حدیث نمبر: 2395 --- حکم البانی: حسن صحيح... عبداللہ بن عمرو بن العاص ؓ کہتے ہیں کہ ایک شخص نبی اکرم ﷺ کی خدمت میں آیا اور عرض کیا : میں نے اپنی ماں کو ایک باغ دیا تھا ، اور وہ مر گئیں ، اور میرے سوا ان کا کوئی اور وارث نہیں ؟ تو آپ ﷺ نے فرمایا : ” تمہیں تمہارے صدقہ کا ثواب مل گیا ، اور تمہارا باغ بھی تمہیں واپس مل گیا “ ۔ ... (ص/ح)

حدیث نمبر: 3973 --- حکم البانی: صحيح... معاذ بن جبل ؓ کہتے ہیں کہ میں ایک سفر میں نبی اکرم ﷺ کے ساتھ تھا ، ایک دن میں صبح کو آپ سے قریب ہوا ، اور ہم چل رہے تھے ، میں نے عرض کیا : اللہ کے رسول ! آپ مجھے کوئی عمل بتائیے جو مجھے جنت میں داخل کر دے ، اور جہنم سے دور رکھے ، آپ ﷺ نے فرمایا : ” تم نے ایک بہت بڑی چیز کا سوال کیا ہے ، اور بیشک یہ عمل اس شخص کے لیے آسان ہے جس کے لیے اللہ تعالیٰ آسان کر دے ، تم اللہ تعالیٰ کی عبادت کرو ، اس کے ساتھ کسی کو شریک مت کرو ، نماز قائم کرو ، زکاۃ دو ، رمضان کے روزے رکھو اور بیت اللہ کا حج کرو “ ، پھر آپ ﷺ نے فرمایا : ” کیا میں تمہیں بھلائی کے دروازے نہ بتاؤں ؟ روزہ ڈھال ہے ، صدقہ گناہوں کو ایسے ہی مٹاتا ہے جیسے پانی آگ کو بجھاتا ہے ، اور آدھی رات میں آدمی کا نماز (تہجد) ادا کرنا “ ، پھر آپ ﷺ نے یہ آیت : « تتجافى جنوبہم عن المضاجع » (سورۃ السجدۃ : 16) تلاوت فرمائی یہاں تک کہ « جزاء بما كانوا يعملون » تک پہنچے ، پھر فرمایا : ” کیا میں تمہیں دین کی اصل ، اس کا ستون اور اس کی چوٹی نہ بتا دوں ؟ وہ اللہ کی راہ میں جہاد ہے “ ، پھر فرمایا : ” کیا ان تمام باتوں کا جس چیز پر دارومدار ہے وہ نہ بتا دوں “ ؟ میں نے عرض کیا : جی ہاں ضرور بتائیے ، تو آپ ﷺ نے اپنی زبان مبارک پکڑی اور فرمایا : ” اسے اپنے قابو میں رکھو “ ، میں نے عرض کیا : اللہ کے نبی ! کیا ہم جو بولتے ہیں اس پر بھی ہماری پکڑ ہو گی ؟ ، آپ ﷺ نے فرمایا : ” معاذ ! تیری ماں تجھ پر روئے ! لوگ اپنی زبانوں کی کارستانیوں کی وجہ سے ہی اوندھے منہ جہنم میں ڈالے جائیں گے “ ۔ ... (ص/ح)

حدیث نمبر: 2334 --- حکم البانی: صحيح... انس بن مالک ؓ کہتے ہیں کہ نبی اکرم ﷺ امہات المؤمنین ؓ ن میں سے ایک کے پاس تھے ، آپ کی کسی دوسری بیوی نے ایک کھانے کا پیالہ بھیجا ، پہلی بیوی نے (غصہ سے کھانا لانے والے) کے ہاتھ پر مارا ، اور پیالہ گر کر ٹوٹ گیا ، رسول اللہ ﷺ نے دونوں ٹکڑوں کو اٹھا کر ایک کو دوسرے سے جوڑا اور اس میں کھانا اکٹھا کرنے لگے اور فرماتے جاتے تھے : تمہاری ماں کو غیرت آ گئی ہے (کہ میرے گھر اس نے کھانا کیوں بھیجا) ، تم کھانا کھاؤ ، لوگوں نے کھایا ، پھر جن کے گھر میں آپ ﷺ تھے اپنا پیالہ لائیں ، تو آپ نے یہ صحیح سالم پیالہ قاصد کو عنایت کر دیا ، اور ٹوٹا ہوا پیالہ اس بیوی کے گھر میں رکھ چھوڑا جس نے اسے توڑا تھا ۔ ... (ص/ح)

حدیث نمبر: 3807 --- حکم البانی: صحيح... ابوہریرہ ؓ سے روایت ہے کہ وہ ایک دن درخت لگا رہے تھے کہ رسول اللہ ﷺ ان کے پاس سے گزرے اور فرمایا : ” ابوہریرہ ! تم کیا لگا رہے ہو “ ؟ میں نے عرض کیا کہ میں درخت لگا رہا ہوں ، آپ ﷺ نے فرمایا : ” کیا میں تمہیں اس سے بہتر درخت نہ بتاؤں “ ؟ انہوں نے عرض کیا : کیوں نہیں ؟ آپ ضرور بتلائیے اللہ کے رسول ! آپ ﷺ نے فرمایا : ” تم « سبحان اللہ والحمد للہ ولا إلہ إلا اللہ واللہ أكبر » کہا کرو ، تو ہر ایک کلمہ کے بدلے تمہارے لیے جنت میں ایک درخت لگایا جائے گا “ ۔ ... (ض)

حدیث نمبر: 1999 --- حکم البانی: صحيح... مسور بن مخرمہ ؓ کہتے ہیں کہ علی بن ابی طالب ؓ نے ابوجہل کی بیٹی کو پیغام دیا جب کہ ان کے عقد میں نبی اکرم ﷺ کی صاحب زادی فاطمہ ؓ موجود تھیں ، فاطمہ ؓ نے یہ خبر سنی تو نبی اکرم ﷺ کے پاس آ کر کہا : آپ کے متعلق لوگ کہتے ہیں کہ آپ ﷺ کو اپنی بیٹیوں کے لیے غصہ نہیں آتا ، اب علی ؓ ابوجہل کی بیٹی سے نکاح کرنے والے ہیں ۔ مسور کہتے ہیں : یہ خبر سن کر نبی اکرم ﷺ (منبر پر) کھڑے ہوئے ، جس وقت آپ نے خطبہ پڑھا میں نے آپ ﷺ کو فرماتے سنا : ” امابعد ، میں نے اپنی بیٹی زینب کا نکاح ابوالعاص بن ربیع سے کیا ، انہوں نے جو بات کہی تھی اس کو سچ کر دکھایا میری بیٹی فاطمہ میرے جسم کا ایک ٹکڑا ہے ، اور مجھے ناپسند ہے کہ تم لوگ اسے فتنے میں ڈالو ، قسم اللہ کی ، اللہ کے رسول کی بیٹی اور اللہ کے دشمن کی بیٹی دونوں ایک شخص کے نکاح میں کبھی اکٹھی نہ ہوں گی ، یہ سن کر علی ؓ شادی کے پیغام سے باز آ گئے ۔ ... (ص/ح)

حدیث نمبر: 3303 --- حکم البانی: صحيح... انس ؓ کہتے ہیں کہ ام سلیم ؓ نے میرے ساتھ رسول اللہ ﷺ کی خدمت میں ایک ٹوکرا بھیجا ، جس میں تازہ کھجور تھے ، میں نے آپ کو نہیں پایا ، آپ ﷺ اپنے ایک غلام کے پاس قریب میں تشریف لے گئے تھے ، اس نے آپ کو دعوت دی تھی ، اور آپ کے لیے کھانا تیار کیا تھا ، آپ کھا رہے تھے کہ میں بھی جا پہنچا تو آپ نے مجھے بھی اپنے ساتھ کھانے کے لیے بلایا ، (غلام نے) گوشت اور کدو کا ثرید تیار کیا تھا ، میں دیکھ رہا تھا کہ آپ ﷺ کو کدو بہت اچھا لگ رہا ہے ، تو میں اس کو اکٹھا کر کے آپ ﷺ کی طرف بڑھانے لگا ، پھر جب ہم اس میں سے کھا چکے ، تو آپ اپنے گھر واپس تشریف لائے ، میں نے (تازہ کھجور کا) ٹوکرا آپ کے سامنے رکھ دیا ، آپ ﷺ کھانے لگے اور آپ تقسیم بھی کرتے جاتے تھے ، یہاں تک کہ اسے بالکل ختم کر دیا ۔ ... (ص/ح)

حدیث نمبر: 3559 --- حکم البانی: صحيح... ابو سعید خدری ؓ سے روایت ہے کہ نبی اکرم ﷺ نے دو طرح کے پہناوے سے منع فرمایا ہے ، ایک « اشتمال صماء » سے ، دوسرے ایک کپڑے میں « احتباء » سے کہ اس کی شرمگاہ پر کچھ نہ ہو ۔ ... (ص/ح)

حدیث نمبر: 4284 --- حکم البانی: صحيح... ابو سعید خدری ؓ کہتے ہیں کہ رسول اللہ ﷺ نے فرمایا : ” (قیامت کے دن) ایک نبی آئے گا اور اس کے ساتھ دو ہی آدمی ہوں گے ، اور ایک نبی آئے گا اس کے ساتھ تین آدمی ہوں گے ، اور کسی نبی کے ساتھ زیادہ لوگ ہوں گے ، کسی کے ساتھ کم ، اس نبی سے پوچھا جائے گا : کیا تم نے اپنی قوم تک اللہ تعالیٰ کا پیغام پہنچایا تھا ؟ وہ کہے گا : ” جی ہاں “ پھر اس کی قوم بلائی جائے گی اور پوچھا جائے گا : کیا اس نے تم کو اللہ کا پیغام پہنچا دیا تھا ؟ وہ کہیں گے : ” نہیں “ نبی سے پوچھا جائے گا : تمہارا گواہ کون ہے ؟ وہ کہے گا : محمد اور ان کی امت ، پھر محمد کی امت بلائی جائے گی اور کہا جائے گا : کیا اس نے اللہ تعالیٰ کا پیغام پہنچا دیا تھا ؟ وہ کہے گی : ” جی ہاں “ اس سے پوچھا جائے گا : تمہیں کیسے معلوم ہوا ؟ جواب دے گی کہ ہمارے نبی نے ہم کو یہ بتایا کہ رسولوں نے پیغام پہنچا دیا ہے تو ہم نے ان کی تصدیق کی ، پھر آپ ﷺ نے فرمایا : ” یہی اللہ تعالیٰ کے قول : « وكذلك جعلناكم أمۃ وسطا لتكونوا شہداء على الناس ويكون الرسول عليكم شہيدا » ” اسی طرح ہم نے تم کو امت وسط بنایا تاکہ تم گواہ رہو لوگوں پر اور رسول گواہ رہیں تمہارے اوپر “ (سورۃ البقرۃ : 143) کا مطلب ہے “ ۔ ... (ص/ح)

حدیث نمبر: 3154 --- حکم البانی: صحيح... ابوزید انصاری ؓ کہتے ہیں کہ رسول اللہ ﷺ کا گزر انصار کے گھروں میں سے ایک گھر سے ہوا ، تو آپ نے وہاں گوشت بھوننے کی خوشبو پائی ، آپ ﷺ نے فرمایا : ” کس شخص نے ذبح کیا ہے “ ؟ ہم میں سے ایک شخص آپ کی طرف نکلا ، اور آ کر اس نے عرض کیا کہ اللہ کے رسول ! میں نے نماز عید سے پہلے ذبح کر لیا ، تاکہ گھر والوں اور پڑوسیوں کو کھلا سکوں ، آپ ﷺ نے اسے دوبارہ قربانی کا حکم دیا ، اس شخص نے عرض کیا : قسم ہے اس ذات کی جس کے سوا کوئی سچا معبود نہیں ، میرے پاس ایک جذعہ یا بھیڑ کے بچہ کے علاوہ کچھ بھی نہیں ، آپ ﷺ نے فرمایا : ” اسی کو ذبح کر لو اور تمہارے بعد کسی کے لیے جذعہ کافی نہیں ہو گا “ ۔ ... (ص/ح)

حدیث نمبر: 2193 --- حکم البانی: ضعيف... عبداللہ بن عمرو بن العاص ؓ سے روایت ہے کہ نبی اکرم ﷺ نے (عربان کی بیع) سے منع فرمایا ہے ۔ ابوعبداللہ (ابن ماجہ) کہتے ہیں کہ عربان : یہ ہے کہ آدمی ایک جانور سو دینار میں خریدے ، اور بیچنے والے کو اس میں سے دو دینار بطور بیعانہ دیدے ، اور کہے : اگر میں نے جانور نہیں لیا تو یہ دونوں دینار تمہارے ہیں ۔ بعض لوگوں نے کہا ہے واللہ اعلم : (عربان یہ ہے کہ) آدمی ایک چیز خریدے پھر بیچنے والے کو ایک درہم یا زیادہ یا کم دے ، اور کہے اگر میں نے یہ چیز لے لی تو بہتر ، ورنہ یہ درہم تمہارا ہے ۔ ... (ص/ح)