حدیث نمبر: 1053 --- حکم البانی: حسن... عبداللہ بن عباس ؓ کہتے ہیں کہ میں نبی اکرم ﷺ کے پاس تھا کہ اس دوران ایک شخص آیا اور اس نے عرض کیا کہ کل رات میں نے ایک خواب دیکھا ہے جیسے سونے والا دیکھتا ہے ، گویا میں ایک درخت کی جڑ میں نماز پڑھ رہا ہوں ، میں نے سجدے کی آیت پڑھی اور سجدہ کیا ، تو درخت نے بھی میرے ساتھ سجدہ کیا ، اور میں نے اس کو یہ کہتے ہوئے سنا  « اللہم احطط عني بہا وزرا واكتب لي بہا أجرا واجعلہا لي عندك ذخرا »   ” اے اللہ ! اس سجدہ کی وجہ سے میرے گناہ ختم کر دے ، اور میرے لیے اجر لکھ دے ، اور اس اجر کو میرے لیے اپنے پاس ذخیرہ بنا دے “ ۔ عبداللہ بن عباس ؓ کہتے ہیں کہ میں نے نبی اکرم ﷺ کو دیکھا کہ آپ ﷺ نے سجدہ کی آیت پڑھی اور سجدہ کیا ، تو میں نے سنا آپ سجدہ میں وہی دعا پڑھ رہے تھے ، جو اس آدمی نے درخت سے سن کر بیان کی تھی ۔ ... (ص/ح)

حدیث نمبر: 2251 --- حکم البانی: حسن... عبدالمجید بن وہب کہتے ہیں کہ مجھ سے عداء بن خالد بن ہوذہ ؓ نے کہا : کیا میں تم کو وہ تحریر پڑھ کر نہ سناؤں جو رسول اللہ ﷺ نے میرے لیے لکھی تھی ؟ میں نے کہا : کیوں نہیں ؟ ضرور سنائیں ، تو انہوں نے ایک تحریر نکالی ، میں نے جو دیکھا تو اس میں لکھا تھا : ” یہ وہ ہے جو عداء بن خالد بن ہوذہ نے محمد ﷺ سے خریدا ، عداء نے آپ سے ایک غلام یا ایک لونڈی خریدی ، اس میں نہ تو کوئی بیماری ہے ، نہ وہ چوری کا مال ہے ، اور نہ وہ مال حرام ہے ، مسلمان سے مسلمان کی بیع ہے “ ۔ ... (ص/ح)

حدیث نمبر: 1417 --- حکم البانی: صحيح... جابر بن عبداللہ ؓ کہتے ہیں کہ رسول اللہ ﷺ ایک درخت کی جڑ ، یا یوں کہا : ایک تنے کے سہارے کھڑے ہو کر خطبہ دیتے تھے ، پھر آپ ﷺ نے ایک منبر بنوا لیا ، تو وہ تنا سسکیاں لے لے کر رونے لگا ، یہاں تک کہ اس کے رونے کی آواز مسجد والوں نے بھی سنی ، رسول اللہ ﷺ اس کے پاس آئے ، اس پر اپنا ہاتھ پھیرا ، تو وہ خاموش ہو گیا ، بعض نے کہا کہ اگر آپ ﷺ اس کے پاس نہ آتے تو وہ قیامت تک روتا رہتا ۔ ... (ص/ح)

حدیث نمبر: 3956 --- حکم البانی: صحيح... عبدالرحمٰن بن عبدرب الکعبہ کہتے ہیں کہ میں عبداللہ بن عمرو بن العاص ؓ کے پاس پہنچا ، وہ کعبہ کے سائے میں بیٹھے تھے ، اور لوگ ان کے پاس جمع تھے ، تو میں نے ان کو کہتے سنا : اس دوران کہ ہم رسول اللہ ﷺ کے ساتھ سفر میں تھے ، آپ نے ایک جگہ قیام کیا ، تو ہم میں سے کوئی خیمہ لگا رہا تھا ، کوئی تیر چلا رہا تھا ، اور کوئی اپنے جانور چرانے لے گیا ، اتنے میں ایک منادی نے آواز لگائی کہ لوگو ! نماز کے لیے جمع ہو جاؤ ، تو ہم نماز کے لیے جمع ہو گئے ، رسول اللہ ﷺ نے کھڑے ہو کر ہمیں خطبہ دیا ، اور فرمایا : ” مجھ سے پہلے جتنے بھی نبی گزرے ہیں ان پر ضروری تھا کہ وہ اپنی امت کی ان باتوں کی طرف رہنمائی کریں جن کو وہ ان کے لیے بہتر جانتے ہوں ، اور انہیں ان چیزوں سے ڈرائیں جن کو وہ ان کے لیے بری جانتے ہوں ، اور تمہاری اس امت کی سلامتی اس کے شروع حصے میں ہے ، اور اس کے اخیر حصے کو بلا و مصیبت لاحق ہو گی ، اور ایسے امور ہوں گے جن کو تم برا جانو گے ، پھر ایسے فتنے آئیں گے کہ ایک کے سامنے دوسرا ہلکا محسوس ہو گا ، مومن کہے گا : اس فتنے میں میری تباہی ہے ، پھر وہ فتنہ ختم ہو جائے گا ، اور دوسرا فتنہ آئے گا ، مومن کہے گا : اس میں میری تباہی ہے پھر وہ بھی ختم ہو جائے گا ، تو جسے یہ بات پسند ہو کہ وہ جہنم سے بچا لیا جائے اور جنت میں داخل کر دیا جائے تو وہ کوشش کرے کہ اس کی موت اس حالت میں آئے کہ وہ اللہ اور یوم آخرت پر ایمان رکھتا ہو ، اور لوگوں کے ساتھ وہ سلوک کرے جو اپنے لیے پسند کرتا ہو کہ لوگ اس کے ساتھ کریں ، اور جو شخص کسی امام سے بیعت کرے ، اور اس کو اپنی قسم کا ہاتھ دے کر دل سے سچا عہد کرے تو اب جہاں تک ہو سکے اس کی اطاعت کرے ، اگر کوئی دوسرا امام آ کر اس سے لڑنے جھگڑنے لگے (اور اپنے سے بیعت کرنے کو کہے) تو اس دوسرے امام کی گردن مار دے “ ۔ عبدالرحمٰن کہتے ہیں کہ میں نے (یہ سن کر) اپنا سر لوگوں میں سے نکال کر کہا : میں اللہ کا واسطہ دے کر آپ سے پوچھتا ہوں : کیا آپ نے یہ حدیث رسول اللہ ﷺ سے سنی ہے ؟ تو انہوں نے اپنے ہاتھ سے اپنے کانوں کی جانب اشارہ کر کے کہا : میرے کانوں نے اسے سنا اور میرے دل نے اسے یاد رکھا ۔ ... (ص/ح)

حدیث نمبر: 3958 --- حکم البانی: صحيح... ابوذر ؓ کہتے ہیں کہ رسول اللہ ﷺ نے فرمایا : ” ابوذر ! اس وقت تمہاری کیا حالت ہو گی جس وقت لوگوں پر موت کی وبا آئے گی یہاں تک کہ ایک گھر یعنی قبر کی قیمت ایک غلام کے برابر ہو گی ، میں نے عرض کیا : جو اللہ اور اس کا رسول میرے لیے پسند فرمائیں (یا یوں کہا : اللہ اور اس کے رسول خوب جانتے ہیں) آپ ﷺ نے فرمایا : ” اس وقت تم صبر سے کام لینا “ ، پھر فرمایا : ” اس وقت تم کیا کرو گے جب لوگ قحط اور بھوک کی مصیبت سے دو چار ہوں گے ، حتیٰ کہ تم اپنی مسجد میں آؤ گے ، پھر تم میں اپنے بستر تک جانے کی قوت نہ ہو گی اور نہ ہی بستر سے اٹھ کر مسجد تک آنے کی قوت ہو گی ، میں نے عرض کیا : اللہ اور اس کے رسول زیادہ جانتے ہیں ، یا کہا (اللہ اور اس کا رسول جو میرے لیے پسند کرے) آپ ﷺ نے فرمایا : ” (اس وقت) تم اپنے اوپر پاک دامنی کو لازم کر لینا “ ، پھر فرمایا : ” تم اس وقت کیا کرو گے جب (مدینہ میں) لوگوں کا قتل عام ہو گا ، حتیٰ کہ مدینہ میں ایک پتھریلا مقام « حجارۃ الزيت » خون میں ڈوب جائے گا “ ، میں نے عرض کیا : اللہ اور اس کے رسول جو میرے لیے پسند فرمائیں ، تو آپ ﷺ نے فرمایا : ” تم ان لوگوں سے مل جانا جن سے تم ہو “ (یعنی اپنے اہل خاندان کے ساتھ ہو جانا) ابوذر ؓ کہتے ہیں : میں نے عرض کیا : ” اللہ کے رسول ! کیا میں اپنی تلوار لے کر ان لوگوں کو نہ ماروں جو ایسا کریں ؟ “ ، آپ ﷺ نے فرمایا : ” اگر تم ایسا کرو گے تب تو تم بھی انہیں لوگوں میں شریک ہو جاؤ گے ، تمہیں چاہیئے کہ (چپ چاپ ہو کر) اپنے گھر ہی میں پڑے رہو “ میں نے عرض کیا : اللہ کے رسول ! اگر وہ میرے گھر میں گھس آئیں ؟ آپ ﷺ نے فرمایا : ” اگر تمہیں ڈر ہو کہ تلوار کی چمک تم پر غالب آ جائے گی ، تو اپنی چادر کا کنارا منہ پر ڈال لینا ، (قتل ہو جانا) وہ قتل کرنے والا اپنا اور تمہارا دونوں کا گناہ اپنے سر لے گا ، اور وہ جہنمی ہو گا “ ۔ ... (ص/ح)

حدیث نمبر: 1082 --- حکم البانی: حسن... عبدالرحمٰن بن کعب بن مالک کہتے ہیں کہ جب میرے والد کی بینائی چلی گئی تو میں انہیں پکڑ کر لے جایا کرتا تھا ، جب میں انہیں نماز جمعہ کے لیے لے کر نکلتا اور وہ اذان سنتے تو ابوامامہ اسعد بن زرارہ ؓ کے لیے استغفار اور دعا کرتے ، میں ایک زمانہ تک ان سے یہی سنتا رہا ، پھر ایک روز میں نے اپنے دل میں سوچا کہ اللہ کی قسم یہ تو بے وقوفی ہے کہ میں اتنے عرصے سے ہر جمعہ یہ بات سن رہا ہوں کہ جب بھی وہ جمعہ کی اذان سنتے ہیں تو ابوامامہ ؓ کے لیے استغفار اور دعا کرتے ہیں ، اور ابھی تک میں نے ان سے اس کی وجہ نہیں پوچھی ، چنانچہ ایک روز معمول کے مطابق انہیں جمعہ کے لیے لے کر نکلا ، جب انہوں نے اذان سنی تو حسب معمول (اسعد بن زرارہ ؓ کے لیے) مغفرت کی دعا کی تو میں نے ان سے کہا : ابا جان ! جب بھی آپ جمعہ کی اذان سنتے ہیں تو اسعد بن زرارہ ؓ کے لیے دعا فرماتے ہیں ، آخر اس کی وجہ کیا ہے ، تو انہوں نے کہا : میرے بیٹے ! اسعد ہی نے ہمیں سب سے پہلے نبی اکرم ﷺ کی مدینہ تشریف آوری سے پہلے قبیلہ بنی بیاضہ کے ہموار میدان « نقیع الخضمات » میں نماز جمعہ پڑھائی ، میں نے سوال کیا : اس وقت آپ لوگوں کی تعداد کیا تھی ؟ کہا : ہم چالیس آدمی تھے ۔ ... (ص/ح)

حدیث نمبر: 3076 --- حکم البانی: صحيح م دون الحجتين وجمل أبي جهل... سفیان ثوری کہتے ہیں کہ رسول اللہ ﷺ نے تین حج کئے ، دو حج ہجرت سے پہلے ، اور ایک حج ہجرت کے بعد مدینہ سے آ کر کیا ، اس حج کے ساتھ آپ نے عمرہ کو بھی ملایا (یعنی قران کیا) اس حج میں نبی اکرم ﷺ اپنے ساتھ جو اونٹ لے کر آئے تھے ، اور جو علی ؓ (یمن سے) لے کر آئے تھے سب ملا کر کل سو اونٹ تھے ، جن میں سے ایک اونٹ ابوجہل کا بھی تھا ، اس کی ناک میں چاندی کا ایک چھلہ تھا ، ان میں سے ۶۳ اونٹوں کو نبی اکرم ﷺ نے اپنے ہاتھ سے نحر کیا ، اور جو باقی رہ گئے انہیں علی ؓ نے نحر کیا ، سفیان سے پوچھا گیا کہ یہ حدیث کس نے روایت کی ہے تو انہوں نے کہا : جعفر صادق نے اپنے والد سے ، انہوں نے جابر ؓ سے اور ابن ابی لیلیٰ نے حکم سے ، حکم نے مقسم سے اور مقسم نے ابن عباس ؓ سے روایت کی ہے ۔ ... (ض)

حدیث نمبر: 3627 --- حکم البانی: ضعيف... عبداللہ بن عباس ؓ کہتے ہیں کہ نبی اکرم ﷺ کا گزر ایک ایسے شخص کے پاس ہوا جس نے مہندی کا خضاب لگا رکھا تھا ، تو آپ ﷺ نے فرمایا : ” یہ کتنا اچھا ہے “ ، پھر آپ ایک دوسرے شخص کے پاس سے گزرے جس نے مہندی اور کتم (وسمہ) کا خضاب لگایا تھا ، آپ ﷺ نے فرمایا : ” یہ اس سے اچھا ہے “ ! پھر آپ کا گزر ایک دوسرے کے پاس ہوا جس نے زرد خضاب لگا رکھا تھا تو آپ ﷺ نے فرمایا : ” یہ ان سب سے اچھا اور بہتر ہے “ ۔ ابن طاؤس کہتے ہیں کہ اسی لیے طاؤس بالوں کو زرد خضاب کیا کرتے تھے ۔ ... (ض)

حدیث نمبر: 627 --- حکم البانی: حسن... حمنہ بنت جحش ؓ سے روایت ہے کہ انہیں رسول اللہ ﷺ کے عہد میں استحاضہ ہو گیا تو وہ آپ ﷺ کے پاس آئیں ، اور عرض کیا : مجھے بری طرح سے سخت استحاضہ ہو گیا ہے ، آپ ﷺ نے ان سے فرمایا : ” شرمگاہ کے اندر تھوڑی روئی رکھ لو “ ، وہ بولیں : وہ اس سے زیادہ سخت ہے ، بہت تیز بہہ رہا ہے ، تو آپ ﷺ نے فرمایا : ” ایک لنگوٹ کی طرح کس لو ، اور اللہ کے علم کے موافق ہر مہینہ میں چھ یا سات روز حیض کے شمار کر لو ، پھر غسل کر کے تیئس یا چوبیس دن تک نماز پڑھو اور روزہ رکھو ، (آسانی کے لیے) ظہر میں دیر اور عصر میں جلدی کر کے دونوں نمازوں کے لیے ایک غسل کر لو ، اسی طرح مغرب میں دیر اور عشاء میں جلدی کر کے دونوں کے لیے ایک غسل کر لو ، اور مجھے ان دونوں طریقوں میں سے یہ زیادہ پسند ہے “ ۔ ... (ض)

حدیث نمبر: 4159 --- حکم البانی: صحيح... جابر بن عبداللہ ؓ کہتے ہیں کہ رسول اللہ ﷺ نے ہم تین سو آدمیوں کو روانہ کیا ، ہم نے اپنے توشے اپنی گردنوں پر لاد رکھے تھے ، ہمارا توشہ ختم ہو گیا ، یہاں تک کہ ہم میں سے ہر شخص کو ایک کھجور ملتی ، کسی نے پوچھا : ابوعبداللہ ! ایک کھجور سے آدمی کا کیا ہوتا ہو گا ؟ جواب دیا : جب وہ بھی ختم ہو گئی تو ہمیں اس کی قدر معلوم ہوئی ، ہم سمندر تک آئے ، آخر ہمیں ایک مچھلی ملی جسے سمندر نے باہر پھینک دیا تھا ، ہم اس میں سے اٹھارہ دن تک کھاتے رہے ۔ ... (ص/ح)