🏠 👥 🔍 🧩 🅰️ 📌 ↩️

الشیخ عبدالستار الحماد حفظہ اللہ
حدیث حاشیہ: (1) روایات سے معلوم ہوتا ہے کہ رسول اللہ ﷺ نے وہاں چار خیمے دیکھے: ایک آپ...
حدیث حاشیہ
➊ روایات سے معلوم ہوتا ہے کہ رسول اللہ صلی اللہ علیہ وسلم نے وہاں چار خیمے دیکھے:
ایک آپ کے لیے تھا اور تین ازواج مطہرات حضرت عائشہ، حضرت حفصہ اور حضرت زینب رضی اللہ عنہن کے تھے۔
چونکہ خیموں کا اہتمام حضرت عائشہ رضی اللہ عنہا کے ذمے تھا، اس لیے حضرت حفصہ رضی اللہ عنہا نے ان سے باضابطہ اجازت طلب کی لیکن حضرت زینب رضی اللہ عنہا نے اجازت لینے کی ضرورت محسوس نہ کی اور انہوں نے از خود خیمہ نصب کر لیا، غالباً رسول اللہ صلی اللہ علیہ وسلم کے انکار کی وجہ بھی یہی تھی۔
آپ نے تمام خیمے اکھاڑ دینے کا حکم دیا۔
بہرحال اس حدیث سے اعتکاف کے لیے مسجد میں خیمے لگانے کا جواز معلوم ہوا۔
❀ امام بخاری رحمہ اللہ کا یہی مقصود ہے۔ [فتح الباری: 350/4]
➋ اس سے یہ بھی معلوم ہوا کہ اعتکاف کی صرف نیت کرنے سے اعتکاف واجب نہیں ہو جاتا، البتہ رسول اللہ صلی اللہ علیہ وسلم نے ماہ شوال میں اس کی قضا بطور استحباب کی ہے کیونکہ آپ جس عمل کو شروع کرتے اس پر دوام کرتے تھے، لیکن ازواج مطہرات کے متعلق کوئی اشارہ نہیں ملتا کہ انہوں نے بھی ماہ شوال میں اعتکاف کیا ہو۔ [فتح الباری: 352/4]
هداية القاري شرح صحيح بخاري، اردو 2034