حدیث نمبر: 5669 --- حکم البانی: صحيح موقوف... عبدالرحمٰن بن حارث کہتے ہیں کہ میں نے عثمان ؓ کو کہتے ہوئے سنا : شراب سے بچو ، کیونکہ یہ برائیوں کی جڑ ہے ، تم سے پہلے زمانے کے لوگوں میں ایک شخص تھا جو بہت عبادت گزار تھا ، اسے ایک بدکار عورت نے پھانس لیا ، اس نے اس کے پاس ایک لونڈی بھیجی اور اس سے کہلا بھیجا کہ ہم تمہیں گواہی دینے کے لیے بلا رہے ہیں ، چنانچہ وہ اس کی لونڈی کے ساتھ گیا ، وہ جب ایک دروازے میں داخل ہو جاتا (لونڈی) اسے بند کرنا شروع کر دیتی یہاں تک کہ وہ ایک حسین و جمیل عورت کے پاس پہنچا ، اس کے پاس ایک لڑکا تھا اور شراب کا ایک برتن ، وہ بولی : اللہ کی قسم ! میں نے تمہیں گواہی کے لیے نہیں بلایا ہے ، بلکہ اس لیے بلایا ہے کہ تم مجھ سے صحبت کرو ، یا پھر ایک گلاس یہ شراب پیو ، یا اس لڑکے کو قتل کر دو ، وہ بولا : مجھے ایک گلاس شراب پلا دو ، چنانچہ اس نے ایک گلاس پلائی ، وہ بولا : اور دو ، اور وہ وہاں سے نہیں ہٹا یہاں تک کہ اس عورت سے صحبت کر لی اور اس بچے کا خون بھی کر دیا ، لہٰذا تم لوگ شراب سے بچو ، اللہ کی قسم ! ایمان اور شراب کا ہمیشہ پینا ، دونوں ایک ساتھ جمع نہیں ہو سکتے ، البتہ ان میں سے ایک دوسرے کو نکال دے گا ۔ ... (ص/ح)

حدیث نمبر: 1542 --- حکم البانی: صحيح لغيره... عبداللہ بن عمر ؓ کہتے ہیں کہ رسول اللہ ﷺ نے خوف کی نماز پڑھائی ، تو آپ کھڑے ہوئے ، اور اللہ اکبر کہا ، تو آپ کے پیچھے ہم میں سے ایک گروہ نے نماز پڑھی ، اور ایک گروہ دشمن کے سامنے رہا ، تو رسول اللہ ﷺ نے اس کے ساتھ ایک رکوع اور دو سجدے کئے ، پھر وہ لوگ پلٹے حالانکہ انہوں نے ابھی سلام نہیں پھیرا تھا ، اور دشمن کے بالمقابل آ گئے ، اور ان کی جگہ صف بستہ ہو گئے ، اور دوسرا گروہ آیا ، اور وہ رسول اللہ ﷺ کے پیچھے صف بستہ ہو گیا ، تو آپ ﷺ نے اس کے ساتھ ایک رکوع اور دو سجدے کئے ، پھر رسول اللہ ﷺ نے سلام پھیرا ، اس حال میں کہ آپ نے دو رکوع اور چار سجدے مکمل کر لیے تھے ، پھر دونوں گروہ کھڑے ہوئے ، اور ان میں سے ہر شخص نے خود سے ایک رکوع اور دو سجدے کیے ۔ ابوبکر بن السنی کہتے ہیں : زہری نے ابن عمر ؓ سے دو حدیثیں سنی ہیں ، لیکن یہ حدیث انہوں نے ان سے نہیں سنی ہے ۔ ... (ص/ح)

حدیث نمبر: 1544 --- حکم البانی: صحيح... مروان بن حکم سے روایت ہے کہ انہوں نے ابوہریرہ ؓ سے پوچھا کہ کیا آپ نے رسول اللہ ﷺ کے ساتھ خوف کی نماز پڑھی ہے ؟ تو ابوہریرہ نے کہا : ہاں پڑھی ہے ، انہوں نے پوچھا : کب ؟ ابوہریرہ ؓ نے کہا : نجد کے غزوہ کے سال رسول اللہ ﷺ عصر کی نماز کے لیے کھڑے ہوئے ، ایک گروہ آپ کے ساتھ کھڑا ہوا ، اور دوسرا گروہ دشمن کے مقابل رہا ، اور ان کی پیٹھ قبلہ کی طرف تھی ، رسول اللہ ﷺ نے اللہ اکبر کہا ، تو جو آپ کے ساتھ تھے اور جو دشمن کا مقابلہ کر رہے تھے سبھوں نے اللہ اکبر کہا ، پھر رسول اللہ ﷺ نے ایک رکوع کیا ، اور اس گروہ نے بھی جو آپ کے ساتھ تھا رکوع کیا ، پھر آپ نے سجدہ کیا ، اور اس گروہ نے بھی سجدہ کیا جو آپ کے ساتھ تھا ، اور دوسرے لوگ دشمن کے مقابل کھڑے رہے ، پھر رسول اللہ ﷺ کھڑے ہوئے ، اور وہ گروہ جو آپ کے ساتھ تھا ، پھر یہ لوگ جا کر دشمن کے بالمقابل کھڑے ہو گئے ، پھر وہ گروہ جو دشمن کے بالمقابل تھا آیا ، چنانچہ ان لوگوں نے (بھی) رکوع کیا ، اور سجدہ کیا ، اور رسول اللہ ﷺ کھڑے رہے جیسے تھے ، پھر وہ لوگ کھڑے ہوئے تو رسول اللہ ﷺ نے دوسرا رکوع کیا ، تو ان لوگوں نے بھی آپ کے ساتھ رکوع کیا ، آپ نے سجدہ کیا ، اور ان لوگوں نے بھی آپ کے ساتھ سجدہ کیا ، پھر وہ گروہ آیا جو دشمن کے مقابل میں کھڑا تھا ، تو اس نے بھی رکوع اور سجدہ کیا ، اور رسول اللہ ﷺ اور وہ لوگ جو آپ کے ساتھ تھے بیٹھے ہوئے تھے ، پھر سلام پھیرنے (کا وقت آیا) تو رسول اللہ ﷺ نے سلام پھیرا ، اور تمام لوگوں نے سلام پھیرا ، تو اس طرح رسول اللہ ﷺ کی دو رکعت ہوئی ، اور دونوں گروہوں کے ہر ہر فرد کی (بھی) دو دو رکعت ہوئی ۔ ... (ص/ح)

حدیث نمبر: 2088 --- حکم البانی: ضعيف... ابوذر ؓ کہتے ہیں کہ صادق و مصدوق ﷺ نے مجھ سے بیان کیا کہ لوگ (قیامت کے دن) تین گروہ میں جمع کیے جائیں گے : ایک گروپ سوار ہو گا ، کھاتے (اور) پہنتے اٹھے گا ، اور ایک گروہ کو فرشتے اوندھے منہ گھسیٹیں گے ، اور انہیں آگ گھیر لے گی ، اور ایک گروہ پیدل چلے گا (بلکہ) دوڑے گا ۔ اللہ تعالیٰ سواریوں پر آفت نازل کر دے گا ، چنانچہ کوئی سواری باقی نہ رہے گی ، یہاں تک کہ ایک شخص کے پاس باغ ہو گا جسے وہ ایک پالان والے اونٹ کے بدلے میں دیدے گا جس پر وہ قادر نہ ہو سکے گا ۔ ... (ص/ح)

حدیث نمبر: 1540 --- حکم البانی: صحيح... عبداللہ بن عمر ؓ کہتے ہیں کہ میں نے رسول اللہ ﷺ کے ساتھ نجد کی طرف غزوہ کیا ، تو ہم دشمن کے مقابل میں کھڑے ہوئے اور ہم نے صف بندی کی ، پھر رسول اللہ ﷺ ہمیں نماز پڑھانے کھڑے ہوئے ، تو ہم میں سے ایک گروہ آپ کے ساتھ کھڑا ہو گیا ، اور دوسرا گروہ دشمن کے مقابلہ میں ڈٹا رہا ، تو رسول اللہ ﷺ نے اور آپ کے ساتھ والوں نے ایک رکوع اور دو سجدے کیے ، پھر یہ لوگ جا کر ان لوگوں کی جگہ پر ڈٹ گئے جنہوں نے نماز نہیں پڑھی تھی ، اور اس گروہ والے (آپ کے پیچھے) آئے جنہوں نے نماز نہیں پڑھی تھی ، تو آپ نے انہیں بھی ایک رکوع اور دو سجدے کرائے ، پھر رسول اللہ ﷺ نے سلام پھیرا تو مسلمانوں میں سے ہر آدمی کھڑا ہو گیا ، اور اس نے خود سے ایک رکوع اور دو سجدے کیے ۔ ... (ص/ح)

حدیث نمبر: 1551 --- حکم البانی: صحيح... ابوعیاش زرقی ؓ کہتے ہیں کہ ہم لوگ رسول اللہ ﷺ کے ساتھ مقام عسفان میں تھے ، آپ ﷺ نے ہمیں ظہر کی نماز پڑھائی ، اس وقت مشرکین کی کمان خالد بن ولید ؓ کر رہے تھے ، مشرکوں نے (آپ سے میں) کہا : ہم نے انہیں دھوکہ دینے اور انہیں غفلت میں (دبوچنے کا) موقع پا لیا ہے ، تو ظہر اور عصر کے درمیان خوف کی نماز نازل ہوئی ، چنانچہ رسول اللہ ﷺ نے ہمیں نماز عصر پڑھائی تو ہم دو گروہوں میں بٹ گئے ، ایک گروہ نبی اکرم ﷺ کے ساتھ نماز پڑھنے لگا ، اور ایک گروہ ان کی حفاظت کرتا رہا ، آپ نے جو آپ کے ساتھ کھڑے تھے ، اور جو آپ کی حفاظت میں لگے تھے سبھوں کے ساتھ تکبیر تحریمہ کہی ، پھر آپ نے رکوع کیا ، تو ان لوگوں نے اور ان لوگوں نے سبھوں نے ایک ساتھ رکوع کیا ، پھر جو آپ کے قریب تھے ان لوگوں نے سجدہ کیا ، اور سجدہ کر کے وہ پیچھے ہٹ گئے اور پیچھے والے آگے بڑھ آئے ، پھر انہوں نے سجدہ کیا ، پھر آپ کھڑے ہوئے ، پھر جو آپ کے قریب تھے اور جو آپ کی حفاظت کر رہے تھے سبھوں کے ساتھ مل کر آپ نے دوسرا رکوع کیا ، پھر آپ نے اپنے پاس والوں کے ساتھ سجدہ کیا ، پھر وہ لوگ پیچھے ہٹ گئے ، اور اپنے ساتھیوں کی صف میں کھڑے ہو گئے اور پیچھے والے آگے بڑھ آئے اور انہوں نے سجدہ کیا ، پھر آپ نے ان پر سلام پھیرا ، تو ان میں سے ہر ایک کی امام کے ساتھ دو دو رکعت ہو گئی ، اور ایک بار آپ نے بنی سلیم کی سر زمین میں (بھی) خوف کی نماز پڑھی ۔ ... (ص/ح)

حدیث نمبر: 1541 --- حکم البانی: صحيح لغيره... عبداللہ بن عمر ؓ بیان کرتے تھے کہ انہوں نے رسول اللہ ﷺ کے ساتھ خوف کی نماز پڑھی ، نبی اکرم ﷺ نے اللہ اکبر کہا ، اور ہم میں سے ایک گروہ نے آپ کے پیچھے صف بنائی ، اور دوسرا گروہ دشمن کے سامنے رہا ، تو نبی اکرم ﷺ نے انہیں ایک رکوع اور دو سجدے کرائے ، پھر یہ لوگ پلٹے اور دشمن کے مقابلہ میں آ گئے ، اور دوسرا گروہ آیا تو اس نے نبی اکرم ﷺ کے ساتھ نماز پڑھی ، تو آپ نے (اس کے ساتھ بھی) اسی طرح کیا ، پھر آپ نے سلام پھیرا ، پھر دونوں گروہوں میں سے ہر آدمی کھڑا ہوا ، اور اس نے خود سے ایک رکوع اور دو سجدے کیے ۔ ... (ص/ح)

حدیث نمبر: 3591 --- حکم البانی: صحيح... سلمہ بن نفیل کندی ؓ کہتے ہیں کہ میں رسول اللہ ﷺ کے پاس بیٹھا ہوا تھا ، اس وقت ایک شخص نے کہا : اللہ کے رسول ! لوگوں نے گھوڑوں کی اہمیت اور قدر و قیمت ہی گھٹا دی ، ہتھیار اتار کر رکھ دیے اور کہتے ہیں : اب کوئی جہاد نہیں رہا ، لڑائی موقوف ہو چکی ہے ۔ یہ سنتے ہی رسول اللہ ﷺ نے اپنا رخ اس کی طرف کیا اور (پورے طور پر متوجہ ہو کر) فرمایا : ” غلط اور جھوٹ کہتے ہیں ، (صحیح معنوں میں) لڑائی کا وقت تو اب آیا ہے ، میری امت میں سے تو ایک امت (ایک جماعت) حق کی خاطر ہمیشہ برسرپیکار رہے گی اور اللہ تعالیٰ کچھ قوموں کے دلوں کو ان کی خاطر کجی میں مبتلا رکھے گا اور انہیں (اہل حق کو) ان ہی (گمراہ لوگوں) کے ذریعہ روزی ملے گی ، یہ سلسلہ قیامت ہونے تک چلتا رہے گا ، جب تک اللہ کا وعدہ (متقیوں کے لیے جنت اور مشرکوں و کافروں کے لیے جہنم) پورا نہ ہو جائے گا ، قیامت تک گھوڑوں کی پیشانیوں میں بھلائی (خیر) بندھی ہوئی ہے اور مجھے بذریعہ وحی یہ بات بتا دی گئی ہے کہ جلد ہی میرا انتقال ہو جائے گا اور تم لوگ مختلف گروہوں میں بٹ کر میری اتباع (کا دعویٰ) کرو گے اور حال یہ ہو گا کہ سب (اپنے متعلق حق پر ہونے کا دعویٰ کرنے کے باوجود) ایک دوسرے کی گردنیں کاٹ رہے ہوں گے اور مسلمانوں کے گھر کا آنگن (جہاں وہ پڑاؤ کر سکیں ، ٹھہر سکیں ، کشادگی سے رہ سکیں) شام ہو گا “ ۔ ... (ص/ح)

حدیث نمبر: 3177 --- حکم البانی: صحيح... ثوبان ؓ مولی رسول اللہ ﷺ کہتے ہیں کہ رسول اللہ ﷺ نے فرمایا : ” میری امت میں دو گروہ ایسے ہیں جنہیں اللہ تعالیٰ نے جہنم سے محفوظ کر دیا ہے ۔ ایک گروہ وہ ہو گا جو ہند پر لشکر کشی کرے گا اور ایک گروہ وہ ہو گا جو عیسیٰ بن مریم علیہما السلام کے ساتھ ہو گا “ ۔ ... (ص/ح)

حدیث نمبر: 2395 --- حکم البانی: منكر بزيادة الموعد... ابوسلمہ بن عبدالرحمٰن بن عوف کہتے ہیں کہ میں عبداللہ بن عمرو ؓ کے پاس آیا ۔ میں نے عرض کیا : چچا جان ! رسول اللہ ﷺ نے آپ سے جو کہا تھا اسے مجھ سے بیان کیجئے ۔ انہوں نے کہا : بھتیجے ! میں نے پختہ عزم کر لیا تھا کہ میں اللہ کی عبادت کے لیے بھرپور کوشش کروں گا یہاں تک کہ میں نے کہہ دیا کہ میں ہمیشہ روزہ رکھوں گا ، اور ہر روز دن و رات قرآن پڑھا کروں گا ، رسول اللہ ﷺ نے اسے سنا تو میرے پاس تشریف لائے یہاں تک کہ گھر کے اندر میرے پاس آئے ، پھر آپ نے فرمایا : ” مجھے یہ بات پہنچی ہے کہ تم نے کہا ہے کہ میں ہمیشہ روزہ رکھوں گا اور قرآن پڑھوں گا ؟ “ میں نے عرض کیا : ہاں اللہ کے رسول ! میں نے ایسا کہا ہے ، آپ ﷺ نے فرمایا : ” ایسا مت کرو (بلکہ) ہر مہینے تین دن روزہ رکھ لیا کرو “ ، میں نے عرض کیا : میں اس سے زیادہ رکھنے کی طاقت رکھتا ہوں ، آپ نے فرمایا : ” ہر ہفتہ سے دو دن دوشنبہ (پیر) اور جمعرات کو روزہ رکھ لیا کرو “ ، میں نے عرض کیا : میں اس سے بھی زیادہ رکھنے کی طاقت رکھتا ہوں ، آپ نے فرمایا : ” داود علیہ السلام کا روزہ رکھا کرو کیونکہ اللہ تعالیٰ کے نزدیک یہ سب سے زیادہ بہتر اور مناسب روزہ ہے ، وہ ایک دن روزہ رکھتے اور ایک دن افطار کرتے ، اور وہ جب وعدہ کر لیتے تو وعدہ خلافی نہیں کرتے تھے ، اور جب دشمن سے مڈبھیڑ ہوتی تھی تو بھاگتے نہیں تھے “ ۔ ... (ص/ح)