🏠 👥 🔍 🧩 🅰️ 📌 ↩️

حافظ زبیر علی زئی رحمہ اللہ
عید میں تکبیرات کی تعداد نبی صلی اللہ علیہ وسلم نے فرمایا: «التكبير فى الفطر سبع فى الأ و...
عید میں تکبیرات کی تعداد
نبی صلی اللہ علیہ وسلم نے فرمایا: «التكبير فى الفطر سبع فى الأ و لٰي وخمس فى الآخرة والقراءة بعد هما كلتيهما» عید الفطر کے دن پہلی رکعت میں سات اور دوسری میں پانچ تکبیریں ہیں اور دونوں رکعتوں میں قرأت ان تکبیروں کے بعد ہے۔ [ابوداود 1 / 170 ح 1151]
اس حدیث کے بارے میں امام بخاری رحمہ اللہ نے کہا: «هو صحيح» [العلل الكبير للترمذي ج1 ص 288]
اسے امام احمد بن حنبل رحمہ اللہ اور امام علی بن المدینی نے بھی صحیح کہا ہے۔ [التلخيص الحبير 2 /84]
«عمرو بن شعيب عن ابيه عن جده» کے حجت ہونے پر میں نے مسند الحمیدی کی تخریج میں تفصیلی بحث لکھی ہے۔ اس روایت کے دیگر شواہد کے لیے ارواء الغلیل [3/ 106 تا 113] وغیرہ دیکھیں۔
نافع فرماتے ہیں کہ میں نے ابوہریرہ رضی اللہ عنہ کے پیچھے عید الاضحی اور عید الفطر کی نماز پڑھی۔ انہوں نے پہلی رکعت میں قرأت سے پہلے سات تکبیریں اور دوسری رکعت میں قرأت سے پہلے پانچ تکبیریں کہیں۔ [موطأ امام مالك 1/ 180 ح 435]
اس کی سند بالکل صحیح اور بخاری و مسلم کی شرط پر ہے۔
شعیب بن ابی حمزہ عن نافع کی روایت میں ہے: «وهي السنة» اور یہ سنت ہے۔ [السنن الكبريٰ للبيهقي ج 3 ص288]
امام مالک فرماتے ہیں کہ ہمارے ہاں یعنی مدینہ میں اسی پر عمل ہے۔ [موطأ: 1/ 180]
عبداللہ بن عمر رضی اللہ عنہما بھی عیدین کی پہلی رکعت میں سات تکبیریں اور دوسری میں پانچ تکبیریں کہتے تھے۔ [شرح معاني الآثار للطحاوي 4/ 345]
سیدنا عبداللہ بن عباس رضی اللہ عنہما بھی پہلی رکعت میں قرأت سے پہلے سات اور دوسری رکعت میں قراءت سے پہلے پانچ تکبیریں کہتے تھے۔ [مصنف ابن ابي شيبه ج2 ص 173 ح5701]
ابن جریج کے سماع کی تصریح احکام العیدین للفریابی [ص 176ح128] میں موجود ہے، اس کے دیگر صحیح شواہد کے لیے ارواء الغلیل [ج 3 ص111] وغیرہ کا مطالعہ کریں۔
امیر المؤمنین سیدنا عمر بن عبدالعزیز بھی پہلی رکعت میں قرأت سے پہلے سات اور دوسری میں قرأت سے پہلے پانچ تکبیریں کہتے تھے۔ [مصنف ابن ابي شيبه ج2 ص 176ح، احكام العيدين ص 171، 172ح 117]
اس کی سند صحیح ہے۔ سواطع القمرين [ص 172] باب رفع یدین (14) کے تحت یہ باسند حسن گزر چکا ہے کہ جو شخص رفع یدین کرتا ہے اسے ہر انگلی کے بدلے میں ایک نیکی ملتی ہے۔ ابن عمر رضی اللہ عنہما فرماتے ہیں کہ نبی صلی اللہ علیہ وسلم رکوع سے پہلے ہر تکبیر میں رفع یدین کرتے تھے۔ [ابوداود 1 / 111 ح 722، مسند احمد 2 / 134 ح 6175]
اس کی سند بخاری و مسلم کی شرط پر صحیح ہے۔ [ارواء الغليل ج 3 ص113]
امام ابن المنذر اور امام بیہقی نے تکبیرات عیدین میں رفع یدین کے مسئلے پر اس حدیث سے حجت پکڑی ہے۔ [التلخيص الحبيرج2 ص 86]
اور یہ استدلال صحیح ہے کیونکہ عموم سے استدلال کرنا بالاتفاق صحیح ہے۔ جو شخص رفع یدین کا منکر ہے وہ اس عام دلیل کے مقابلے میں خاص دلیل پیش کرے۔ یاد رہے کہ تکبیرات عیدین میں عدم رفع یدین والی ایک دلیل بھی پورے ذخیرۂ حدیث میں نہیں ہے۔
. . . اصل مضمون کے لئے دیکھیں . . .
تحقیقی مقالات جلد 1 صفحہ 55 ------------
نافع رحمہ اللہ سے روایت ہے کہ میں نے (سیدنا) ابوہریرہ (رضی اللہ عنہ) کے پیچھے عید الاضحی اور عید الفطر کی نماز پڑھی، آپ نے پہلی رکعت میں سات تکبیریں کہیں اور دوسری رکعت میں پانچ تکبیریں کہیں۔ [موطأ امام مالك 1/ 180 ح 435 وسنده صحيح]
آپ یہ ساری تکبیریں قرأت سے پہلے کہا کرتے تھے۔ [مصنف ابن ابي شيبه 173/2 ح 5702 وسنده صحيح]
سیدنا عبداللہ بن عباس رضی اللہ عنہ سے بھی بارہ تکبیریں ثابت ہیں۔ [احكام العيدين للفريابي: 128، وسنده صحيح]
سیدنا عبداللہ بن عمر رضی اللہ عنہ نے فرمایا: عیدین میں تکبیر سات اور پانچ ہے۔ [مصنف ابن ابي شيبه 2/ 175 ح 5720 وسنده حسن]
امام مکحول رحمہ اللہ (تابعی) نے فرمایا: عید الاضحی اور عید الفطر میں تکبیر قرأت سے پہلے سات اور (دوسری رکعت میں) پانچ ہے۔ [ابن ابي شيبه 2/ 175 ح 5714 ملخصاً وسنده صحيح]
ابوالغصن ثابت بن قیس الغفاری المکی نے فرمایا: میں نے عمر بن عبد العزیز (رحمہ اللہ) کے پیچھے عید الفطر کی نماز پڑھی تو انہوں نے پہلی رکعت میں قرأت سے پہلے سات اور دوسری رکعت میں قرأت سے پہلے پانچ تکبیریں پڑھیں۔ [ابن ابي شيبه 2/ 176 ح 5732 وسنده حسن وهو صحيح بالشواهد]
امام ابن شہاب الزہری نے فرمایا: سنت یہ ہے کہ عید الاضحی اور عید الفطر میں پہلی رکعت میں قرأت سے پہلے سات تکبیریں اور دوسری رکعت میں قرأت سے پہلے پانچ تکبیریں کہیں۔ [احكام العيدين للفريابي: 106، وسنده حسن لذاته وهو صحيح بالشواهد]
امام مالک کا بھی یہی مذہب ہے۔ [احكام العيدين: 131، وسنده صحيح]
امام مالک اور امام اوزاعی دونوں نے فرمایا کہ ان تکبیروں کے ساتھ رفع یدین بھی کرنا چاہیے۔ [احكام العيدين: 136۔ 137، والسنداًن صحيحان]
. . . اصل مضمون کے لئے دیکھیں . . .
تحقیقی مقالات جلد 6 صفحہ 24
تحقیقی و علمی مقالات للشیخ زبیر علی زئی 55