🏠 👥 🔍 🧩 🅰️ 📌 ↩️

الشیخ عبدالستار الحماد حفظہ اللہ
حدیث حاشیہ: رسول اللہ ﷺ کو جب بنوقریظہ کی عہد شکنی کا علم ہواتوتحقیق کے لیے حضرت سعد بن...
حدیث حاشیہ:
رسول اللہ صلی اللہ علیہ وسلم کو جب بنوقریظہ کی عہد شکنی کا علم ہواتوتحقیق کے لیے حضرت سعد بن معاذ ؓ، حضرت سعد بن عبادہ ؓ، حضرت عبداللہ بن رواحہ اور خوات بن جبیر ؓ کو حقیقت حال معلوم کرنے کے لیے بھیجا۔
جب یہ لوگ بنوقریظہ کے پاس پہنچے تو انھیں انتہائی خباثت پرآمادہ پایا، انھوں نے غلیظ گالیاں بکنا شروع کردیں اور رسول اللہ صلی اللہ علیہ وسلم کی توہین کی، چنانچہ ان حضرات نے رسول اللہ صلی اللہ علیہ وسلم کو اشاروں میں بتایا کہ وہ بدعہدی پر تلے ہوئے ہیں۔
اس دوران میں حضرت جبرئیل ؑ تشریف لائے اور فرمایا:
اللہ کے رسول صلی اللہ علیہ وسلم ! ان پر کاری ضرب لگانے کے لیے اپنے رفقاء کو ساتھ لے کر بنوقریظہ کا رخ کریں، میں آگے آگے جارہا ہوں۔
رسول اللہ صلی اللہ علیہ وسلم نے فرمایا:
”میرے اصحاب تو تھکاوٹ سے چور ہوچکے ہیں۔
“ حضرت جبرئیل ؑ نے کہا:
آپ ان کا رخ کریں، میں ان کے قلعوں میں زلزلہ برپا کردوں گا اور ان کے دلوں میں رعب اور دہشت ڈال دوں گا۔
یہ کہہ کر وہ دوسرے فرشتوں کے ساتھ بنوقریظہ کے طرف روانہ ہوگئے۔
اس وقت فرشتوں کے گھوڑوں سے جو گرد وغبار اٹھ رہا تھا، حضرت انس ؓ نے اس کی منظر کشی کی ہے۔
حضرت جبرئیل ؑ اور دیگر فرشتے انسانی شکل میں تھے۔
حضرت انس ؓ اور حضرت عائشہ ؓ کو ان کی پہچان رسول اللہ صلی اللہ علیہ وسلم کے بتانے یا علامات وقرائن سے ہوئی تھی۔
(فتح الباري: 510/7)
هداية القاري شرح صحيح بخاري، اردو 4118