🏠 👥 🔍 🧩 🅰️ 📌 ↩️

الشیخ عبدالسلام بن محمد حفظہ اللہ
«باب من انتظر الإقامة» باب: اذان سن کر جو شخص (گھر میں بیٹھا) تکبیر کا انتظار کرے۔ فائدہ: اس باب...
«باب من انتظر الإقامة»
باب: اذان سن کر جو شخص (گھر میں بیٹھا) تکبیر کا انتظار کرے۔
فائدہ:
اس باب سے امام بخاری رحمہ اللہ کا مطلب یہ معلوم ہوتا ہے کہ اذان کے بعد کوئی شخص اگر اقامت تک گھر میں رہے اور اقامت کا وقت ہونے پر مسجد میں جائے تو اس میں کوئی حرج نہیں۔ بعض اہلِ علم نے فرمایا کہ بخاری رحمہ اللہ کا مطلب یہ ہے کہ یہ صرف امام کے لیے ہے کہ وہ اقامت کا وقت ہونے تک گھر میں اقامت کا انتظار کرے، کیونکہ مقتدی کو معلوم نہیں امام کب نماز کھڑی کر دے، ہاں! جس کا گھر مسجد کے قریب ہو اور وہ اقامت شروع ہونے پر شامل ہو سکتا ہو اس کے لیے اجازت ہے۔ آج کل گھڑیاں تقریباً سب کے پاس موجود ہیں، اس لیے اس انتظار کی گنجائش ہر ایک کے پاس ہے، البتہ پہلے جا کر نماز کے انتظار میں بیٹھنا افضل ہے، سوائے امام کے کہ اس کا اقامت کے وقت مسجد میں آنا مسنون ہے۔

فوائد:
➊ فجر کی پہلی اذان سے مراد وہ اذان ہے جو فجر طلوع ہونے کے بعد اقامت سے پہلے ہوتی ہے، اسے اقامت کے لحاظ سے پہلی کہا گیا ہے، کیونکہ اقامت بھی اذان کے الفاظ پر مشتمل ہے۔ «اَلصَّلَاةُ خَيْرٌ مِنَ النَّوْمِ» کے کلمات بھی اسی اذان میں کہے جاتے ہیں۔ اس سے مراد وہ اذان نہیں جو صبح صادق سے پہلے کہی جاتی ہے، کیونکہ صبح کی دو رکعتیں اس اذان کے بعد نہیں ہوتیں بلکہ اقامت سے پہلے والی اذان کے بعد ہوتی ہیں۔
➋ باب کے ساتھ حدیث کا تعلق یہ ہے کہ آپ صلی اللہ علیہ وسلم اذان کے بعد دو رکعتیں پڑھ کر مؤذن کے آنے تک دائیں پہلو پر لیٹ جاتے، اس سے معلوم ہوا کہ اذان کے بعد اقامت کے انتظار میں گھر کے اندر لیٹ سکتا ہے، خصوصاً امام اور جس کا کھر مسجد کے اتنا قریب ہو کہ وہ اقامت سن کر تکبیر تحریمہ کے ساتھ مل سکتا ہو۔ دوسرے لوگوں کے لیے افضل یہ ہے کہ مسجد میں آ کر انتظار کریں، تاکہ پہلی صف اور تکبیر تحریمہ کی فضیلت سے محروم نہ رہیں۔
فتح السلام بشرح صحیح البخاری الامام 626