🏠 👥 🔍 🧩 🅰️ 📌 ↩️

شیخ الحدیث مولانا عبد العزیز علوی حفظ اللہ
حدیث حاشیہ: فوائد ومسائل: 1۔ امام مالک رحمۃ اللہ علیہ اور امام ابو حنیفہ رحمۃ اللہ علیہ کے نزدیک...
حدیث حاشیہ:
فوائد ومسائل:
1۔
امام مالک رحمۃ اللہ علیہ اور امام ابو حنیفہ رحمۃ اللہ علیہ کے نزدیک ایک طہر میں یا ایک مجلس میں تین طلاقیں دینا بدعت اور حرام ہے اور امام احمد رحمۃ اللہ علیہ کا ایک قول بھی یہی ہے،
حضرت عمر رضی اللہ تعالیٰ عنہ،
حضرت علی رضی اللہ تعالیٰ عنہ،
ابن عباس رضی اللہ تعالیٰ عنہما اور ابن عمر رضی اللہ تعالیٰ عنہما کا قول بھی یہی ہے۔
(تکملہ:
ج1ص152۔
)
اور امام شافعی رحمۃ اللہ علیہ کے نزدیک ناجائز نہیں ہے لیکن بہتر یہی ہے ایک طہر میں تین طلاقیں نہ دے،
اور امام احمد رحمۃ اللہ علیہ کا ایک قول یہی ہے اور حضرت عمر رضی اللہ تعالیٰ عنہ بھی اس کو ناجائز خیال کرتے تھے۔
(تکملہ فتح الملہم ج1ص152)
اور حضرت عمر رضی اللہ تعالیٰ عنہ اس پر سزا بھی دیتے تھے (مجمع الانہر ص: 382)
پر لکھا ہے ابتدائی دور میں حضرت عمر رضی اللہ تعالیٰ عنہ کے دور تک جب کوئی شخص بیک وقت تین طلاقیں دے دیتا تو انہیں ایک قرار دیا جاتا،
لیکن جب لوگوں میں بکثرت یہ کام ہونے لگا تو انھوں نے تہدید یعنی سرزنش اور توبیخ کے لیے ان کو تین ہی نافذ کر دیا،
اس سے معلوم ہوتا ہے حضرت عمر رضی اللہ تعالیٰ عنہ نے یہ کام ایک انتظامی تدبیر کی خاطر کیا تھا تاکہ لوگ اس حرکت سے باز آ جائیں یہ کوئی مستقل اور ہمیشہ کے لیے فیصلہ نہیں تھا اور نہ ہی وہ اس کے مجاز تھے اس لیے صحابہ کرام رضوان اللہ عنھم اجمعین نے بھی اس کو ایک عارضی اور وقتی حکم سمجھ کر قبول کر لیا،
جیسا کہ حج تمتع کے سلسلہ میں عام طور پر ان کے حکم کو قبول کر لیا گیا تھا۔
اور پھر حضرت عمر رضی اللہ تعالیٰ عنہ نے اس پر ندامت کا اظہار بھی کیا تھا۔
(اغاثۃ اللفھان ص 181۔
162)
2۔
بیک وقت تین طلاقوں کے وقوع کے بارے میں تین چار نظریات یا اقوال ہیں۔
(1)
آئمہ اربعہ اور جمہور علماء کے نزدیک یہ تینوں واقع ہو جائیں گی۔
اگرچہ امام شافعی رحمۃ اللہ علیہ اور امام احمد رحمۃ اللہ علیہ کے ایک قول کے مطابق جائز اور لازم ہے اور امام ابو حنیفہ رحمۃ اللہ علیہ،
امام مالک رحمۃ اللہ علیہ،
اور امام احمد رحمۃ اللہ علیہ کے دوسرے قول کے مطابق حرام اور واقع ہے۔
(2)
بیک وقت تین طلاقیں دینا حرام ہے لیکن طلاق ایک ہی واقع ہوگی امام مالک رحمۃ اللہ علیہ،
امام ابو حنیفہ رحمۃ اللہ علیہ اور امام احمد رحمۃ اللہ علیہ کے بعض اصحاب کا قول یہی ہے،
بعض صحابہ اور تابعین سے بھی منقول ہے۔
حافظ ابن تیمیہ رحمۃ اللہ علیہ اور حافظ ابن قیم رحمۃ اللہ علیہ نے اس کو ترجیح دی ہے اور دلائل سے ثابت کیا ہے۔
(3)
بعض معتزلہ اور بعض شیعہ کا یہ قول ہے کہ اس سے کوئی طلاق واقع نہیں ہوگی اور بقول امام نووی رحمۃ اللہ علیہ حجاج بن ارطاۃ ابن مقاتل اور محمد بن اسحاق کا قول یہی ہے لیکن (الفروع من الکافی)
جو شیعہ کی مستند کتاب ہے سے معلوم ہوتا ہے کہ ان کے ہاں یہ ایک طلاق ہو گی۔
حافظ ابن تیمیہ رحمۃ اللہ علیہ نے ابو جعفر محمد بن علی بن الحسین اور ان کے بیٹے جعفر سے یہی قول نقل کیا ہے (مجموع الفتاوی ج33ص709)
۔
(4)
چوتھا مؤقف یہ ہے عورت اگر مدخولہ ہے تو تین طلاقیں ہوں گی اور اگر غیر مدخولہ ہے تو ایک طلاق ہو گی تفصیل کے لیے دیکھئے ایک مجلس میں تین طلاقیں اور اس کا شرعی حل حافظ صلاح الدین یوسف۔
تحفۃ المسلم شرح صحیح مسلم 3675