🏠 👥 🔍 🧩 🅰️ 📌 ↩️

شیخ الحدیث مولانا عبد العزیز علوی حفظ اللہ
حدیث حاشیہ: فوائد ومسائل: اس حدیث میں حضوراکرم صلی اللہ علیہ وسلم کے ایک معجزے کا بیان موجود ہے...
حدیث حاشیہ:
فوائد ومسائل:
اس حدیث میں حضوراکرم صلی اللہ علیہ وسلم کے ایک معجزے کا بیان موجود ہے کہ آپ صلی اللہ علیہ وسلم کی برکت سے چند آدمیوں کا کھانا تقریباً تین سو آدمیوں نے کھایا،
لیکن کھانا پھر بھی کم نہ ہوا اور حضرت انس رضی اللہ تعالیٰ عنہ یہ فیصلہ نہ کر سکے کہ کھانا اب زیادہ ہے یا پہلے زیادہ تھا۔
نیز اس موقع پر،
عورتوں کے لیے خصوصی طور پر ازواج مطہرات کے لیے جو امت کے لیے ماں کی حیثیت رکھتی ہیں پردے کے احکام نازل ہوئے،
جن کی یہ حکمت بیان کی گئی کہ اگر کسی کو ان سے کوئی چیز مانگنے کی ضرورت پیش آئے تو وہ دندناتا ہوا ان کے سامنے نہ چلا جائے بلکہ پردے کی اوٹ سے مانگے،
کیونکہ یہ طریقہ تمھارے دلوں کو بھی زیادہ پاکیزہ رکھنے والا ہے اور ان کے دلوں کو بھی،
اب اگر صحابہ کرام رضوان اللہ عنھم اجمعین اور ازواج مطہرات رضوان اللہ عنھن اجمعین کے دلوں کی پاکیزگی اور طہارت کا طریقہ پردہ ہے اور یہ طریقہ اس ذات کا تجویز کردہ ہے جس نے انسان کا دل بنایا ہے اور اس کی کمزوریوں سے اچھی طرح واقف ہے تو اب ہمارے لیے یہ کہنا کس طرح جائز ہو سکتا ہے کہ پردہ تو دل کی حیا کا نام ہے اگر آنکھ میں شرم ہے اور دل میں حیا ہے تو پردہ کی کیا ضرورت کیا آنکھ میں شرم اور دل میں حیا پردہ کے بغیر ممکن ہے،
یا ہماری آنکھوں میں شرم اور دل میں حیا صحابہ کرام رضوان اللہ عنھم اجمعین اور ازواج مطہرات رضوان اللہ عنھن اجمعین سے بھی بڑھ کر ہے،
جن کے لیے ہر مسلمان کی آنکھ میں احترام و عقیدت کا جذبہ اور ہر مسلمان کے دل میں محبت و عظمت کا داعیہ موجزن تھا اور ہے،
اگر ان کو پردے کی ضرورت تھی تو آج تو اس سے بدرجہازیادہ ضرورت ہے جبکہ شرم و حیا کا جنازہ بھی نکل چکا ہے،
اور عورتیں تنگ چست نیم عریاں بلکہ شوخ و شنگ،
رنگ برنگ کے زرق و برق لباس زیب تن کر کے،
شمع محفل بننے کی شوقین سڑکوں،
بازاروں،
دفتروں،
ہسپتالوں میں دعوتِ نظارہ دیتی پھرتی ہیں اور گینگ ریپ کے واقعات عام ہو رہے ہیں بلکہ گھروں تک سے جواب لڑکیوں کو اٹھایا جا رہا ہے،
دن بدن یہ مسئلہ شدت اور سنگین صورت اختیار کر رہا ہے،
اور اب تو ننھے منے بچوں کو اٹھا کر بدفعلی کر کے قتل کرنے کے واقعات دن بدن بڑھ رہے ہیں اور نوجوان بچوں بچیوں کے ساتھ بدفعلی کے واقعات کی ویڈیو بنا کر ان کے ماں باپ کو بلیک میل کیا جا رہا ہےاور ویڈیو دکھانے کی دھمکیاں دے کر ان سے پیسے بٹورے جا رہے ہیں۔
تحفۃ المسلم شرح صحیح مسلم 3507