حدیث نمبر: 2073 --- رقم الحديث ترقيم الباني: 2109... سیدنا انس بن مالک ؓ سے روایت ہے ، وہ کہتے ہیں : ہوازن قبیلہ کے لوگ حنین والے دن عورتوں ، بچوں ، اونٹوں اور بکریوں سمیت آ گئے ۔ ان کو قطاروں میں کھڑا کر دیا تاکہ رسول اللہ ﷺ کے مقابلہ میں اپنی کثرت کو ظاہر کریں ۔ مسلمانوں اور مشرکوں کے درمیان مڈبھیڑ ہوئی تو مسلمان پیٹھ پھیر کر بھاگ گئے ، جیسا کہ اللہ تعالیٰ نے فرمایا ہے ۔ رسول اللہ ﷺ نے فرمایا : ”میں اللہ کا بندہ اور اس کا رسول ہوں ۔ “ مزید فرمایا : ”انصار کی جماعت ! میں اللہ کا بندہ اور اس کا رسول ہوں ۔ “ اللہ تعالیٰ نے مشرکین کو شکست دے دی ، نہ کسی کو نیزے کا زخم لگا تھا اور نہ تلوار کی چوٹ ، نبی کریم ﷺ نے اس دن فرمایا : ”جس نے کسی کافر کو قتل کیا تو اس (مقتول) سے چھینا ہوا مال اسی (قاتل) کے لیے ہو گا ۔ “ ابوقتادہ ؓ نے اس دن بیس آدمی قتل کئے اور ان کا مال و متاع بھی لے لیا ۔ سیدنا ابوقتادہ ؓ نے کہا : اے اللہ کے رسول ! میں نے ایک آدمی کے کندھے کے پٹھے پر مارا اور اس پر زرہ تھی ۔ اس کا چھینا ہوا مال میرے پکڑنے سے پہلے کسی اور نے لے لیا ۔ اے اللہ کے رسول ! ذرا دیکھئیے ، وہ شخص کون ہے ؟ ایک آدمی نے کہا : اے اللہ کے رسول ! میں نے وہ مال لے لیا تھا ۔ آپ قتادہ کو اپنی طرف سے راضی کر دیں اور وہ مال میرے پاس ہی رہنے دیں ، نبی کریم ﷺ خاموش ہو گئے اور آپ سے جس چیز کا بھی مطالبہ کیا جاتا ، آپ دے دیتے تھے ، یا پھر خاموش ہو جاتے ۔ سیدنا عمر ؓ نے کہا : نہیں ، اللہ کی قسم ! (ایسے نہیں ہو گا) اللہ تعالیٰ نے اپنے شیروں میں سے ایک شیر کو مال دیا ہو اور آپ ﷺ تجھے دے دیں ۔ یہ سن کر رسول اللہ ﷺ مسکرا پڑے ۔

حدیث نمبر: 2770 --- رقم الحديث ترقيم الباني: 3579... نبی کریم ﷺ نے فرمایا : ”ایک آدمی ہمارے پیچھے چلتا رہا ، جب تم نے ہمیں دعوت دی تھی ، اس وقت وہ موجود نہیں تھا ، اب اگر تم اسے اجازت دے دو تو وہ اندر آ جائے ۔ “ یہ حدیث سیدنا ابومسعود بدری اور سیدنا جابر بن عبداللہ ؓ سے مروی ہے ۔ یہ ابومسعود بدری کی حدیث کے الفاظ ہیں ، (‏‏‏‏پوری روایت یوں ہے) : سیدنا ابو مسعود بدری ؓ سے روایت ہے کہ ایک آدمی جسے ابوشعیب کہا جاتا تھا ، اپنے قصاب غلام کے پاس آیا اور اسے حکم دیا کہ پانچ آدمیوں کے لیے کھانا تیار کرو کیونکہ اس نے رسول اللہ ﷺ کے چہرے سے محسوس کیا ہے کہ آپ بھوکے ہیں ۔ اس نے کھانا تیار کیا ، پھر اس نے نبی کریم ﷺ اور آپ کے ہم نشینوں کو بلا بھیجا ، جب نبی اکرم ﷺ کھڑے ہوئے تو ایک آدمی ان کے پیچھے چل پڑا ، جو اس وقت موجود نہیں تھا جب دعوت دی گئی تھی ۔ جب رسول اللہ ﷺ (‏‏‏‏داعی کے گھر کے) دروازے پر پہنچے تو گھر والے سے فرمایا : . . . “ اس نے کہا : میں اسے اجازت دیتا ہوں ، وہ اندر آ جائے ۔

حدیث نمبر: 2087 --- رقم الحديث ترقيم الباني: 30... سیدنا ابوہریرہ ؓ سے روایت ہے کہ رسول اللہ ﷺ نے فرمایا : ”ایک وقت ایک کتا کنویں کے گرد چکر لگا رہا تھا ، اسے پیاس مارے دے رہی تھی ، اچانک اسے بنی اسرائیل کی فاحشہ عورتوں میں سے ایک بدکار عورت نے دیکھا ، بس اس نے اپنا موزہ اتارا اور اس کے ذریعے سے اس نے اس کے لیے (کنویں سے) پانی کھینچا اور اسے پلا دیا ، پس اس کے اس عمل کی وجہ سے اسے بخش دیا گیا ۔ “

حدیث نمبر: 3495 --- رقم الحديث ترقيم الباني: 3585... رسول اللہ ﷺ نے فرمایا : ” (‏‏‏‏زمزم کا پانی) مبارک ہے ، یہ کھانے کا کھانا ہے ۔ “ یہ حدیث سیدنا ابوذر ، سیدنا عبداللہ بن عباس رضوان اللہ علیہم اجمعین سے مروی ہے ۔ یہ سیدنا ابوذر غفاری ؓ کی حدیث ہے ، وہ کہتے ہیں ہم اپنی قوم غفار ، جو حرمت والے مہینے کو حلال سمجھتے تھے ، سے وفد کی صورت میں نکلے ۔ میں (‏‏‏‏ابوذر غفاری ؓ ) ، میرا بھائی انیس اور میری ماں روانہ ہوئے ، ہم اپنے ماموں کے پاس آ کر ٹھہرے ۔ انہوں نے ہماری بڑی عزت کی اور ہمارے ساتھ احسان کیا ، لیکن ان کی قوم ہم سے حسد کرنے لگی ۔ اس لیے انہوں نے کہا : جب تو اپنے اہل خانہ سے باہر جاتا ہے تو انیس ان کے پاس آ جاتا ہے ۔ پس ہمارا ماموں آیا اور جو بات اسے کہی گئی ، اس کے سلسلے میں ہماری غیبت کرنے لگ گیا ۔ میں نے اسے کہا : جو تو نے ہمارے ساتھ نیکی کی تھی ، اسے تو تو نے گدلا کر دیا ہے اور آئندہ ہم آپ کے پاس نہیں آئیں گے ۔ ہم اپنی اونٹنیوں کے قریب پہنچے اور سوار ہو کر چل پڑے ، میرے ماموں نے کپڑا اوڑھ کر رونا شروع کر دیا ۔ ہم چلتے گئے اور مکہ کے قریب جا کر پڑاؤ ڈالا ۔ انیس ہماری اونٹنیوں سے دور رہنے لگ گیا ۔ وہ دونوں نجومی کے پاس گئے ، اس نے انیس کو منتخب کیا ، پس انیس ہماری اور اتنی اور اونٹنیاں لے کر ہمارے پاس آیا ۔ اس نے کہا : اے میرے بھتیجے ! میں تو رسول اللہ ﷺ کو ملنے سے تین برس پہلے سے نماز پڑھ رہا تھا ۔ میں نے کہا : کس کے لیے ؟ اس نے کہا : اللہ تعالیٰ کے لیے ۔ میں نے کہا : تو کس طرف رخ کرتا تھا ۔ اس نے کہا : جس طرف میرا رب میرا رخ موڑ دیتا تھا ۔ میں رات کے آخری حصے میں نماز عشاء ادا کرتا تھا ۔ اب میں گم سم ہو کر لیٹ گیا ، یہاں تک کہ سورج چڑھ آیا ۔ انیس نے کہا : مجھے مکہ میں کوئی کام ہے ، تو مجھے کفایت کر ۔ انیس چلا گیا ، مکہ پہنچ گیا اور مجھے اچھائی کا بدلہ برائی سے دیا ۔ پھر وہ واپس آ گیا ۔ میں نے پوچھا : تو نے کیا کیا ہے ؟ اس نے کہا : میں مکہ میں ایک ایسے آدمی کو ملا ہوں جو تیرے دین پر ہے ، وہ خیال کرتا ہے کہ اللہ تعالیٰ نے اسے مبعوث فرمایا ہے ۔ میں نے کہا : لوگ اس کے بارے میں کیا کہتے ہیں ؟ اس نے کہا : لوگ اسے شاعر ، نجومی اور جادوگر کہتے ہیں ۔ انیس خود بھی ایک شاعر تھا ۔ اس نے کہا : لیکن میں نے نجومیوں کا کلام سنا ہے اور اس کے کلام کو زبان اور شعر...

حدیث نمبر: 600 --- رقم الحديث ترقيم الباني: 2582... سیدنا طلق بن علی ؓ سے روایت ہے ، وہ کہتے ہیں : ہم وفد کی صورت میں نبی کریم ﷺ کے پاس آئے ، ہم نے آپ ﷺ کی بیعت کی ، آپ ﷺ کے ساتھ نماز پڑھی اور آپ ﷺ کو بتایا کہ ہماری زمین میں ہمارا ایک گرجا ہے ، (ہم وہاں مسجد تعمیر کرنا چاہتے ہیں اس لیے) ہم نے آپ سے آپ کے وضو کا بچا ہوا پانی طلب کیا ۔ آپ ﷺ نے پانی منگوایا ، وضو کیا ، کلی کی اور اسے ایک برتن میں ڈال دیا اور ہمیں حکم دیتے ہوئے فرمایا : ”چلے جاؤ ، جب اپنے علاقے میں پہنچو تو گرجا گھر گرا دینا ، وہاں یہ پانی چھڑکنا اور وہاں مسجد تعمیر کر لینا ۔ “ انہوں نے کہا : ہمارا علاقہ بہت دور ہے اور شدید گرمی پڑ رہی ، یہ پانی تو خشک ہو جائے گا ؟ آپ ﷺ نے فرمایا : ” (راستے میں) اس میں مزید پانی ملاتے جانا ، وہ اس کی پاکیزگی میں اور اضافہ کرے گا ۔ “ ہم نکل پڑے ، حتی کہ اپنے علاقے میں پہنچ گئے ، ہم نے گرجا گھر گرا دیا ، وہاں پانی چھڑکا اور اسے مسجد کا روپ دے دیا ، پھر ہم نے وہاں اذان دی ۔ قبیلہ بنوطی کے ایک پادری نے اذان سنی اور کہا : یہ تو دعوت حق ہے ۔ پھر وہ ایک ٹیلے کی طرف نکل گیا اور اس واقعہ کے بعد ہم اسے نہ دیکھ پائے ۔

حدیث نمبر: 239 --- رقم الحديث ترقيم الباني: 1927... سیدنا انس ؓ سے روایت ہے کی رسول اللہ ﷺ نے فرمایا : ”ظلم کی تین قسمیں ہیں : (۱) اللہ تعالیٰ ایک ظلم کو کسی صورت نہیں چھوڑے گا ، (۲) ایک ظلم کو بخش دے گا اور (۳) ایک ظلم معاف نہیں کیا جائے گا ۔ (ان کی تفصیل یہ ہے) جس ظلم کو کسی صورت میں نہیں چھوڑا جائے گا ، وہ شرک ہے جسے اللہ تعالیٰ معاف نہیں کرے گا ۔ جس ظلم کو بخش دیا جائے گا وہ اللہ اور بندے کے مابین کیا ہوا ظلم ہے ۔ اور وہ ظلم جس کو معاف نہیں کیا جائے گا ، وہ بندوں کا آپس میں ایک دوسرے پر کیا ہوا ظلم ہے ۔ اللہ تعالیٰ ہر صورت میں بعض (مظلوموں) کو بعض (ظالموں) سے قصاص دلوائے گا ۔

حدیث نمبر: 3661 --- رقم الحديث ترقيم الباني: 1793... سیدنا ابوسعید خدری ؓ بیان کرتے ہیں کہ رسول اللہ ﷺ نے فرمایا : ”یاجوج ماجوج کھول دیے جائیں گے اور وہ لوگوں پر نکل پڑیں گے ، جیسا کہ اللہ تعالیٰ نے فرمایا : ‏‏‏‏ ”وہ ہر بلندی سے دوڑتے ہوئے آئیں گے ۔ “ (‏‏‏‏سورہ انبیاء : ۹۶) وہ زمین میں پھیل جائیں گے ، مسلمان ان سے بچنے کے لیے اپنے شہروں اور قلعوں میں سمٹ جائیں گے اور اپنے مویشی اپنے ساتھ لے جائیں گے ۔ یاجوج ماجوج زمین کا پانی پی جائیں گے ، (‏‏‏‏اور اتنا پانی پئیں گے کہ) ان کے بعض افراد ایک نہر کے پاس سے گزریں گے اور وہ اس کا سارا پانی پی جائیں گے اور نہر خشک ہو جائے گی ۔ جب ان کے بعد والوں کی وہاں سے گزر ہو گا تو وہ کہیں گے کہ کسی دور میں یہاں پانی ہوتا تھا ۔ جب قلعوں یا شہروں میں پناہ گزین لوگوں کے علاوہ کوئی اور انسان نہیں بچے گا (‏‏‏‏جو انہیں نظر آ سکے) تو وہ کہیں گے : یہ تھے اہل زمین ، (‏‏‏‏ان کا قصہ تو تمام ہو چکا) ہم ان سے فارغ ہو گئے ہیں ، اب اہل آسمان باقی ہیں ۔ (‏‏‏‏ان پر غلبہ پانے کی سوچنی چاہیئے) سو ان کا ایک فرد نیزے کو قدرے زور سے حرکت دے گا اور آسمان کی طرف پھینکے گا ، وہ خون آلود لوٹے گا ، یہ ان کے لیے ابتلاء و آزمائش اور فتنہ و فساد کا سبب بنے گا ۔ اسی حالت پر ہوں گے اچانک اللہ تعالیٰ ان کی گردنوں میں ٹڈی کی طرح کا کیڑا پیدا کر دیں گے ، جس کی وجہ سے وہ سب کے سب مر جائیں اور ان کی طرف سے کوئی آہٹ سنائی نہیں دے گی ۔ مسلمان کہیں گے : کیا کوئی آدمی ایسا ہے جو اپنے حق میں خطرہ مول لے کر دیکھے کہ دشمن کیا کر رہے ہیں ؟ ایک آدمی اجر و ثواب کی نیت سے باہر نکلے گا ، اس کو اپنے بارے میں یہی گمان ہو گا کہ وہ قتل کر دیا جائے گا ۔ وہ (‏‏‏‏اپنے قلعے یا شہر سے) نیچے اترے گا اور انہیں مرا ہوا پائے گا ، ان کے لاشے ایک دوسرے پر پڑے ہوں گے ۔ وہ پکارے گا : مسلمانوں کی جماعت ! ذرا غور سے ! خوش ہو جاؤ ، اللہ تعالیٰ نے تمہیں دشمنوں سے کفایت کیا ہے ۔ وہ اپنے قلعوں اور شہروں سے نکلیں گے ، اپنے مویشیوں کو چرائیں گے ، ان کے گوشت کے علاوہ ان کا کوئی اور چارہ نہیں ہو گا ، وہ گوشت کھا کر اتنے موٹے تازے ہو جائیں گے ، جتنا کہ وہ بہترین چارہ کھا کر ہوتے تھے ۔ “

حدیث نمبر: 3844 --- رقم الحديث ترقيم الباني: 50... ابونضرہ کہتے ہیں : ایک صحابی بیمار ہو گئے ، اس کے ساتھی اس کی تیماری داری کرنے کے لیے اس کے پاس گئے ، وہ رونے لگ گیا ۔ اس سے پوچھا گیا : اللہ کے بندے ! کیوں رو رہے ہو ؟ کیا رسول اللہ ﷺ نے تجھے یہ نہیں کہا تھا کہ ”اپنی مونچھیں کاٹ دو اور پھر اسی چیز پر برقرار رہنا ، یہاں تک کہ مجھے آ ملو ۔ “ ؟ اس نے کہا : کیوں نہیں ، (‏‏‏‏آپ ﷺ نے واقعی یہ بشارت مجھے دی تھی) لیکن میں نے آپ ﷺ کو یہ بھی فرماتے ہوئے سنا کہ بیشک اللہ تبارک و تعالیٰ نے دائیں ہاتھ سے (‏‏‏‏اپنے بندوں کی) کی ایک مٹھی بھری اور فرمایا کہ اس مٹھی والے (‏‏‏‏جنت) کے لیے ہیں اور مجھے کسی کی کوئی پرواہ نہیں ہے ، پھر دوسرے ہاتھ سے دوسری مٹھی بھری اور فرمایا کہ اس مٹھی والے (‏‏‏‏جہنم) کے لیے ہیں اور میں کسی کی کوئی پروا نہیں کرتا ۔ “ ‏‏‏‏ (‏‏‏‏ ‏‏‏‏میرے رونے کی وجہ یہ فکر ہے کہ) میں یہ نہیں جانتا کہ میں کس مٹھی میں ہوں گا ۔

حدیث نمبر: 86 --- رقم الحديث ترقيم الباني: 3587... علی بن حسین سے روایت ہے کہ سیدنا عبداللہ بن عباس ؓ کہتے ہیں : مجھے ایک انصار صحابی نے بیان کیا کہ وہ ایک رات کو رسول اللہ ﷺ کے ساتھ بیٹھا ہوا تھا ، ایک سیارہ ٹوٹ کر گر پڑا اور اس کی وجہ سے روشنی پھیل گئی ۔ رسول اللہ ﷺ نے ان سے پوچھا : ” تم جاہلیت میں اس قسم کے سیارے کے بارے میں کیا کہتے تھے ؟ “ انہوں نے کہا : (حقیقی صورت حال تو) اللہ اور اس کا رسول ہی بہتر جانتے ہیں ۔ ہم یوں کہا کرتے تھے : آج رات کوئی عظیم آدمی پیدا ہوا ہے یا فوت ہوا ہے ۔ رسول اللہ ﷺ نے فرمایا : ” کسی کی موت و حیات کی وجہ سے سیارے نہیں ٹوٹتے ۔ (درحقیقت) جب اللہ تبارک و تعالیٰ کوئی فیصلہ کرتے ہیں تو حاملین عرش اس کی تسبیح بیان کرتے ہیں ، پھر اس سے نچلے والے آسمان کے فرشتے اللہ کی تسبیح شروع کرتے ہیں ، حتیٰ کہ آسمان دنیا والے فرشتے بھی تسبیح میں مصروف ہو جاتے ہیں پھر (ساتویں) آسمان والے فرشتے حاملین عرش سے پوچھتے ہیں : تمہارے رب نے کیا کہا ؟ وہ انہیں جواب دیتے ہیں کہ یہ کچھ کہا ، اسی طرح ایک آسمان والے دوسرے سے پوچھتے ہیں اور بات چلتے چلتے آسمان دنیا تک پہنچ جاتی ہے ، (جب آسمان دنیا پر اللہ تعالیٰ کے فیصلے کی بات ہوتی ہے تو اس کے نیچے تک پہنچ جانے والے) جن بات اچک کر اپنے (شیطانی) اولیا تک پہچانے کی کوشش کرتے ہیں ، (ان کو جلانے کے لیے) ان پر سیارے گرائے جاتے ہیں ۔ (بسا اوقات جل جاتے ہیں اور بعض اوقات نکل آتے ہیں) وہ جو کچھ وہاں سے سن کر آتے ہیں وہ تو حق ہوتا ہے لیکن اس کے ساتھ کئی جھوٹ گھڑتے ہیں اور اپنی طرف سے اضافے کرتے ہیں ۔ “

حدیث نمبر: 2076 --- رقم الحديث ترقيم الباني: 20... سیدنا عبداللہ بن جعفر ؓ کہتے ہیں کہ رسول اللہ ﷺ نے مجھے سواری پر اپنے پیچھے بٹھا لیا اور میرے ساتھ رازداری سے ایک بات کی جو میں کسی سے بیان نہیں کروں گا اور رسول اللہ ﷺ کو قضائے حاجت کے لیے کسی اونچی چیز (دیوار ، ٹیلہ وغیرہ) یا کھجور کے جھنڈ کے ساتھ پردہ کرنا سب سے زیادہ پسند تھا ۔ سو آپ ﷺ ایک انصاری آدمی کے باغ میں داخل ہوئے تو وہاں ایک اونٹ تھا ۔ پس جب اونٹ نے رسول اللہ ﷺ کو دیکھا ، تو بلبلایا اور اس کی آنکھوں سے آنسو جاری ہو گئے ۔ نبی کریم ﷺ اس کے پاس آئے اور اس کی کوہان اور کان کے عقبی حصے پر ہاتھ پھیرا تو اس کو قرار آ گیا ۔ آپ ﷺ نے پوچھا : ”اس اونٹ کا مالک کون ہے ؟ یہ اونٹ کس کا ہے ؟ “ پس ایک نوجوان انصاری آپ کے پاس آیا اور کہا : اے اللہ کے رسول ! یہ میرا ہے ۔ آپ ﷺ نے فرمایا : ”کیا تو اس جانور کے بارے میں ، جس کا اللہ نے تجھ کو مالک بنایا ہے ، اللہ سے نہیں ڈرتا ؟ کیونکہ اس نے مجھ سے شکایت کی ہے کہ تو اسے بھوکا رکھتا ہے اور (مشقت زیادہ لے کر) تھکا دیتا ہے ۔ “