🏠 👥 🔍 🧩 🅰️ 📌 ↩️

مولانا عطا اللہ ساجد حفظہ اللہ
اردو حاشہ: فوائد و مسائل: (1) مذکورہ روایت کو ہمارے فاضل محقق نے سنداً ضعیف قرار دیا ہے جبکہ...
اردو حاشہ:
فوائد و مسائل:
(1)
مذکورہ روایت کو ہمارے فاضل محقق نے سنداً ضعیف قرار دیا ہے جبکہ بعض محققین نے صحیح اور بعض نے حسن قرار دیا ہے اور اس کے متابعات اور شواہد ذکر کیے ہیں جس سے معلوم ہوتا ہے کہ مذکورہ روایت سنداً ضعیف ہونے کے باوجود قابل عمل اور قابل حجت ہے۔
تفصیل کے لیے دیکھیے: (الموسوعة الحدیثة، مسند الإمام أحمد: 133، 132/31، وصحیح ابی داؤد (مفصل)
رقم: 1409، وسنن ابن ماجة للدکتور بشار عواد، حدیث: 1801)

(2)
حضرت سوید بن غفلہ رحمۃ اللہ علیہ رسول اللہ صلی اللہ علیہ وسلم کی حیات مبارکہ میں اسلام قبول کرچکے تھے لیکن رسول اللہ ‎ صلی اللہ علیہ وسلم کی زیارت نہیں کرسکے۔
مدنیہ منورہ اس وقت پہنچے جب صحابہ کرام نبی اکرم صلی اللہ علیہ وسلم کی تدفین سے فارغ ہو چکے تھے، اس لیے ان کا شمار صحابہ کرام میں نہیں ہوتا، البتہ کبار تابعین میں شامل ہیں جنہیں بہت سے صحابہ کرام کی زیارت اور ملاقات کا شرف حاصل ہوا۔

(3)
”عامل ہمارے پاس آیا“ یعنی ہمارے قبیلے کی زکاۃ وصول کرنے کے لیے آیا۔
حضرت سوید بن غفلہ رحمۃ اللہ علیہ جعفی قبیلے سے تعلق رکھتے ہیں۔

(4)
حکم نامے سے مراد وہ تحریر تھی جو رسول اللہ صلی اللہ علیہ وسلم نے لکھوا کر عامل کو دی تھی تاکہ اس کے مطابق زکاۃ وصول کریں۔
حضرت سوید ؓ نے اس صحابی سے ملاقات کی اور نبی صلی اللہ علیہ وسلم کی تحریری ہدایات خود پڑھیں۔

(5)
زکاۃ میں درمیانہ درجے کا مال وصول کرنا چاہیے نہ بہترین جانور لیا جائے جس سے مالک کو نقصان ہو اور نہ بالکل نکما جانور لیا جائے جس سے کسی غریب کو فائدہ ہی نہ ہو۔

(6)
صحابہ کرام جب کسی عہدے پر فائز ہوتے تھے تو عدل و انصاف کا انتہائی خیال رکھتے تھے۔
الگ الگ ریوڑوں کو جمع کرنے اور اکٹھے ریوڑ کو الگ الگ کرنے کی وضاحت کے لیے اگلے باب میں حدیث: 1805 کا فائدہ نمبر: 8 ملاحظہ فرمائیں۔
سنن ابن ماجہ شرح از مولانا عطا الله ساجد 1801