🏠 👥 🔍 🧩 🅰️ 📌 ↩️

شیخ الحدیث مولانا عبد العزیز علوی حفظ اللہ
حدیث حاشیہ: مفردات الحدیث: (1) مُعَنَّتٌ: مشقت اوردشواری میں ڈالنے والا۔ (2) مُتَعَنَّتٌ: لغزش اورغلطی کا طالب۔ فوائد ومسائل:...
حدیث حاشیہ:
مفردات الحدیث:
(1)
مُعَنَّتٌ:
مشقت اوردشواری میں ڈالنے والا۔
(2)
مُتَعَنَّتٌ:
لغزش اورغلطی کا طالب۔
فوائد ومسائل:
اللہ تعالیٰ نے طبعی طور پر عورتوں کے دل میں زیورات اور بہترین لباس کی خواہش رکھی ہے،
اور جب فتح خیبر کے بعد حالات بہتر ہو گئے تو ازواج مطہرات رضوان اللہ عنھن اجمعین کے دل میں بھی ان چیزوں کی خواہش پیدا ہوئی لیکن آپ صلی اللہ علیہ وسلم چاہتے تھے،
آپ صلی اللہ علیہ وسلم کے گھر میں سادگی اور زہد و قناعت ہی رہے اور ازواج کے دل میں دنیا کی محبت پیدا نہ ہو اور حضرت ابو بکر رضی اللہ تعالیٰ عنہ اور حضرت عمر رضی اللہ تعالیٰ عنہ نے بھی آپ صلی اللہ علیہ وسلم کی موافقت کی اور اپنی اپنی بیٹی کو دبوچ لیا اور حضوراکرم صلی اللہ علیہ وسلم نے انہیں مارپیٹ سے منع فرما دیا۔
اور حضرت عائشہ رضی اللہ تعالیٰ عنہا نے عورتوں کی طبعی غیرت کے تحت کہ آپ صلی اللہ علیہ وسلم ہی کی طرف حضور اکرم صلی اللہ علیہ وسلم کا رخ رہے یہ درخواست کی کہ میری بات کسی اور بیوی کو نہ بتائیں ممکن ہے کوئی آپ صلی اللہ علیہ وسلم سے فراق کو پسند کر لے۔
لیکن آپ نے ان کی درخواست کو قبول نہیں کیا۔
کیونکہ آپ صلی اللہ علیہ وسلم نہیں چاہتے تھے کہ ان میں کوئی ایک دنیا کی زیب و زینت کی طرف مائل ہو۔
اگر کوئی عورت تفویض طلاق کو استعمال کرتے ہوئے علیحدگی کو پسند کر لیتی ہے تو امام مالک رحمۃ اللہ علیہ اور لیث کے نزدیک یہ تین ہوں گی،
امام ابو حنیفہ رحمۃ اللہ علیہ کے نزدیک ایک بائنہ طلاق ہوگی،
خاوند کو حق رجوع حاصل نہیں رہے گا اور امام شافعی رحمۃ اللہ علیہ اور امام احمد کےنزدیک ایک رجعی طلاق ہوگی۔
خاوند کو حق رجوع حاصل ہو گا اور طلاق شریعت میں دراصل رجعی ہی ہے اور آئمہ اربعہ کے نزدیک تخییر کا تعلق اسی مجلس سے ہے جس میں اختیار دیا گیا الا یہ کہ خاوند سوچ و بچار کے لیے کچھ مہلت دے دے،
ہنسانے والی بات بعض روایات میں حضرت عمر رضی اللہ تعالیٰ عنہ کی طرف منسوب کی گئی ہے لیکن حدیث میں (لَوْرَأَيْتَ بِنْتَ خَارِجَة)
کا لفظ ہے یہ ابو بکر رضی اللہ تعالیٰ عنہ کی بیوی ہے،
حضرت عمر رضی اللہ تعالیٰ عنہ کی کوئی بیوی بنت خارجہ نہیں یا بنت زید نہیں ہے اس لیے صحیح یہی ہے کہ یہاں ابو بکر رضی اللہ تعالیٰ عنہ ہی مراد ہیں اس لیے ابو بکر رضی اللہ تعالیٰ عنہ نے ہی عمر سے پہلے اپنی بیٹی عائشہ کا گلا دبوچا تھا۔
تحفۃ المسلم شرح صحیح مسلم 3690