🏠 👥 🔍 🧩 🅰️ 📌 ↩️

شیخ الحدیث مولانا عبد العزیز علوی حفظ اللہ
حدیث حاشیہ: فوائد ومسائل: حضرت حفصہ رضی اللہ تعالیٰ عنہا اورحضرت عائشہ رضی اللہ تعالیٰ عنہا کا آپ صلی...
حدیث حاشیہ:
فوائد ومسائل:
حضرت حفصہ رضی اللہ تعالیٰ عنہا اورحضرت عائشہ رضی اللہ تعالیٰ عنہا کا آپ صلی اللہ علیہ وسلم کے خلاف ایکا اور اتحاد یہ تھا کہ آپ صلی اللہ علیہ وسلم نے جو بات حضرت حفصہ رضی اللہ تعالیٰ عنہا کو اس ہدایت کے ساتھ بتائی تھی کہ تم نے اسے آ گے کسی کو نہیں بتانا،
انھوں نے وہ بات بربنائےمحبت و اخلاص حضرت عائشہ رضی اللہ تعالیٰ عنہا کو بتا دی جب اللہ تعالیٰ نے اس افشائے راز سے رسول اللہ صلی اللہ علیہ وسلم کو آ گاہ فرما دیا۔
اور آپ صلی اللہ علیہ وسلم نے حضرت حفصہ رضی اللہ تعالیٰ عنہا سے اس پر استفسار فرمایا۔
تو انھوں نے تعجب سے پوچھا آپ صلی اللہ علیہ وسلم کو کس نے بتایا۔
آپ صلی اللہ علیہ وسلم نے بتا دیا کہ مجھے علیم و خبیر ذات نے اطلاع دی ہے۔
اور انہیں اس حرکت پر تنبیہ کی لیکن انھوں نے اس تنبیہ کو کوئی زیادہ اہمیت نہ دی کہ میں نے یہ بات آپ صلی اللہ علیہ وسلم ہی کی دوسری معتمد اور محبوب بیوی کو بتا کر کوئی سنگین جرم نہیں کیا کہ آپ صلی اللہ علیہ وسلم اس پر میری گرفت فرمائیں تو انھوں نے اس تدلل و ناز اور اعتماد کی بنا پر جو میاں بیوی میں باہمی محبت و پیار کی بنا پر ہوتا ہے آپ صلی اللہ علیہ وسلم سے خفگی اور کچھ لاتعلقی کا اظہار کیا اور دوسری بیوی حضرت عائشہ رضی اللہ تعالیٰ عنہا نے بھی اس خفگی اور ناراضگی میں حضرت حفصہ رضی اللہ تعالیٰ عنہا کا ساتھ دیا کہ اگر اس نے مجھے یہ بات بتا دی تو کیا ہوا۔
آخر میں بھی تو آپ صلی اللہ علیہ وسلم کی بیوی ہی ہوں،
کوئی غیر یا اجنبی تو نہیں ہوں۔
تو پھر اس پر عتاب کیوں اس کا معنی تو یہ ہو۔
آپ صلی اللہ علیہ وسلم نے مجھے غیر خیال کیا ہے۔
اس طرح انھوں نے بھی آپ صلی اللہ علیہ وسلم سے محبت کے ناز اور تدلل کی بنا پر ناراضگی میں حضرت حفصہ رضی اللہ تعالیٰ عنہا کا ساتھ دیا۔
تو انہیں بتا دیا گیا اگر تم روٹھ جاؤ گی تو یہ نہ سمجھو،
اس سے رسول اکرم صلی اللہ علیہ وسلم کی مجلس سونی ہو جائے گی پیغمبر کی دلچسپی اور توجہ کا اصل مرکز تو اللہ تعالیٰ ہے جو ان کا مولیٰ اور مرجع ہے۔
پھر جبریل امین علیہ السلام آپ صلی اللہ علیہ وسلم کے ساتھ ہیں جو آپ صلی اللہ علیہ وسلم کے پاس وحی لاتے ہیں۔
پھر مؤمنین صالحین ہیں،
جن کی آپ صلی اللہ علیہ وسلم تربیت اور تزکیہ فرماتے ہیں۔
اس طرح اللہ تعالیٰ کے فرشتے آپ صلی اللہ علیہ وسلم کے ہر مشکل میں رفیق اور معاون و مدد گار ہیں۔
اس لیے اللہ کا رسول ان کی محبت و رفاقت کا محتاج نہیں ہے بلکہ وہ اس کی محبت اور رفاقت و معیت کی محتاج ہیں۔
تحفۃ المسلم شرح صحیح مسلم 3694