حدیث نمبر: 1705 --- رقم الحديث ترقيم الباني: 3394... سیدنا ابوسعید خدری ؓ کہتے ہیں : میں رسول اللہ ﷺ کے ساتھ ایک جنازے میں حاضر ہوا ، آپ ﷺ نے فرمایا : ” لوگوں ! اس امت (انسانیت) کو قبروں میں آزمایا جاتا ہے ، جب کسی شخص کو دفن کر دیا جاتا ہے اور اس کے ساتھی واپس چلے جاتے ہیں تو ایک فرشتہ اس کے پاس آتا ہے ، اس کے ہاتھ میں کوٹنے چھیدنے کا آلہ ہوتا ہے ، وہ اس شخص کو بٹھا کر پوچھتا ہے : اس آدمی کے بارے میں تیرا کیا خیال ہے ؟ اگر وہ مومن ہو تو جواب دیتا ہے کہ میں گواہی دیتا ہوں کہ اللہ ہی معبود برحق ہے اور محمد ( ﷺ ) اس کے بندے اور رسول ہیں ۔ وہ کہتا ہے : تو نے سچ کہا : ۔ پھر جہنم کی طرف سے ایک دروازہ کھول دیا جاتا ہے ، وہ کہتا ہے کہ دیکھ اگر تو اپنے رب کے ساتھ کفر کرتا تو یہ تیرا ٹھکانہ ہوتا ۔ اب جبکہ تو ایمان لایا ہے ، تیری منزل یہ ہے ، اس کے لئے جنت کا دروازہ کھول دیا جاتا ہے ۔ اب وہ شخص (جنت میں داخل ہونے کے لیے) اٹھنے کا ارادہ کرتا ہے ، لیکن فرشتہ کہتا ہے : ٹھیر جا ! پھر اس کی قبر کو وسیع کر دیتا ہے ۔ اگر دفن کیا جانے والا کافر یا منافق ہو تو فرشتہ پوچھتا ہے کہ تو اس آدمی کے بارے میں کیا کہتا ہے ؟ وہ جواب دیتا ہے کہ میں تو نہیں جانتا ، میں نے لوگوں کو جو کچھ کہتے سنا ، اسی طرح کہا تو تھا (لیکن اب میرے ذہن میں کوئی جواب نہیں ہے) ۔ فرشتہ کہتا ہے : نہ تو نے سوجھ بوجھ حاصل کی ، نہ تو نے پڑھا اور نہ تو نے ہدایت پائی ۔ پھر جنت کی طرف سے ایک دروازہ کھول دیا جاتا ہے ، وہ کہتا ہے کہ یہ تیری منزل ہوتی بشرطیکہ تو اپنے رب پر ایمان لاتا ، اب جبکہ تو کافر ہے ، اللہ تعالیٰ نے تجھے اس کے بدلے یہ ٹھکانہ دیا ہے ، اتنے میں جہنم کی طرف سے دروازہ کھول دیتا ہے اور اس کے سر پر وہ آلہ (اس زور سے) مارتا ہے کہ جن و انس کے علاوہ ہر کوئی اس کی آواز سنتا ہے ۔ یہ حدیث سن کر بعض لوگوں نے کہا : اے اللہ کے رسول ! جو شخص بھی فرشتے کے ہاتھ میں وہ آلہ دیکھے گا وہ (دہشت کی وجہ سے) بے شعور سا ہو کر رہ جائے گا ؟ رسول اللہ ﷺ نے جواباً یہ آیت تلاوت فرمائی : « يُثَبِّتُ اللَّـہُ الَّذِينَ آمَنُوا بِالْقَوْلِ الثَّابِتِ » (سورہ ابراھیم : ۲۷) اللہ تعالیٰ ایمان والوں کو پکی بات کے ساتھ ثابت قدم رکھتا ہے ۔ “

حدیث نمبر: 3152 --- رقم الحديث ترقيم الباني: 654... سیدنا عبداللہ بن شداد ؓ سے روایت ہے کہ قبیلہ بنو عذرہ کے چند لوگ نبی کریم ﷺ کے پاس آئے اور اسلام قبول کیا ۔ آپ ﷺ نے فرمایا : ”کون ان کو کفایت کرے گا ؟ “ سیدنا طلحہ ؓ نے کہا : میں ۔ وہ طلحہ کے پاس ٹھہرے رہے ۔ ایک دن نبی کریم ﷺ نے ایک لشکر بھیجا ، ان میں سے بھی ایک آدمی شریک ہوا اور شہید ہو گیا ۔ (کچھ عرصے کے بعد) آپ ﷺ نے دوسرا لشکر بھیجا ، ان میں سے بھی ایک دوسرا آدمی شریک ہوا اور وہ بھی شہید ہو گیا ، پھر (کچھ عرصے کے بعد) تیسرا آدمی اپنے بستر پر طبعی موت مر گیا. سیدنا طلحہ ؓ کہتے ہیں : میں نے خواب میں ان تینوں کو جنت میں دیکھا ، کیا دیکھتا ہوں کہ اپنے بستر پر طبعی موت مرنے والا سب سے آگے ہے ، اس کے پیچھے دوسرے نمبر پر شہید ہونے والا ہے اور آخر میں سب سے پہلے شہید ہونے والا ہے ۔ مجھے (ان مراتب سے) بڑی تشویش ہوئی ، میں نبی کریم ﷺ کے پاس آیا اور یہ خواب بیان کیا ۔ رسول اللہ ﷺ نے فرمایا : ”تم کو اس سے کیوں تعجب ہوا ؟ وہ مومن سب سے افضل ہے ، جسے اسلام کی زندگی نصیب ہوتی ہے ، کیونکہ وہ (اپنی عمر میں) « سبحان اللہ ، الحمدللہ ، لا الہ الا اللہ » کہتا رہتا ہے ۔ “

حدیث نمبر: 3290 --- رقم الحديث ترقيم الباني: 2895... سیدنا ابوہریرہ ؓ بیان کرتے ہیں کہ رسول اللہ ﷺ ہمارے پاس تشریف لائے ، اس حال میں کہ آپ کے ساتھ حسن و حسین بھی تھے ، ایک ایک کندھے پر تھا اور دوسرا دوسرے پر ۔ آپ کبھی ایک کا بوسہ لیتے اور کبھی دوسرے کو چومتے ، حتیٰ کہ ہمارے پاس پہنچ گئے ۔ ایک آدمی نے آپ ﷺ سے کہا : آپ ان سے محبت کرتے ہیں ۔ آپ ﷺ نے فرمایا : ”جس نے ان سے محبت کی ، اس نے مجھ سے محبت کی اور جس نے ان سے بغض رکھا اس نے مجھ سے بغض رکھا ۔ “

حدیث نمبر: 3653 --- رقم الحديث ترقيم الباني: 3081... سیدنا جابر بن عبداللہ ؓ کہتے ہیں : ہم رسول اللہ ﷺ کے ساتھ تھے ، آپ ﷺ حرہ کے ایک ٹیلے سے جھانکے اور فرمایا : ”جب دجال کا ظہور ہو گا تو مدینہ بہترین سر زمین ثابت ہو گی ، اس کی طرف آنے والے ہر راستے پر فرشتہ ہو گا ، اس لیے دجال اس میں داخل نہیں ہو سکے گا ۔ جب معاملہ یہ ہو گا تو مدینہ تین دفعہ اپنے باشندوں کو جھٹکا دے گا ، (‏‏‏‏مدینہ میں رہنے والا) ہر منافق مرد اور عورت دجال کی طرف نکل جائے گا ، زیادہ تر جانے والی عورتیں ہوں گی ، یہ ”یوم التخلیص“ ہو گا ۔ اس دن مدینہ اپنے اندر پائی جانے والی خباثت اس طرح نکال دے گا ، جیسے دھونکنی لوہے کی میل کچیل کو صاف کر دیتی ہے ۔ دجال کے ساتھ ستر ہزار (۷۰ ، ۰۰۰) یہودی ہوں گے ، ہر ایک نے زرہ زیب تن کی ہو گی اور ہر ایک کے پاس آراستہ کی ہوئی ایک تلوار ہو گی ، جہاں پانی کے نالے جمع ہوتے ہیں وہاں اس کا ڈیرہ بنایا جائے گا ۔ “ ‏‏‏‏ پھر آپ ﷺ نے فرمایا : ” (‏‏‏‏نہ ماضی میں) ایسا فتنہ تھا اور نہ تاقیامت ہو گا ، جو دجال کے فتنے سے سنگین ہو ۔ ہر نبی نے اپنی امت کو اس سے متنبہ کیا اور میں تمہیں اس کی ایسی علامت بتاتا ہوں جو کسی نبی نے نہیں بتائی ۔ “ پھر آپ ﷺ نے اپنا ہاتھ اپنی آنکھ پر رکھا اور فرمایا : ”میں گواہی دیتا ہوں کہ اللہ تعالیٰ کانا نہیں ہے (‏‏‏‏اور دجال کانا ہو گا) ۔ “

حدیث نمبر: 3607 --- رقم الحديث ترقيم الباني: 322... سیدنا ابوامامہ ؓ سے روایت ہے کہ رسول اللہ ﷺ نے فرمایا : ”ایک چوپایہ نکلے گا ، وہ لوگوں کی ناک پر ایک علامت لگائے گا اور وہ لمبی عمریں پائیں گے ، حتیٰ کہ ایک آدمی اونٹ خریدے گا ۔ جب کوئی دوسرا اس سے پوچھے گا کہ تو نے یہ اونٹ کس سے خریدا ہے تو وہ جواب دے گا : میں نے یہ نشان زدہ لوگوں میں سے ایک آدمی سے خریدا تھا ۔ “

حدیث نمبر: 2086 --- رقم الحديث ترقيم الباني: 29... سیدنا ابوہریرہ ؓ سے روایت ہے کے رسول اللہ ﷺ نے فرمایا : ” (ایک دفعہ کا ذکر ہے کے) ایک آدمی راستے پرچلا جا رہا تھا کہ اسے سخت پیاس لگی ، اس نے ایک کنواں پایا ، پس اس میں اتر کر اس نے پانی پیا ، پھر باہر نکل آیا ، وہیں ایک کتا تھا جو پیاس کے مارے زبان باہر نکالے (ہانپتے ہوئے) کیچڑ چاٹ رہا تھا ، پس اس آدمی نے (دل میں) کہا : کہ اس کتے کو بھی اسی طرح پیاس نے ستایا ہے جس طرح میں اس کی شدت سے بے حال ہو گیا تھا ، چنانچہ وہ (دوبارہ) کنویں میں اترا اور اپنا موزہ پانی سے بھرا اور اسے اپنے منہ سے پکڑ کر اوپر چڑھ آیا اور کتے کو پانی پلایا ، اللہ تعالیٰ نے اس کے اس عمل اور جذبے کی قدر کی اور اسے معاف کر دیا ۔ (یہ سن کر) صحابہ نے عرض کیا : اے اللہ کے رسول ! کیا ہمارے لیے چوپایوں (پر ترس کھانے) میں بھی اجر ہے ؟ آپ ﷺ نے فرمایا : ” (ہاں) ہر تر جگر والے (جاندار کی خدمت اور دیکھ بھال) میں اجر ہے ۔ “

حدیث نمبر: 932 --- رقم الحديث ترقيم الباني: 567... صعصعہ بن معاویہ کہتے ہیں کہ میں سیدنا ابوذر ؓ کو ملا اور کہا : کہ مجھے کوئی حدیث بیان کرو ۔ انہوں نے کہا : لیجئے ، رسول اللہ ﷺ نے فرمایا : ”جو مسلمان بندہ ہر مال میں سے ایک ایک جوڑا اللہ تعالیٰ کے راستے میں خرچ کرتا ہے تو جنت کے دربان اس کا استقبال کریں گے اور اسے اپنی طرف والی نعمتوں کی طرف بلائیں گے ۔ میں نے کہا : (ہر مال میں سے ایک ایک جوڑا) ، اس کی کیا صورت ہے ؟ آپ ﷺ نے فرمایا : ”اگر اونٹ ہیں تو دو انٹ اور اگر گائیں ہیں تو دو گائیں (علی ہذاالقیاس) ۔ “

حدیث نمبر: 1652 --- رقم الحديث ترقيم الباني: 3339... سیدہ عائشہ ؓ کہتی ہیں کہ رسول اللہ ﷺ کو کوکھ کا درد ہو جاتا تھا ، ایک دن بہت سخت درد ہوا ، حتی کہ آپ ﷺ پر غشی طاری ہو گئی اور ہمیں یہ گمان ہونے لگا کہ آپ ﷺ بستر پر انتقال فرمانے والے ہیں ۔ ہم نے آپ کی زبان ایک طرف کر کے دوسری طرف دوا ڈالی ۔ جب آپ کو افاقہ ہوا تو آپ ﷺ نے پہچان لیا کہ ہم نے دوائی ڈالی تھی ، پس فرمایا : ” تمہارا خیال تھا کہ اللہ تعالیٰ مجھے نمونیا میں مبتلا کرے گا ؟ اللہ تعالیٰ بیماری کو میرے خلاف راہ نہیں دے گا ۔ اللہ کی قسم ! گھر میں ہر فرد کی زبان ایک طرف کر کے دوسری طرف دوائی ڈالو ، ماسوائے میرے چچا عباس کے ۔ “ سیدہ عائشہ ؓ فرماتی ہیں : گھر میں موجود ہر فرد کے منہ میں دوا ڈالی گئی ، آپ ﷺ کی ایک بیوی نے کہا : میں تو روزے دار ہوں ۔ انہوں نے اسے کہا : تیرا کیا خیال ہے کہ ہم تجھے چھوڑ دیں گے ، جب کہ رسول اللہ ﷺ نے فرمایا کہ ” گھر میں کوئی نہ بچے مگر اسے دوا ڈالی جائے “ پھر ہم نے اسے دوائی ڈالی ، حالانکہ وہ روزے دار تھی ۔

حدیث نمبر: 3979 --- رقم الحديث ترقيم الباني: 3951... سیدنا ابوامامہ باہلی ؓ کہتے ہیں کہ میں نے رسول اللہ ﷺ کو یہ فرماتے سنا : ”‏‏‏‏میرے پاس دو آدمی آئے ، انہوں نے میرا بازو پکڑا اور مجھے ایک دشوار گزار پہاڑ کے پاس لے گئے ۔ انہوں نے مجھے کہا : اس پر چڑھو : میں نے کہا : مجھ میں تو اتنی ہمت نہیں کہ اس پر چڑھ سکوں ۔ انہوں نے کہا : ہم تیرے لیے آسان کر دیں گے ۔ سو میں نے چڑھنا شروع کر دیا ، جب میں پہاڑ کی چوٹی پر پہنچا تو شدید قسم کی آوازیں سنائی دیں ۔ میں نے پوچھا : یہ آوازیں کیسی ہیں ؟ انہوں نے کہا جہنمیوں کی چیخ پکار ہے پھر وہ مجھے لے کر آگے چلے ، ایک ایسے مقام پر پہنچے کہ وہاں کچھ لوگ الٹے لٹکائے گئے ہیں ، ان کی باچھوں کو پھاڑا جا رہا ہے اور وہاں سے خون بہہ رہا ہے ۔ میں نے کہا : یہ کون لوگ ہیں ؟ انہوں نے کہا : یہ وقت سے پہلے روزہ افطار کر دینے والے لوگ ہیں ۔ “ پھر فرمایا : ” یہود و نصاریٰ ناکام و نامراد ہو گئے ۔ “ راوی حدیث سلیمان کہتے ہیں : مجھے یہ علم نہ ہو سکا کہ (‏‏‏‏یہود و نصاریٰ کے متعلقہ) یہ الفاظ سیدنا ابوامامہ نے رسول اللہ ﷺ سے روایت کئے ہیں یا ان کے اپنے الفاظ ہیں ۔ ”‏‏‏‏پھر وہ دونوں مجھے لے کر آگے بڑھے ، میں کیا دیکھتا ہوں کہ کچھ لوگ پھولے ہوئے ہیں ، ان سے بدترین بدبو آ رہی ہے اور انتہائی سیاہ منظر پیش کر رہے ہیں ۔ میں نے پوچھا کہ یہ کون لوگ ہیں ؟ انہوں نے کہا : یہ مقتول کفار ہیں ۔ پھر وہ میرے ساتھ آگے بڑھے اور ایسے لوگوں کے پاس سے گزرے جو بری طرح پھولے ہوئے ہیں ، ان سے بیت الخلاء کی طرح کی بدترین بدبو آ رہی ہے ۔ میں نے پوچھا : یہ کون لوگ ہیں ؟ انہوں نے کہا : یہ زانی مرد اور عورتیں ہیں ۔ پھر مجھے لے کر آگے بڑھے اور ہم ایسی عوتوں کے پاس سے گزرے کہ سانپ ان کے پستانوں کو نوچ رہے ہیں ۔ میں نے پوچھا : یہ عوتیں کون ہیں ؟ انہوں نے کہا : یہ اپنے بچوں کو دودھ نہ پلانے والی عورتیں ہیں ۔ پھر وہ مجھے لے کر آگے بڑھے ، میں کیا دیکھتا ہوں کہ دو نہروں کے درمیان میں کچھ بچے کھیل رہے ہیں ۔ میں نے پوچھا : یہ کون ہیں ؟ انہوں نے کہا : یہ مومنوں کے بچے ہیں ۔ پھر وہ مجھے ایک اونچی جگہ کی طرف لے گئے ، میں کیا دیکھتا ہوں کہ تین افراد شراب پی رہے ہیں ۔ میں نے پوچھا : یہ کون ہیں ؟ انہوں نے کہا : یہ جعفر ، زید اور ابن رواحہ (‏‏‏‏ ؓ ) ہیں ۔ پھر وہ مجھے ایک اور بلند جگہ کی طرف ل...

حدیث نمبر: 929 --- رقم الحديث ترقيم الباني: 309... سیدنا جابر بن عبد اللہ ؓ بیان کرتے ہیں کہ رسول اللہ ﷺ نے ایک غزوے کا ارادہ کیا اور فرمایا : ” مہاجرو اور انصاریو ! تمہارے بعض بھائی ایسے ہیں کہ نہ ان کے پاس مال ہے اور نہ وہ قرابتداروں کے ہمراہ ہیں ، تم میں سے (بعض لوگ) ان میں سے دو دو یا تین تین افراد اپنے ساتھ ملا لیں ۔ جابر ؓ کہتے ہیں : ہم میں سے ہر ایک کے پاس سواری نہیں تھی ، بس ان کی باری کی طرح ہماری بھی سوار ہونے کی ایک باری تھی ، میں نے دو یا تین افراد اپنے ساتھ ملا لیے ۔ وہ کہتے ہیں : ان کی باری کی طرح میرے لیے بھی اپنے اونٹ پر سواری کی ایک باری تھی (یعنی اونٹ میرا تھا لیکن سب کی باریاں برابر کی تھیں) ۔