کیا ، اور کہا : ہم نے تو اتنا بیمار اور ناتواں کسی کو نہیں دیکھا جتنا وہ ہے ، اگر ہم اسے لے کر آپ کے پاس آئیں تو اس کی ہڈیاں جدا ہو جائیں ، وہ صرف ہڈی اور چمڑے کا ڈھانچہ ہے ، تو رسول اللہ ﷺ نے حکم دیا کہ درخت کی سو ٹہنیاں لیں ، اور اس سے اسے ایک بار مار دیں ۔ ... (ص/ح)

حدیث نمبر: 4726 --- حکم البانی: ضعيف... جبیر بن مطعم ؓ کہتے ہیں کہ رسول اللہ ﷺ کے پاس ایک اعرابی آیا اور کہا : اللہ کے رسول ! لوگ مصیبت میں پڑ گئے ، گھربار تباہ ہو گئے ، مال گھٹ گئے ، جانور ہلاک ہو گئے ، لہٰذا آپ ہمارے لیے بارش کی دعا کیجئے ، ہم آپ کو سفارشی بناتے ہیں اللہ کے دربار میں ، اور اللہ کو سفارشی بناتے ہیں آپ کے دربار میں ، رسول اللہ ﷺ نے فرمایا : ” تمہارا برا ہو ، سمجھتے ہو تم کیا کہہ رہے ہو ؟ “ پھر رسول اللہ ﷺ سبحان اللہ کہنے لگے ، اور برابر کہتے رہے یہاں تک کہ اس کا اثر آپ ﷺ کے اصحاب کے چہروں پر دیکھا گیا ، پھر فرمایا : ” تمہارا برا ہو اللہ کو اس کی مخلوق میں سے کسی کے دربار میں سفارشی نہیں بنایا جا سکتا ، اللہ کی شان اس سے بہت بڑی ہے ، تمہارا برا ہو ! کیا تم جانتے ہو اللہ کیا ہے ، اس کا عرش اس کے آسمانوں پر اس طرح ہے (آپ نے انگلیوں سے گنبد کے طور پر اشارہ کیا) اور وہ چرچراتا ہے جیسے پالان سوار کے بیٹھنے سے چرچراتا ہے ، (ابن بشار کی حدیث میں ہے) اللہ تعالیٰ اپنے عرش کے اوپر ہے ، اور اس کا عرش اس کے آسمانوں کے اوپر ہے “ اور پھر پوری حدیث ذکر کی ۔ عبدالاعلی ، ابن مثنی اور ابن بشار تینوں نے یعقوب بن عتبہ اور جبیر بن محمد بن جبیر سے ان دونوں نے محمد بن جبیر سے اور محمد بن جبیر نے جبیر بن مطعم سے روایت کی ہے ۔ البتہ احمد بن سعید کی سند والی حدیث ہی صحیح ہے ، اس پر ان کی موافقت ایک جماعت نے کی ہے ، جس میں یحییٰ بن معین اور علی بن مدینی بھی شامل ہیں اور اسے ایک جماعت نے ابن اسحاق سے روایت کیا ہے جیسا کہ احمد بن سعید نے بھی کہا ہے ، اور عبدالاعلی ، ابن مثنی اور ابن بشار کا سماع جیسا کہ مجھے معلوم ہوا ہے ، ایک ہی نسخے سے ہے ۔ ... (ض)

حدیث نمبر: 2917 --- حکم البانی: حسن... عبداللہ بن عمرو ؓ کہتے ہیں کہ رئاب بن حذیفہ نے ایک عورت سے شادی کی ، اس کے بطن سے تین لڑکے پیدا ہوئے ، پھر لڑکوں کی ماں مر گئی ، اور وہ لڑکے اپنی ماں کے گھر کے اور اپنی ماں کے آزاد کئے ہوئے غلاموں کی ولاء کے مالک ہوئے ، اور عمرو بن العاص ؓ ان لڑکوں کے عصبہ (یعنی وارث) ہوئے اس کے بعد عمرو بن العاص ؓ نے انہیں شام کی طرف نکال دیا ، اور وہ وہاں مر گئے تو عمرو بن العاص ؓ آئے اور اس عورت کا ایک آزاد کیا ہوا غلام مر گیا اور مال چھوڑ گیا تو اس عورت کے بھائی عمر بن خطاب ؓ کے پاس اس عورت کے ولاء کا مقدمہ لے گئے ، عمر ؓ نے کہا : رسول اللہ ﷺ نے فرمایا : ” جو ولاء اولاد یا باپ حاصل کرے تو وہ اس کے عصبوں کو ملے گی خواہ کوئی بھی ہو (اولاد کے یا باپ کے مر جانے کے بعد ماں کے وارثوں کو نہ ملے گی) “ پھر عمر ؓ نے اس باب میں ایک فیصلہ نامہ لکھ دیا اور اس پر عبدالرحمٰن بن عوف اور زید بن ثابت ؓ اور ایک اور شخص کی گواہی ثابت کر دی ، جب عبدالملک بن مروان خلیفہ ہوئے تو پھر ان لوگوں نے جھگڑا کیا یہ لوگ اپنا مقدمہ ہشام بن اسماعیل یا اسماعیل بن ہشام کے پاس لے گئے انہوں نے عبدالملک کے پاس مقدمہ کو بھیج دیا ، عبدالملک نے کہا : یہ فیصلہ تو ایسا لگتا ہے جیسے میں اس کو دیکھ چکا ہوں ۔ راوی کہتے ہیں پھر عبدالملک نے عمر بن خطاب ؓ کے فیصلہ کے مطابق فیصلہ دیا اور وہ ولاء اب تک ہمارے پاس ہے ۔ ... (ص/ح) ... حدیث متعلقہ ابواب: حدیث ، فرمان رسول ﷺ کا لکھنا ۔ کتابت حدیث ۔

حدیث نمبر: 2390 --- حکم البانی: صحيح... ابوہریرہ ؓ کہتے ہیں کہ ایک شخص نبی اکرم ﷺ کی خدمت میں حاضر ہوا اور کہنے لگا کہ میں ہلاک ہو گیا آپ ﷺ نے پوچھا : ” کیا بات ہے ؟ “ اس نے کہا : میں نے رمضان میں اپنی بیوی سے جماع کر لیا ہے ، آپ ﷺ نے فرمایا : ” کیا تم ایک گردن آزاد کر سکتے ہو ؟ “ اس نے کہا : نہیں ، فرمایا : ” دو مہینے مسلسل روزے رکھنے کی طاقت ہے ؟ “ کہا : نہیں ، فرمایا : ” ساٹھ مسکینوں کو کھانا کھلا سکتے ہو ؟ “ ، کہا : نہیں ، فرمایا : ” بیٹھو “ ، اتنے میں رسول اللہ ﷺ کے پاس کھجوروں کا ایک بڑا تھیلا آ گیا ، آپ ﷺ نے اس سے فرمایا : ” انہیں صدقہ کر دو “ ، کہنے لگا : اللہ کے رسول ! مدینہ کی ان دونوں سیاہ پتھریلی پہاڑیوں کے بیچ ہم سے زیادہ محتاج کوئی گھرانہ ہے ہی نہیں ، اس پر رسول ﷺ ہنسے یہاں تک کہ آپ کے سامنے کے دانت ظاہر ہو گئے اور فرمایا : ” اچھا تو انہیں ہی کھلا دو “ ۔ مسدد کی روایت میں ایک دوسری جگہ « ثناياہ » کی جگہ « أنيابہ » ہے ۔ ... (ص/ح)

حدیث نمبر: 2821 --- حکم البانی: صحيح... رافع بن خدیج ؓ کہتے ہیں کہ میں رسول اللہ ﷺ کے پاس آیا اور عرض کیا : اللہ کے رسول ! ہم کل دشمنوں سے مقابلہ کرنے والے ہیں ، ہمارے پاس چھریاں نہیں ہیں کیا ہم سفید (دھار دار) پتھر یا لاٹھی کے پھٹے ہوئے ٹکڑے (بانس کی کھپچی) سے ذبح کریں ؟ تو رسول اللہ ﷺ نے فرمایا : ” جلدی کر لو جو چیز کہ خون بہا دے اور اللہ کا نام اس پر لیا جائے تو اسے کھاؤ ہاں وہ دانت اور ناخن سے ذبح نہ ہو ، عنقریب میں تم کو اس کی وجہ بتاتا ہوں ، دانت سے تو اس لیے نہیں کہ دانت ایک ہڈی ہے ، اور ناخن سے اس لیے نہیں کہ وہ جبشیوں کی چھریاں ہیں “ ، اور کچھ جلد باز لوگ آگے بڑھ گئے ، انہوں نے جلدی کی ، اور کچھ مال غنیمت حاصل کر لیا ، اور رسول اللہ ﷺ سب سے پیچھے چل رہے تھے تو ان لوگوں نے دیگیں چڑھا دیں ، رسول اللہ ﷺ ان دیگوں کے پاس سے گزرے تو آپ نے انہیں پلٹ دینے کا حکم دیا ، چنانچہ وہ پلٹ دی گئیں ، اور ان کے درمیان آپ ﷺ نے (مال غنیمت) تقسیم کیا تو ایک اونٹ کو دس بکریوں کے برابر قرار دیا ، ایک اونٹ ان اونٹوں میں سے بھاگ نکلا اس وقت لوگوں کے پاس گھوڑے نہ تھے (کہ گھوڑا دوڑا کر اسے پکڑ لیتے) چنانچہ ایک شخص نے اسے تیر مارا تو اللہ نے اسے روک دیا (یعنی وہ چوٹ کھا کر گر گیا اور آگے نہ بڑھ سکا) اس پر نبی اکرم ﷺ نے فرمایا : ” ان چوپایوں میں بھی بدکنے والے جانور ہوتے ہیں جیسے وحشی جانور بدکتے ہیں تو جو کوئی ان جانوروں میں سے ایسا کرے تو تم بھی اس کے ساتھ ایسا ہی کرو “ ۔ ... (ص/ح) ... حدیث متعلقہ ابواب: کس چیز سے ذبح کرنا جائز نہیں ۔ دانت سے ذبح کرنا جائز نہیں ۔ ناخن سے ذبح کرنا جائز نہیں ۔

حدیث نمبر: 4468 --- حکم البانی: حسن صحيح... عبداللہ بن مسعود ؓ کہتے ہیں ایک شخص نبی اکرم ﷺ کی خدمت میں آیا اور عرض کیا : مدینہ کے آخری کنارے کی ایک عورت سے میں لطف اندوز ہوا ، لیکن جماع نہیں کیا ، تو اب میں حاضر ہوں میرے اوپر جو چاہیئے حد قائم کیجئے ، عمر ؓ نے کہا : اللہ نے تیری پردہ پوشی کی تھی تو تو خود بھی پردہ پوشی کرتا تو بہتر ہوتا ، رسول اللہ ﷺ نے اسے کوئی جواب نہیں دیا ، تو وہ شخص چلا گیا ، پھر اس کے پیچھے نبی اکرم ﷺ نے ایک شخص کو بھیجا ، وہ اسے بلا کر لایا تو آپ نے اس پر یہ آیت تلاوت فرمائی « وأقم الصلاۃ طرفى النہار وزلفا من الليل » ” دن کے دونوں سروں میں نماز قائم کرو اور رات کی کچھ ساعتوں میں بھی “ ۔ (ھود : ۱۱۴)   تو ان میں سے ایک شخص نے پوچھا : اللہ کے رسول ! کیا یہ اسی کے لیے خاص ہے ، یا سارے لوگوں کے لیے ہے ؟ آپ ﷺ نے فرمایا : ” سارے لوگوں کے لیے ہے “ ۔ ... (ص/ح)

حدیث نمبر: 707 --- حکم البانی: ضعيف... غزوان کہتے ہیں کہ وہ حج کو جاتے ہوئے تبوک میں اترے ، انہیں ایک اپاہج آدمی نظر آیا ، انہوں نے اس سے اس کا حال پوچھا ، تو اس آدمی نے غزوان سے کہا کہ میں تم سے ایک حدیث بیان کروں گا ، بشرطیکہ تم اس حدیث کو کسی سے اس وقت تک بیان نہ کرنا جب تک تم یہ سننا کہ میں زندہ ہوں ، رسول اللہ ﷺ تبوک میں ایک درخت کی آڑ میں اترے اور فرمایا : ” یہ ہمارا قبلہ ہے “ ، پھر آپ نے اس کی طرف منہ کر کے نماز پڑھنی شروع کی ، میں ایک لڑکا تھا ، دوڑتا ہوا آیا یہاں تک کہ آپ کے اور درخت کے بیچ سے ہو کر گزر گیا ، تو آپ ﷺ نے فرمایا : ” اس نے ہماری نماز کاٹ دی ، اللہ اس کا قدم کاٹ دے “ ، چنانچہ اس روز سے آج تک میں اس پر کھڑا نہ ہو سکا ۔ ... (ض)