🏠 👥 🔍 🧩 🅰️ 📌 ↩️

الشیخ عبدالستار الحماد حفظہ اللہ
حدیث حاشیہ: (1) ایک روایت میں تفصیل ہے کہ حج تمتع کے متعلق قرآنی آیت نازل ہوئی اور ہم...
حدیث حاشیہ:
(1)
ایک روایت میں تفصیل ہے کہ حج تمتع کے متعلق قرآنی آیت نازل ہوئی اور ہم نے رسول اللہ صلی اللہ علیہ وسلم کے ساتھ حج تمتع کیا، پھر قرآن نے اس کو حرام نہیں کہا اور رسول اللہ صلی اللہ علیہ وسلم نے بھی آخر دم تک اس سے منع نہیں فرمایا۔
اس کے بعد ایک شخص نے اپنی رائے سے جو کہنا تھا کہہ دیا۔
(صحیح البخاري، التفسیر، حدیث: 4518) (2)
امام بخاری ؒ نے اس روایت کے بعد وضاحت کی ہے کہ حج تمتع سے منع کرنے والے حضرت عمر ؓ تھے۔
قرائن بھی اس بات کی نشاندہی کرتے ہیں کہ سب سے پہلے حج تمتع سے منع کرنے والے حضرت عمر ؓ تھے، اس کے بعد جس نے بھی اس سے منع کیا اس نے حضرت عمر ؓ کی اتباع کرتے ہوئے منع کیا تھا۔
بعض روایات سے پتہ چلتا ہے کہ حضرت عثمان اور حضرت عبداللہ بن زبیر ؓ بھی حج تمتع سے منع کرتے تھے۔
لیکن انہوں نے اجتہاد کی بنیاد پر منع کیا تھا جو نص کے مقابلے میں ہونے کی وجہ سے قابل قبول نہیں۔
(فتح الباري: 546/3) (3)
اس حدیث سے معلوم ہوا کہ قرآنی حکم کو قرآن کی آیت سے منسوخ کیا جا سکتا ہے، اس میں کوئی اختلاف نہیں، البتہ حدیث سے قرآن کا نسخ مختلف فیہ ہے، لیکن ہمارے نزدیک راجح یہی ہے کہ احادیث سے بھی قرآنی حکم منسوخ ہو سکتا ہے کیونکہ اس حدیث میں حضرت عمران بن حصین ؓ کہتے ہیں کہ حج تمتع سے رسول اللہ صلی اللہ علیہ وسلم نے منع نہیں فرمایا۔
اس کا مفہوم یہ ہے کہ اگر رسول اللہ صلی اللہ علیہ وسلم منع کر دیتے تو قرآنی حکم منسوخ قرار پاتا۔
(فتح الباري: 546/3)
واللہ اعلم
هداية القاري شرح صحيح بخاري، اردو 1571